រាជធានីភ្នំពេញ ៖ កំពូលតារាចម្រៀង ម៉េង កែវពេជ្ជតា កាលពីពេលថ្មីៗនេះ កូនប្រុសច្បងមានឈ្មោះមួង រតនៈឃីម បានមកលេងស្រុកខ្មែរក្នុងពេលទំនេរពីការសិក្សានៅប្រទេស អូស្ត្រាលីមួយរយៈ។ ក្នុងពេលនៅជុំម្តាយ និងប្អូនស្រី កូនប្រុសរបស់តារាចម្រៀងម៉េង កែវពេជ្ជតា ឆ្លៀតរៀនព្យាណូនៅ សាលាស្រណោះតន្ត្រី ដោយទទួលបានសញ្ញាបត្រជាសិស្សពូកែ ដោយក្នុងនោះមាន ទាំងកូនជនបរទេសទៀត សុទ្ធតែដណ្តើមបានជ័យលាភី។ សមិទ្ធផលស្នាដៃ ការសិក្សាជំនាញតន្ត្រីនេះ អ្នកនាងម៉េង កែវពេជ្ជតា ហាក់រំភើបជាខ្លាំងនា ពិធីប្រគល់សញ្ញាបត្រ ទោះជាមួយរយៈកាលនេះ ម្តាយកូនទាំង២ឃ្លាតគ្នា យូរឆ្នាំក៏ដោយ។
នាពិធីប្រគល់សញ្ញាបត្រជូនសិស្សជ័យលាភីដែលជាការរៀបចំរបស់ សាលា ស្រណោះតន្ត្រី កាលពីព្រឹកថ្ងៃទី២០ មិថុនា ២០១៥ នៅក្នុងអគារ CJCC ស្ថិតនៅសាកលវិទ្យាល័យភូមិន្ទភ្នំពេញ កន្លងទៅនោះ គេសង្កេតឃើញមានលោកគ្រូ អ្នកគ្រូ សិស្សានុសិស្ស មាតា បិតា សុទ្ធតែសម្តែងការរីករាយ បន្ទាប់ពីកូនរបស់ខ្លួនអាចដណ្តើមបានចំណាត់ថ្នាក់ល្អពីការលេង តន្ត្រីព្យាណូ។ កម្មវិធីនោះ ក៏មានការចូលរួមពីសំណាក់លោកវ៉ា បូរិន សាកលវិទ្យាធិការរងនៃសាកលវិទ្យាល័យ ភូមិន្ទវិចិត្រសិល្បៈតំណាងលោក ជំទាវក្រសួងវប្បធម៌។ អ្នកនាងម៉េង កែវពេជ្ជតា ជាតារាចម្រៀងល្បីឈ្មោះម្នាក់ ក៏បានចូលរួមនាឱកាសនោះ ធ្វើឲ្យមហាជនចាប់អារម្មណ៍ ដោយសារតែកូនប្រុសអ្នកនាងបានមកទទួលលិខិតជាប់ចំណាត់ថ្នាក់នោះដែរ មានទាំងបរទេស និងកូនខ្មែរ។
អ្នកនាងម៉េង កែវពេជ្ជតា បានរៀបរាប់ខ្លះៗជុំវិញកូនប្រុសបានរៀនព្យាណូ និងទទួល សញ្ញាបត្រពីសាលាស្រណោះតន្ត្រីថា ការពិតកូនមកលែងស្រុកខ្មែរមួយរយៈប៉ុណ្ណោះ តែមានពេលដូចជាយូរខែ (២ទៅ៣ខែ) ក៏កូនចង់រៀនព្យាណូ ទើបនាំមកដាក់ពាក្យសាលានេះតែម្តង។ អ្វីដែលសំខាន់ក្នុងនាមជាម្តាយ ពេលដឹងថា កូនមានគំនិតបែបនេះ សប្បាយចិត្ត ព្រោះមិនចង់ឲ្យក្មេងយកពេលទៅ លេងហ្គេមខ្ចះខ្ជាយពេលវេលា នេះជាការបង្កើនចំណេះមួយផ្នែកសម្រាប់ កូនប្រុសរបស់អ្នកនាងដែរ។ ម្យ៉ាងទៀតនេះអាចថា ជាឈាមជ័រសិល្បៈដែរ ព្រោះគាត់ស្រាប់តែចូលចិត្តភ្លេង ហើយអាចសម្តែង និងប្រឡងបាន រហូតទទួលសញ្ញាបត្រ ពិតជាពិសេសក្នុងនាមជាម្តាយដែលចង់ឃើញកូនឆ្លាត។ យ៉ាងណាទេពកោសល្យ កូនផ្នែកព្យាណូនេះ ទុកជូនលោកគ្រូ វាយតម្លៃទៅចុះ ប៉ុន្តែខ្ញុំក៏ធ្លាប់ទៅមើលគាត់សម្តែងដែរ និងយល់ថា ដូចជាឆ្លាតម្យ៉ាងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]