រាជធានីភ្នំពេញ ៖ និស្សិតម្នាក់ត្រូវស្ត្រីរកស៊ីផ្លូវភេទតាមផ្លូវលេខ៧០ (ទំនប់ទួលគោក) សង្កាត់ទួលសង្កែ ខណ្ឌឫស្សីកែវ ប្រើល្បិចលួងលោមលូកយកកាបូបប្រាក់អស់ប្រមាណជិត៣០០ដុល្លារ និងបោកយកទូរស័ព្ទ ហើយគេចខ្លួនបាត់ បន្ទាប់ពីនិស្សិតរូបនោះផឹកស្រវឹង ហើយលង់ស្នេហ៍មុនពេលប៉ុនប៉ងនាំនាងឡើងឋានសួគ៌ ។
ការចាញ់បោកស្ត្រីរកស៊ីផ្លូវភេទនេះ បានកើតឡើងកាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី២២ កក្កដា ឆ្នាំ២០១២ នៅផ្លូវលេខ៧០ ស្ថិតក្នុងភូមិទួលសង្កែ ខណ្ឌឫស្សីកែវ ។ បន្ទាប់ពីត្រូវនាងមេអំបៅរាត្រីលូកយកកាបូប និងបោកយកប្រាក់ និងទូរស័ព្ទអស់និស្សិតរូបនោះរួមទាំងមិត្តភក្តិបានទៅដាក់ ពាក្យបណ្តឹងនៅប៉ុស្តិ៍ទួលសង្កែ កាលពីព្រឹកថ្ងៃទី២២ កក្កដា ។
តាមនិស្សិតរូបនេះបានឱ្យដឹងថា នៅយប់ថ្ងៃទី២១ កក្កដា ខ្លួនរួមនឹងមិត្តភក្តិ២នាក់ទៀតបាននាំគ្នាទៅផឹកនៅម្តុំ ដេអិន លុះដល់វេលាយប់ជ្រៅរូបខ្លួន និងមិត្តភក្តិម្នាក់បានជិះម៉ូតូមួយគ្រឿងក្នុងគោលបំណងទៅផ្ទះ នៅភូមិទួលគោក សង្កាត់ទួលសង្កែ ។ នៅពេលធ្វើដំណើរមកដល់ផ្លូវលេខ៧០ សង្កាត់ទួលសង្កែ ក៏បានឈប់ម៉ូតូនិយាយទូរស័ព្ទ ហើយមានស្ត្រីរកស៊ីផ្លូវភេទវ័យក្មេងម្នាក់មកទាក់ទង ក៏ពេញចិត្ត និងសាសងគ្នា ហើយបបួលនាងទៅរួមមេត្រីក្នុងតម្លៃ៦ម៉ឺនរៀល រួចក៏ប្រគល់ប្រាក់ឱ្យហើយត្រូវស្ត្រីរូបនោះធ្វើជាខ្ចីទូរ ស័ព្ទនិយាយ ។
ប្រភពព័ត៌មានបន្តទៀតថា ខណៈនោះស្រាប់តែមានស្ត្រី៣នាក់ទៀតមកដល់ធ្វើជានាំគ្នាចាប់ ឱបបង្កឱ្យមានភាពរញ៉េរញ៉ៃ ហើយស្ត្រីម្នាក់ដែលខ្ចីទូរស័ព្ទនោះក៏គេចខ្លួនបាត់ ជាមួយនេះរូបគេក៏បាត់កាបូបលុយក្នុងហោប៉ៅទៀត។ ក្រោយពីមានស្ថានភាពនេះទើបដឹងថា ជាល្បិចរបស់ស្ត្រីរកស៊ីផ្លូវភេទដែលតែងតែបោកប្រាស់យកប្រាក់ពី បុរសស្រវឹងមួយចំនួនដែលធ្វើដំណើរទៅរកស្រី ដែលខ្លះមិនទាន់បានទៅផងក៏បាត់អស់កាបូប ឬរបស់របរ ឯពួកនាងទាំងនោះក៏បានគេចខ្លួនបាត់ ។
តាមព័ត៌មានឱ្យដឹងថា កាបូបដែលក្រុម នាងៗលូកយកទៅបាត់នោះមានប្រាក់ចំនួន២៩០ដុល្លារ ទូរស័ព្ទមួយគ្រឿង ដែលខ្ចីគេ និងប្រាក់ថ្លៃឡើងលើគ្រែ៦ម៉ឺនរៀល ព្រមទាំងអត្តសញ្ញាណប័ណ្ណ និងឯកសារមួយចំនួនទៀត ។
គួរបញ្ជាក់ថា នៅលើទំនប់ទួលគោក(ផ្លូវលេខ៧០) និងផ្លូវលេខ២៧៣ ដែលជាព្រំប្រទល់រវាងខណ្ឌ៣ គឺខណ្ឌឫស្សីកែវ ខណ្ឌដូនពេញ និងខណ្ឌទួលគោក ជាតំបន់បនស្រីនៅក្នុងកំឡុងឆ្នាំ២០០០ ហើយរហូតមកដល់ពេលនេះទោះបីផ្ទះបន និងស្ត្រីបនត្រូវបង្ក្រាប និងលុបបំបាត់ស្ទើរតែអស់ទៅហើយក្តី តែនៅពេលយប់ជ្រៅគេឃើញពួកនាងរាត្រីចរចេញមកបោយដៃហៅម៉ូយ ប្រសាច និងមានល្បិចគ្រប់បែបយ៉ាងដើម្បីរកប្រាក់ ។ ដូច្នេះបើអ្នកមិនធ្លាប់ឆ្លងកាត់ផ្លូវនោះវេលាយប់អធ្រាត្រទេ ពុំគប្បីសាកល្បងទៅក្បែរទីនោះ ដូចជាយុវនិស្សិតខាងលើទំបំផុតប្រាក់ក៏បង់ថង់ក៏ដាចមិនងាយរក មុខនាងឃើញឡើយ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]