ខេត្តពោធិ៍សាត់ ៖ កាលពីថ្ងៃទី១៩ កក្កដា វេលាម៉ោង៥ល្ងាច កម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលព្រហ្មទណ្ឌកម្រិតស្រាល នគរបាលបច្ចេកទេសនិងវិទ្យាសាស្ត្រនៃស្នងការដ្ឋាននគរបាលខេត្ត និងនគរបាលក្រុងពោធិ៍សាត់ បានចាប់ឃាត់មុខសញ្ញាចែកចាយនិងប្រើប្រាស់គ្រឿងញៀនចំនួន៥នាក់ ខណៈពេលពួកគេកំពុងធ្វើសកម្មភាពចែកចាយ និងប្រើប្រាស់នៅក្នុងផ្ទះសំណាក់មួយជាប់ផ្លូវជាតិលេខ៥ ស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ។
សមត្ថកិច្ចឱ្យដឹងថា មុខសញ្ញាទាំង៥នាក់ ១-ឈ្មោះប៊ុត រតនៈ ភេទប្រុស អាយុ២៤ឆ្នាំ នៅខេត្តបាត់ដំបង ២-ឈ្មោះអឹុម រដ្ឋា ភេទប្រុស អាយុ២៦ឆ្នាំ រស់នៅស្រុកភ្នំក្រវាញ ៣-ឈ្មោះលី លី ភេទស្រី អាយុ១៥ឆ្នាំ រស់នៅរាជធានីភ្នំពេញ ៤-ឈ្មោះលី ហាន់ណាហ្វី ភេទប្រុស អាយុ២៧ឆ្នាំ ជនជាតិខ្មែរអ៊ិស្លាម រស់នៅស្រុកភ្នំក្រវាញ និង៥-ឈ្មោះចាន់ វិចិត្រ ភេទប្រុស អាយុ២១ឆ្នាំ រស់នៅក្រុងពោធិ៍សាត់ ។ ជាមួយគ្នានេះ យើងរឹបអូសបានវត្ថុតាងមានម៉ូតូ១គ្រឿង ម៉ាទឹកកក៤កញ្ចប់ធំនិង១កញ្ចប់តូច ដបទឹកបរិសុទ្ធចោះរន្ធដាក់ទុយោចំនួន៤ ដែកកេះ៣ ទូរស័ព្ទ៧គ្រឿង លុយដុល្លារក្លែងក្លាយ១០០ដុល្លារ និងលុយខ្មែរ២២ម៉ឺនរៀល ។
លោកវរសេនីយ៍ត្រី ស៊ី សាវិន ប្រធានការិយាល័យនគរបាលប្រឆាំងគ្រឿងញៀនឱ្យដឹងថា ប្រហែល១០ថ្ងៃមុននេះមានស្ត្រីម្នាក់មកប្តឹងសមត្ថកិច្ចយើងថា ប្តីរបស់នាងឈ្មោះឆេង សុខលី អាយុ៣៣ឆ្នាំ នៅភូមិបឹងឈូក ឃុំកណ្តៀង ស្រុកកណ្តៀង ជាមនុស្សញៀនថ្នាំហើយបានដើរបាត់ៗពីផ្ទះមិនដឹងទៅណា លុះពេលតាមរកឃើញចេញចូលនៅផ្ទះសំណាក់សែនសុខ ជាប់ផ្លូវជាតិលេខ៥ ស្ថិតនៅខាងមុខធនាគារកាណាឌីយ៉ា ដោយមានគូកនមួយចំនួនទៀត ។
បន្ទាប់ពីទទួលបានព័ត៌មាននេះយើងក៏ដាក់ ភ្នាក់ងារឱ្យតាមដានមើល លុះនៅល្ងាចថ្ងៃទី១៩ កក្កដា ឃើញជនខាងលើមកជួលផ្ទះសំណាក់នោះទៀតក៏ដឹកនាំកម្លាំងទៅព័ទ្ធចាប់ ជាក់ស្តែងក្នុងបន្ទប់តែម្តង ។ ឈ្មោះឆេង សុខលី យើងបានបញ្ជូនទៅដាក់នៅមណ្ឌលអប់រំកែប្រែខេត្តបាត់ដំបងតាមសំណូមពរ របស់ស្ត្រីជាភរិយា ចំណែក៥នាក់នេះបន្ទាប់ពីធ្វើការសាកសួររួចក៏បានបញ្ជូនទៅសាលាដំបូង ខេត្ត ដើម្បីចាត់ការតាមច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
