ខេត្តក្រចេះ ៖ បុរសវ័យចំណាស់ម្នាក់ត្រូវបានប្រជាពលរដ្ឋប្រទះឃើញដេកស្លាប់ ផ្កាប់មុខលើចិញ្ចើមផ្លូវជាតិលេខ៧៦A កាលពីវេលាម៉ោង៧ព្រឹកថ្ងៃទី២០ កក្កដា ស្ថិតនៅក្នុងភូមិគ្រញូងសែនជ័យ ឃុំ២ធ្នូ ស្រុកស្នូល ជាប់ព្រំប្រទល់ជាមួយស្រុកកែវសីមា ខេត្តមណ្ឌលគិរី ។
បើតាមប្រភពព័ត៌មានបានឱ្យដឹងថា បុរសរូបនេះទើបតែមកស្នាក់នៅធ្វើជាកម្មករដាំដំឡូងមីបានបួន ថ្ងៃប៉ុណ្ណោះ ដោយស្នាក់នៅជាមួយគ្រូបង្រៀនម្នាក់នៅភូមិ-ឃុំខាងលើ ។ បុរសរងគ្រោះត្រូវបានគេស្គាល់ថាឈ្មោះរឹទ្ធ អាយុប្រហែលជិត៤០ឆ្នាំ មានស្រុកកំណើតនៅស្រុកពញាក្រែក ខេត្តកំពង់ចាម ។ លោកឡុង សាវេត នាយកសាលាបឋមសិក្សាឆ្នែង បានឱ្យដឹងថា ជនរងគ្រោះខាងលើជាមនុស្សធ្លាប់ស្គាល់គ្នា ហើយបានមកសុំគាត់ស្នាក់នៅបណ្តោះអាសន្នដើម្បីស៊ីឈ្នួលធ្វើជា កម្មករចម្ការដំឡូងមី ។ គាត់បន្តថា នៅវេលាម៉ោងប្រហែលជា៧យប់ថ្ងៃទី១៩ កក្កដា មានភ្លៀងធ្លាក់យ៉ាងខ្លាំង ហើយឮជនរងគ្រោះប្រាប់ថា ទៅរកទិញទៀនដើម្បីអុជបំភ្លឺ តែរហូតមកដល់ពេលព្រឹកបន្ទាប់ ស្រាប់តែមានគេមកប្រាប់គាត់ថា ឈ្មោះរឹទ្ធ បានស្លាប់បាត់ទៅហើយ។
លោកអ៊ុច សុផាន់ណា នាយផ្នែកពិនិត្យវិភាគកន្លែងកើតហេតុ បានឱ្យដឹងថា ករណីខាងលើនេះជាករណីគ្រោះថ្នាក់ចរាចរណ៍ ។ ពេលនេះលោកកំពុងធ្វើរបាយការណ៍បញ្ជូនទៅថ្នាក់លើដើម្បីស្វែងរក ជនបង្ក ចំណែកសពត្រូវបានយកទៅតម្កល់ទុកនៅវត្តគ្រញូងសែនជ័យ រង់ចាំសាច់ញាតិមកទទួលយកទៅធ្វើបុណ្យនៅឯស្រុកកំណើត ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]