ខេត្តសៀមរាប ៖ បង្គោលភ្លើងដើរដោយថាមពលពន្លឺព្រះអាទិត្យមួយដើមដែលជាជំនួយ របស់សាធារណរដ្ឋកូរ៉េ ដល់អាជ្ញាធរអប្សរា មានតម្លៃរាប់ពាន់ដុល្លារត្រូវរថយន្ដដឹកឈើគគីររបស់មន្ដ្រីយោធា ម្នាក់ក្នុងអង្គភាពមួយបុកឱ្យអន្ដរាយទាំងកណ្ដាលរាត្រី ។ ឧប្បត្តិហេតុនេះ កើតឡើងកាលពីវេលាម៉ោងប្រមាណ២និង៣០នាទីរំលងអធ្រាត្រឈានចូលថ្ងៃ ទី១៨ កក្ដដា នៅចំណុចផ្លូវកែងក្នុងភូមិ-ឃុំព្រះដាក់ ស្រុកបន្ទាយស្រី ខណៈរថយន្ដរបស់មន្ដ្រីយោធាខាងលើបុកជាមួយរថយន្ដទួរីសដឹកបន្លែ មួយគ្រឿងទៀតទាំងកំរោល ។
លោក ព្រំ ករុណា ប្រធានស្ដីទីនៃនាយកដ្ឋានសហប្រតិបត្ដិការនៃអាជ្ញាធរជាតិអប្សរាបាន មានប្រសាសន៍ថា បង្គោលភ្លើងដែលបាក់នោះ ជាជំនួយរបស់ក្រុមហ៊ុន Asiana airline នៃសាធារណរដ្ធកូរ៉េ ផ្ដល់ជូនអាជ្ញាធរអប្សរា ក្នុងចំណោមបង្គោលចំនួន១៦បង្គោលដែលបានដាំនៅទីតាំងសំខាន់ៗមួយ ចំនួនក្នុងតំបន់ឧទ្យានអង្គរ ។ លោកបានបញ្ជាក់ថា បង្គោលភ្លើងដើរដោយថាមពលពន្លឺព្រះអាទិត្យនេះមិនមានដាក់លក់នៅលើ ទីផ្សារកម្ពុជាទេ ហើយតម្លៃរបស់វាទំនងជាដល់ទៅរាប់ពាន់ដុល្លារក្នុងមួយដើមៗ ដូច្នេះពេលនេះខាងអាជ្ញាធរអប្សរាកំពុងតែទាមទារតាមផ្លូវច្បាប់ឱ្យ មានការទទួលខុសត្រូវ។
ទាក់ទិននឹងហេតុការណ៍នោះដែរ លោកអនុសេនីយ៍ទោ ជា សំអូន នាយប៉ុស្ដិ៍រដ្ឋបាលឃុំ ព្រះដាក់ដែលបានចុះទៅធ្វើកំណត់ហេតុនៃគ្រោះថា្នក់ចរាចរណ៍នោះ បានឱ្យដឹងថា រថយន្ដម៉ាកវីហ្គោពណ៌ត្រេអុី បើកដោយឈ្មោះ សុខ វណ្ណា ប៉ុន្ដែមិនបានដឹងពីមុខងារពិតប្រាកដទេ ព្រោះក្រោយពេលកើតហេតុភ្លាមៗជននោះបានទុករថយន្តចោលហើយគេចខ្លួន បាត់ ។
ថ្វីបើយ៉ាងនេះក្ដី ប្រភពពីមន្ដ្រីយោធាម្នាក់ដែលសុំមិនបញ្ចេញឈ្មោះបានបង្ហើបឱ្យដឹង ថា អ្នកបើករថយន្ដវីហ្គោនោះ គឺឈ្មោះម៉ៅ វណ្ណា ហៅខ្នុយ ជាមន្ដ្រីយោធាមានទីលំនៅក្នុងតំបន់អូរកូនតឹង ឃុំស្រែណូយ ដែលកន្លងមក មន្ត្រីយោធារូបនោះ ធ្វើសកម្មភាពក្នុងការដើរប្រមូលទិញឈើគ្រប់ប្រភេទនៅក្នុងភូមិ សាស្រ្តរបស់ខ្លួនមកលក់បន្ដទៅឱ្យឈ្មួញឈើនៅក្រុងទេសចរណ៍សៀមរាប នេះ ។
លោកមេប៉ុស្ដិ៍បានបញ្ជាក់ថា មុនពេលកើតហេតុរថយន្ដវីហ្គោនោះបើកមកពីទិសខាងកើតដោយមានដឹកឈើ គគីរមុខកាត់ធំៗពេញគូទរថយន្ត លុះមកដល់ចំណុចផ្លូវបំបែកភូមិព្រះដាក់ ស្រាប់តែមានរថយន្ដទូរីសដឹកបន្លែមួយគ្រឿងបើកមកពីខាងត្បូង ទំនងជាបើកក្នុងល្បឿនលឿនដូចគ្នាក៏បុកគ្នាពេញទំហឹង បណ្ដាលឱ្យរថយន្ដដឹកឈើខ្ទាតទៅបុកង្គោលភ្លើងបាក់រាបដល់ដី តែមិនបណ្ដាលឱ្យមនុស្សណាម្នាក់គ្រោះថ្នាក់ដល់អាយុជីវិតទេ ។ លោកបានបន្ថែមថា ចំពោះករណីនេះខាងលោកមិនទាន់អាចសន្និដ្ឋានថា រថយន្ដណាមួយត្រូវ ឬខុសបាននៅឡើយទេ គឺបានត្រឹមតែបញ្ជូនរថយន្ដទាំងពីរគ្រឿងទៅឱ្យថ្នាក់លើដើម្បីដោះ ស្រាយបន្ត ។
ទោះជាយ៉ាងនេះក្ដី ពេញមួយរសៀលថ្ងៃទី១៨ កក្កដា គេមិនអាចស្វែងជួបលោកអនុសេនីយ៍ទោ ម៉ៅ វណ្ណា ដើម្បីសួរនាំជុំវិញករណីខាងលើនេះបានទេ តែមនុស្សដែលស្និទ្ធជាមួយគាត់ប្រាប់ថា លោក វណ្ណា បានរងរបួសធ្ងន់នៅក្នុងហេតុការណ៍នោះ ត្រូវបានដឹកទៅព្យាបាលនៅប្រទេសវៀតណាម ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]