ខេត្តបាត់ដំបង ៖ កម្លាំងសមត្ថកិច្ចគ្រប់ស្ថាប័នតាមបណ្ដាស្រុកមួយចំនួន និងខេត្តបានចេញប្រតិបត្តិការគ្រប់គោលដៅ ក្រោយពីមានព័ត៌មានថា ស្រ្តីមា្នក់ត្រូវចោរ២នាក់ជិះម៉ូតូស្ទាក់ប្លន់តាមផ្លូវយក ម៉ូតូសេ៊រីខ្ពស់មួយគ្រឿងទៅបាត់កាលពីវេលាម៉ោង៨និង៣០នាទីព្រឹក ថ្ងៃទី១៧កក្កដា លើកំណាត់ផ្លូវជាតិលេខ៥៧(អតីតលេខ១០)ត្រង់ចំណុចវាលបឹងត្រាវ ស្ថិតក្នុងភូមិក្រពើកើត ឃុំភ្នំសំពៅ ស្រុកបាណន់ ។ ប៉ុន្តែក្រោយពីស្រាវជ្រាវជំហានដំបូងសមត្ថកិច្ចដាក់ការសង្ស័យនេះថា «អាចជាការបំប៉ោងសភាពការណ៍» ។
នាយនគរបាលប៉ុស្ដិ៍ឃុំភ្នំសំពៅ លោកម៉ី ឆេងលី បានប្រាប់ឱ្យដឹងថា ស្រ្តីដែលអះអាងថា ត្រូវចោរប្លន់នោះឈ្មោះផាត់ ស្រីនូ អាយុ២៨ឆ្នាំនៅភូមិកម្មករ សង្កាត់ស្វាយប៉ោ ក្រុងបាត់ដំបង និងម៉ូតូដែលត្រូវចោរប្លន់ម៉ាកហុងដាឌ្រីមសេ៊រីឆ្នាំ២០១០ ពណ៌ខ្មៅ ពាក់ស្លាកលេខបាត់ដំបង១G-៧៧៧២ ។ លោកនាយប៉ុស្ដិ៍រូបនេះបានបញ្ជាក់ថា ស្រ្តីរងគ្រោះមិនបានមកប្ដឹងសមត្ថកិច្ចភ្លាមៗទេក្រោយពីត្រូវចោរ ប្លន់ តែបែរជាធ្វើដំណើរទៅផ្ទះ លុះម៉ោងជាង១០ នាព្រឹកនោះទើបលោកទទួលបានព័ត៌មាននេះ និងក្រោយមកបន្តិចទើបឃើញនារីនោះមកដាក់ពាក្យបណ្ដឹងនៅកន្លែងលោក ។
តាមការស្រង់សម្តីស្ត្រីរងគ្រោះឈ្មោះ ផាត់ ស្រីនូ បានប្រាប់សមត្ថកិច្ចថា នៅព្រឹកនោះនាងជិះម៉ូតូមកពីផ្ទះម្តាយមីងនៅភូមិសំបួរមាស ឃុំស្នឹង ស្រុកបាណន់ ដែលនាងបានទៅលេងជិត១សប្តាហ៍កន្លងមកនេះ ដើម្បីត្រឡប់មកផ្ទះវិញ ។ លុះជិះមកដល់ចំណុចខាងលើក៏ជួបមនុស្ស២នាក់ដែលធ្វើដំណើរ បញ្ច្រាសទិសគ្នា ហើយបុរស២នាក់នោះបានជិះហួសនាងបន្តិច ស្រាប់តែជិះបកមកក្រោយវិញ ។ ឃើញដូច្នេះនាងប្រឹងបន្ថែមល្បឿនព្រោះកន្លែងនោះស្ងាត់ ហើយស្ថិតក្នុងស្ថានភាពមិនល្អទៀត ។ ប៉ុន្តែបុរស២នាក់នេះជិះមកទាន់កៀរនាងឱ្យឈប់ រួចដកកាំភ្លើងខ្លីភ្ជង់គំរាមឱ្យនាងចុះពីលើម៉ូតូ ហើយប្លន់យកម៉ូតូនាងជិះទៅទិសខាងលិចបាត់ ។
ស្ត្រីរូបនេះបញ្ជាក់ថា ក្នុងចំណោមចោរប្លន់២នាក់នោះ មានម្នាក់ស្លៀកខោយោធា ជិះម៉ូតូម៉ាកវីវ៉ា សេ១២៥ ពណ៌ខ្មៅ ។ នាងបន្ថែមថា ក្រោយពីត្រូវចោរប្លន់នាងស្លន់ស្លោមិនអាចទាក់ទងអ្នកណា បានឡើយ ហើយអង្គុយទីនោះមួយសន្ទុះ ក៏កាក់ម៉ូតូឌុបជិះទៅផ្ទះ នៅក្រុងបាត់ដំបង ដើម្បីប្រាប់បងប្អូនឱ្យដឹង និងប៉ុន្មានម៉ោងក្រោយមកទើបទៅប្តឹងសមត្ថកិច្ច ។
តាមប្រភពព័ត៌មានដំបូងថា ក្រោយពេលប្លន់ជនសង្ស័យបានធ្វើដំណើរសំដៅមកក្រុងបាត់ដំបង លុះប៉ុន្មានម៉ោងក្រោយមកពេលរកស្ត្រីរងគ្រោះឃើញបែរជា ស្ត្រីនោះប្រាប់ថា ក្រុមចោរធ្វើដំណើរទៅទិសខេត្តប៉ៃលិនទៅវិញ ។ បញ្ហានេះបានធ្វើឱ្យសមត្ថកិច្ចរាប់សិបនាក់នៅតាមគោលដៅ ស្ទើរវិលក្បុង ។ លោកជេត វណ្ណនី ស្នងការរងខេត្តដែលចុះប្រតិបត្តិការផ្ទាល់បាននិយាយថា ក្នុងករណីប្លន់ដ៏ស្រពេចស្រពឹលនេះ បានធ្វើឱ្យសមត្ថកិច្ចគ្រប់ស្ថាប័ន និងតាមបណ្តាស្រុកមួយចំនួនចុះទប់ស្កាត់មុខសញ្ញាគ្រប់គោលដៅ ទាំងអស់ ។ ប៉ុន្តែលោកថា បើយោងលើពេលវេលា យោងលើស្ថានភាពទីកន្លែងកើតហេតុ និងយោងលើចម្លើយបំភ្លឺដូចជាមិនទាន់ច្បាស់លាស់ទេ ។ លោកសង្ស័យថាអាចជាការបំប៉ោងសភាពការណ៍ ហើយក៏មានការសង្ស័យដែរថា ស្ត្រីឈ្មោះផាត់ ស្រីនូ និងជន២នាក់ដែលជាចោរប្លន់ម៉ូតូនាងនោះជាមនុស្សមានទំនាក់ ទំនងគ្នាទៀត ព្រោះករណីនេះវាហាក់ដូចជាស្របពេលគ្នាបំផុត ហើយក៏ដូចជាការណាត់គ្នាមុនដែរ ។
លោកជេត វណ្ណនី ក៏បានបញ្ជាក់ផងដែរថា បើទោះជាបែបនេះក្ដីលោកនៅតែបញ្ជាឱ្យកម្លាំងជំនាញអញ្ជើញ ស្រ្តីរងគ្រោះនោះមកបំភ្លឺជាថ្មីទៀត ដើម្បីរកឱ្យឃើញការពិត ថា តើជាករណីប្លន់ពិតប្រាកដ ឬក៏ជាការសម្ដែងរឿងដើម្បីបិទបាំងនូវបញ្ហាអ្វីមួយ? ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
