ខេត្តបន្ទាយមានជ័យ ៖ បុរសជាជាងសំណង់ម្នាក់បានត្រូវនគរបាលការិយាល័យព្រហ្មទណ្ឌកម្រិត ធ្ងន់ខេត្ត កសាងសំណុំរឿងបញ្ជូនទៅសាលាដំបូងកាលពីថ្ងៃទី១៥ កក្កដា ២០១២ ពីបទប៉ុនប៉ងរំលោភមិនបានសម្រេចប្រព្រឹត្តកាលពីយប់ថ្ងៃទី១៤ កក្កដា ២០១២ នៅសង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី អ៊ុន សំអន នាយការិយាល័យនគរបាលព្រហ្មទណ្ឌកម្រិតធ្ងន់ខេត្ត បានឱ្យដឹងថា បុរសម្នាក់នេះឈ្មោះ ផេន ផា អាយុ៣០ឆ្នាំ ចំណែកនារីដែលជននេះបម្រុងចូលចាប់រំលោភ អាយុ២០ឆ្នាំ ជាកម្មករសំណង់ ស្នាក់នៅបណ្តោះអាសន្នក្នុងសង្កាត់ខាងលើជាមួយគ្នា ។ បើតាមចម្លើយសារភាពរបស់ជនសង្ស័យពេលឃាត់ខ្លួន គឺរូបគេស្រវឹងស្រា ហើយបានទៅបើកមុងបម្រុងចាប់រំលោភនារីរងគ្រោះ តែដោយយប់ងងឹតពេក បែរជាចាប់ប៉ះចំជើងម្តាយនាងដែលដេកក្នុងមុងជាមួយគ្នា ក៏មានការឆោឡោឡើង ហើយអ្នកជិតខាងនៅក្បែរនោះនាំគ្នាដេញចាប់បានប្រគល់ឱ្យ សមត្ថកិច្ច តែម្តង ។
ជនសង្ស័យបានបន្តទៀតថា រូបគេនិងនាង កម្មករសំណង់ដូចគ្នា ហើយរូបគេលួចស្រឡាញ់នាងតែម្នាក់ឯង ដែលខាងស្រីគេមិនដឹងខ្លួនទេ ទើបបង្ខំចិត្តធ្វើអំពើមិនគប្បីដូច្នេះទៅ ។ ចំណែកនារីដែលត្រូវប៉ងចាប់រំលោភនោះ បញ្ជាក់ប្រាប់សមត្ថកិច្ចថា ថ្វីដ្បិតតែនាងធ្វើការជាកម្មករដូចគ្នាមែន តែរូបនាងមិនបានស្រឡាញ់បុរសដែលជាជនសង្ស័យនោះឡើយ ។
លោកនាយការិយាល័យបានបន្តថា ផ្អែកតាមការបង្រ្កាបជាក់ស្តែង និងចម្លើយសារភាពបុរសឈ្មោះ ផេន ផា ត្រូវបានកសាងសំណុំរឿង បញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]