រាជធានីភ្នំពេញ ៖ បុរសចំណាស់ម្នាក់ ខណៈមានទំនាស់ជាមួយប្រពន្ធបន្តិចបន្តួចដែលតាមអ្នកជិតខាង អះអាងថា ផ្តើមចេញពីរឿងប្រចណ្ឌនោះ បានទាញកូនកាំបិតចិតបន្លែចាក់ប្រពន្ធ ពេលកំពុងដេកលក់ចំបំពង់កប៉ុនប៉ងសម្លាប់ ប៉ុន្តែបានអ្នកជិតខាងជួយទាន់ហើយក៏នាំស្ត្រីជាប្រពន្ធ ទៅកាន់មន្ទីរពេទ្យជួយសង្គ្រោះទាន់ពេលវេលា ។ ក្រោយពីចាក់ប្រពន្ធរួច បុរសនេះបានរត់ចេញពីផ្ទះទាំងយប់បាត់ទៅ ហើយប្រពន្ធនឹកស្មានថាប្តីរត់ទៅស្រុកកំណើតក៏មិនបានតាម រកទេ រហូត១យប់១ថ្ងៃក្រោយមកទើបប្រទះឃើញសពនៅក្រោយផ្ទះ ។
សពបុរសនេះត្រូវបានគេប្រទះឃើញកាលពីវេលា ម៉ោង១និង៣០នាទីរសៀលថ្ងៃទី១៥ កក្កដា នៅវាលស្រែ ក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។ បុរសចំណាស់រូបនេះឈ្មោះភួង សៅ អាយុ៧៨ឆ្នាំ មានទីលំនៅភូមិព្រែកតាថុក ឃុំព្រែកស្លែង ស្រុកកណ្តាលស្ទឹង ខេត្តកណ្តាល ចំណែកប្រពន្ធឈ្មោះវង្ស ភ័ណ្ឌ អាយុ៥០ឆ្នាំ ជាកម្មការិនីរោងចក្រ រងរបួសបំពង់កខាងឆ្វេង និងស្នាក់នៅផ្ទះជួលក្នុងភូមិកើតហេតុខាងលើ ។
ស្ត្រីជាប្រពន្ធបានឱ្យដឹងថា សព្វថ្ងៃគាត់និងប្តីរស់នៅបែកគ្នា ដោយគាត់មកស្នាក់នៅផ្ទះជួលខាងលើ ចំណែកប្តីរបស់គាត់រស់នៅឯស្រុកកំណើត ប៉ុន្តែតែងតែឧស្សាហ៍មកលេងគាត់ញឹកញាប់ដែរ ។ មុនពេលកើតហេតុ៤ថ្ងៃ ប្តីរបស់គាត់បានមកលេងនឹងគាត់ហើយក៏មិនមានបញ្ហាអ្វីកើត ឡើងនោះទេ និងមានបំណងត្រឡប់ទៅផ្ទះវិញនៅព្រឹកថ្ងៃទី១៥ កក្កដា ប៉ុន្តែនៅយប់ថ្ងៃទី១៤ កក្កដា ពេលដែលគាត់ដេកបែរខ្នង ប្តីបាននិយាយថាកុំដេកបែរមុខ បែរមុខមកនេះអញមើលមុខបន្តិច ។ ចំណែកគាត់បាននិយាយតបវិញថា មុខធ្លាប់មើលហើយតើចង់មើលអីទៀត ខណៈនោះ ស្រាប់តែបុរសជាប្តីខឹងសម្បា តែគាត់មិនបានចាប់អារម្មណ៍ទេ ក៏ដេកលក់ទៅរហូតដល់វេលាម៉ោង១រំលងអធ្រាត្រ ស្រាប់តែប្តីយកកូនកាំបិតចុងស្រួចចាក់គាត់ចំបំពង់ក ហើយគាត់ក៏បានស្រែកបង្កឱ្យមានការភ្ញាក់ផ្អើលទាំងយប់ ។
ប្រភពដដែលបានបន្តថា ក្រោយពេលមានរឿងបែបនេះ រូបគាត់ត្រូវបានម្ចាស់ផ្ទះជួលនាំយកទៅកាន់មន្ទីរពេទ្យ ដើម្បីសង្គ្រោះបន្ទាន់ ចំណែកប្តីបានរត់ចេញពីផ្ទះជួលទៅបាត់ស្រមោល ។ ក្រោយពេលគ្រូពេទ្យដេររបួសរួចគាត់ក៏ត្រឡប់មកផ្ទះជួល វិញ និងមិនបានតាមរកប្តីទេ ព្រោះមិនបានចាប់អារម្មណ៍ ដោយនឹកស្មានថាប្តីគាត់ត្រឡប់ទៅស្រុកកំណើតវិញបាត់ទៅហើយ ។ រហូតដល់វេលាម៉ោង១រសៀលថ្ងៃទី១៥ កក្កដា ទើបមានកម្មករសំណង់ដើរទៅបត់ជើងនៅចំណុចខាងលើក៏ប្រទះ ឃើញប្តីរបស់គាត់ដេកស្លាប់ផ្កាប់មុខក្នុងស្មៅវាលស្រែ ។
ទាក់ទិនទៅនឹងហេតុការណ៍នេះ សមត្ថកិច្ចបានចុះទៅធ្វើកោសល្យវិច័យឃើញថា បុរសរូបនេះបានធ្វើអត្តឃាតដោយផឹកថ្នាំពុលសម្លាប់ខ្លួន ក្រោយពេលគាត់ចាក់ប្រពន្ធរួចហើយនិងស្មានថាប្រពន្ធស្លាប់ ។ មិនតែប៉ុណ្ណោះ សមត្ថកិច្ចបានរកឃើញសំបុត្របណ្តាំ១ច្បាប់មាន២ទំព័រសរសេរ យ៉ាងក្បោះក្បាយដែលមានខ្លឹមសារបង្ហាញពីការប្រចណ្ឌប្រពន្ធ យ៉ាងងប់ងល់បំផុត ដោយបុរសនោះបានចោទប្រកាន់ប្រពន្ធថាមានសហាយប្រុសក្មេង ដើរផឹកស៊ីជាមួយគ្នា និងមានការរៀបរាប់ជាច្រើនទៀត ព្រមទាំងនិយាយចុងក្រោយថាពេលគាត់ស្លាប់ទៅចង់នរណាយក គាត់ទៅណាក៏យកទៅ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
