រាជធានីភ្នំពេញ ៖ បុរសម្នាក់ស្រវឹងជោកបើកម៉ូតូវីវ៉ា ពណ៌ខ្មៅមួយគ្រឿងក្នុងល្បឿនលឿន ហើយព្យាយាមបើកវ៉ាម៉ូតូមួយគ្រឿងពីមុខក៏ជ្រុលចង្កូតទៅ បុកម៉ូតូសង់កូរ៉េ ពណ៌ក្រហមមួយគ្រឿង ជិះដោយនារី២នាក់ចំពីក្រោយពេញទំហឹង បណ្តាលឱ្យនារី២នាក់ជិះលើម៉ូតូរងរបួសធ្ងន់ កាលពីវេលាម៉ោង១១និង៤៥នាទីយប់ថ្ងៃទី១៥ កក្កដា តាមបណ្តោយមហាវិថីសហព័ន្ធរុស្ស៊ី សង្កាត់ចោមចៅ ខណ្ឌពោធិ៍សែនជ័យ ។
នារីរងគ្រោះទាំង២នាក់ ម្នាក់ឈ្មោះសៅ សីុថា អាយុ២២ឆ្នាំ ជាបុគ្គលិកក្រុមហ៊ុន KFC និងម្នាក់ទៀតឈ្មោះនួន សុនីតា អាយុ២៣ឆ្នាំ ជាបុគ្គលិកក្រុមហ៊ុនជាមួយគ្នា ស្នាក់នៅផ្ទះជួលជាមួយគ្នានៅសង្កាត់ចោមចៅ ខណ្ឌពោធិ៍សែនជ័យ ។ អ្នកទាំង២ត្រូវបានរថយន្តដឹកយកទៅសង្គ្រោះបន្ទាន់នៅ មន្ទីរពេទ្យ ឯបុរសស្រវឹងស្រានោះឈ្មោះ សុខ សាន្ត អាយុ២៤ឆ្នាំ ជាជាងផ្សារដែក ស្នាក់នៅសង្កាត់ចោមចៅ ខណ្ឌពោធិ៍សែនជ័យ របួសស្រាលលាត់ដៃជើងតិចតួច ។
យោងតាមប្រភពព័ត៌មានពីសមត្ថកិច្ចឱ្យដឹងថា មុនពេលកើតហេតុម៉ូតូវីវ៉ា ពណ៌ខ្មៅ បើកបរដោយបុរសស្រវឹងស្រាម្នាក់ បានបើកម៉ូតូយ៉ាងលឿន ហើយព្យាយាមវ៉ាមូ៉តូមួយគ្រឿងទៀត ក៏ជ្រុលចង្កូតទៅបុកម៉ូតូសង់កូរ៉េ ពណ៌ក្រហមមួយគ្រឿងជិះដោយនារី២នាក់ចំពីក្រោយពេញទំហឹង បណ្តាលឱ្យនារីទាំង២នាក់នោះរងរបួសធ្ងន់ ។ ឯបុរសស្រវឹងនោះ គ្រាន់តែរលាត់ដៃជើងតិចតួច ។ ក្រោយពេលកើតហេតុ ប៉ូលិសចរាចរបានយកម៉ូតូទាំង២គ្រឿងទៅរក្សាទុកនៅ អធិការដ្ឋានខណ្ឌពោធិ៍សែនជ័យ។
ដោយឡែកករណីមួយទៀត បុរសស្រវឹងស្រាជោកជាំម្នាក់បើកម៉ូតូអ៊ែរប្លែត ពណ៌សមួយគ្រឿងចេញពីហាងផឹកសីុមួយកន្លែង ហើយពេលដឹងថាខ្លួនទៅមុខលែងរួចក៏ចតម៉ូតូនៅចញ្ចើម ផ្លូវដេកលើម៉ូតូធ្វើមិនដឹង កាលពីវេលាម៉ោង១២យប់ថ្ងៃទី ១៥ កក្កដា តាមបណ្តោយផ្លូវណតប្រ៊ីត ភូមិស្លែងរលើង សង្កាត់ទឹកថ្លា ខណ្ឌសែនសុខ ។
យោងតាមប្រភពព័ត៌មានពីអ្នកឃើញហេតុការណ៍ឱ្យដឹងថា បុរសនោះបើកម៉ូតូមួយគ្រឿងម៉ាកអ៊ែរប្លែ៊ត ពណ៌សមួយគ្រឿងតាមបណ្តោយផ្លូវណតប្រ៊ីតពីត្បូងទៅជើង ក្នុងល្បឿនលឿន និងរេចង្កូតពេញផ្លូវ ស្រាប់តែមកដល់ចំណុចខាងលើប្រហែលជាដឹងខ្លួនថាមិនអាច បើកម៉ូតូទៅមុខ ឬស្មានថាដល់ផ្ទះទើបឈប់ម៉ូតូ ហើយស្រែកឮៗថា «បើកទ្វារ» បន្ទាប់ពីស្រែកអស់ចិត្តបុរសស្រវឹងស្រាម្នាក់នោះបាន ដេកលើម៉ូតូធ្វើមិនដឹង ។
នេះសំណាងល្អហើយ ដែលសមត្ថកិច្ចឃើញ ទាន់ពេលវេលាបានដាស់បុរសស្រវឹងនោះសួររកលេខទូរស័ព្ទ ប្រពន្ធ និងផ្ទះ។ ស្រាប់តែប៉ូលិសសួរនាំបានបីបួនម៉ាត់ បុរសនោះមិនព្រមឆ្លើយតបក៏បើកម៉ូតូទៅមុខបន្តទៀត មិនដឹងថាបើកទៅដេកនៅទីណាទៀតនោះទេ ព្រោះស្រវឹងដល់ថ្នាក់លែងដឹងថាផ្លូវទៅផ្ទះតាមណាផង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
