ខេត្តស្ទឹងត្រែង ៖ កុមារតូចៗក្រោមអាយុ៥ឆ្នាំជាច្រើនរូបត្រូវបានឪពុកម្តាយនាំមកកាន់មន្ទីរពេទ្យបង្អែកខេត្ត កាលពីថ្ងៃទី១៥ កក្កដា ២០១២ ដើម្បីព្យាបាលជំងឺគ្រុនក្តៅ និងមានពងបែកក្នុងមាត់ ហើយរយៈពេលមួយថ្ងៃចេញពងលើបាតដៃជើងបន្ថែមទៀត។
លោកជា វុត្ថា អាយុ៣៥ឆ្នាំ និងប្រពន្ធឈ្មោះវុន ម៉ាច អាយុ២៤ឆ្នាំ រស់នៅភូមិកណ្តាល ឃុំព្រះរំកិល ស្រុកថាឡាបរិវ៉ាត់ប្រាប់ឱ្យដឹងថា កូនរបស់គាត់ឈ្មោះថាច់ សុវិជ្ជា អាយុ៤ឆ្នាំ ក្តៅខ្លួនតែមួយថ្ងៃសោះ ស្រាប់តែរោគសញ្ញាចេញពងបែកក្នុងមាត់ និងបាតដៃជើងធ្វើឱ្យប្រជាពលរដ្ឋដែលមានកូនតូចៗនាំគ្នាព្រួយបារម្ភមិនដឹងថា មានកើតជំងឺអ្វី ហើយបើតាមការសង្កេតនៅក្នុងមន្ទីរពេទ្យបង្អែកមានកុមារប្រមាណជិត១០នាក់ហើយ មកសម្រាកនៅមន្ទីរពេទ្យដែលមកពីភូមិអូរត្រែល និងភូមិកណ្តាលក្នុងស្រុកថាឡាបរិវ៉ាត់។ គ្រូពេទ្យប្រចាំការនៅមន្ទីរពេទ្យបានមានប្រសាសន៍ថា នៅក្នុងរយៈពេល៣ថ្ងៃនេះ តាមការសង្កេតឃើញមានកុមារប្រមាណជិត១០នាក់ហើយកើតមានជំងឺប្រភេទខាងលើនេះ តែមិនទាន់សន្និដ្ឋានថាជាជំងឺអ្វីនៅឡើយទេ។
នៅព្រឹកថ្ងៃទី១៦ កក្កដា នេះ ប្រធានមណ្ឌលសុខភាពស្ទឹងត្រែង បានផ្សព្វផ្សាយនៅឯមណ្ឌលសុខភាពផ្ទាល់ដល់អាណាព្យាបាលដែលមានកូនក្រោមអាយុ១០ឆ្នាំ បើមានរោគសញ្ញាក្តៅខ្លួន ចេញពងបែកក្នុងមាត់ និងតាមដៃជើង សូមប្រញាប់បញ្ជូនកូនមកមន្ទីរពេទ្យ ឬមណ្ឌលសុខភាពភ្លាម ដើម្បីធ្វើការព្យាបាល។ លោកប្រធានមណ្ឌលសុខភាពបានសំណូមពរដល់ប្រជាពលរដ្ឋដែលស្តាប់ការណែនាំរបស់គ្រូពេទ្យឱ្យធ្វើការផ្សព្វផ្សាយតៗគ្នា ដើម្បីបង្ការ និងជៀសវាងការគ្រោះថ្នាក់ណាមួយចំពោះកុមារ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
