ខេត្តព្រះសីហនុ ៖ ស្នូរលាន់កក្រើកដូចរន្ទះបង្កឱ្យមានការភ្ញាក់ផ្អើលភ្លាមៗ ដោយសារតែរថយន្តមួយគ្រឿងដែលបើកបរមានល្បឿនហួសកំណត់ លុះមកដល់ចំណុចផ្លូវបត់ ដោយសារតែអ្នកបើកបរយកចង្កូតមិនទាន់ក៏ជ្រុលទៅបុកផ្ទប់ នឹងគល់ដើមគគីរនៅចិញ្ចើមផ្លូវ បណ្តាលឱ្យអ្នកបើកបររួមទាំងអ្នកជិះក្នុងរថយន្តចំនួន៩ នាក់ត្រូវរងរបួសធ្ងន់ និងមធ្យមដេកដួលរដូករណែលជាប់គល់គគីរគួរឱ្យរន្ធត់ណាស់ ។ ក្រោយពេលកើតហេតុភ្លាមៗនោះ មានរថយន្តសង្គ្រោះតាមគ្លីនិកឯកជនក្នុងខេត្តព្រះសីហនុ ដឹកបញ្ជូនទៅព្យាបាលនៅតាមគ្លីនិកផ្សេងៗគ្នា ។ នៅក្នុងហេតុការណ៍ភ្លាមៗនេះពុំមានបង្កឱ្យមានគ្រោះថ្នាក់ ដល់អាយុជីវិតមនុស្សណាម្នាក់នោះទេ ។
លោកវរសេនីយ៍ទោ ព្រហ្ម ពៅ នាយការិយាល័យចរាចរផ្លូវគោកនៃស្នងការដ្ឋាននគរបាល ខេត្តព្រះសីហនុបានឱ្យដឹងថា ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង៤និង ៥០នាទីថ្ងៃទី១៣ កក្កដា ឆ្នាំ២០១២ តាមបណ្តោយវិថីឯករាជ្យ ក្នុងចំណុចផ្លូវកោងបត់ទល់មុខអតីតសាលាដំបូងក្រុងព្រះសី ហនុចាស់ ស្ថិតនៅភូមិ៣ សង្កាត់៤ ក្រុងព្រះសីហនុ ។ លោកនិយាយទៀតថា រថយន្តដែលបង្កឱ្យមានគ្រោះថ្នាក់ ម៉ាកហ៊ីយ៉ាន់ដាយ (PORTER) ប្រភេទដឹកទំនិញធុនតូច ពណ៌ស ពាក់ស្លាកលេខ ២A-០៤៤៧ ជាកម្មសិទ្ធិរបស់ក្រុមអាជីវករទទួលម៉ៅការរៀបចំតម្លើង ឆាកសម្រាប់ការប្រគំតន្ត្រី ផ្សព្វផ្សាយពាណិជ្ជកម្មឱ្យក្រុមហ៊ុនស្រាបៀរមួយ ដែលបើកបរដោយឈ្មោះគង់ ញ៉ា ភេទប្រុស អាយុ២៥ឆ្នាំ មានទីលំនៅ នៅរាជធានីភ្នំពេញ ។
រីឯអ្នករងគ្រោះក្នុងឧប្បត្តិហេតុខាងលើមានឈ្មោះដូចខាងក្រោមនេះ ៖
១- ឈ្មោះគង់ ញ៉ា អ្នកបើកបរ រងរបួសធ្ងន់
២- ឈ្មោះដា ភេទប្រុស អាយុ២៥ឆ្នាំ មានទីលំនៅរាជធានីភ្នំពេញ របួសធ្ងន់ ។
៣- ឈ្មោះវ៉ាន់ ភុន ភេទប្រុស អាយុ៣១ឆ្នាំ មានទីលំនៅរាជធានីភ្នំពេញ ។
៤- ឈ្មោះភារុណ ភេទប្រុស អាយុ១៨ឆ្នាំ មានទីលំនៅស្រុកស្វាយជ្រំ ខេត្តស្វាយរៀង របួសធ្ងន់ ។
៥- ឈ្មោះជុំ សារូន ភេទប្រុស អាយុ២៤ឆ្នាំ មានទី លំនៅ ស្រុកស្វាយជ្រំ ខេត្តស្វាយរៀង របួសធ្ងន់ ដាច់ពងស្វាសមួយចំហៀងធ្លាក់នៅក្បែរគល់គគីរកន្លែងកើតហេតុ។
៦- ឈ្មោះឃាក់ ដាលីន ដាលីន ភេទស្រី អាយុ២១ឆ្នាំ មានទីលំនៅរាជធានីភ្នំពេញ រងរបួសមធ្យម ។
៧- ឈ្មោះផុន សារីម ភេទប្រុស អាយុ២៧ឆ្នាំ មានទីលំនៅរាជធានីភ្នំពេញ រងរបួសមធ្យម។
៨- ឈ្មោះជួន ទីន ភេទប្រុស អាយុ១៩ឆ្នាំ មានទីលំនៅទីរួមខេត្តស្វាយរៀង រងរបួសមធ្យម ។
និង៩- ឈ្មោះម៉ុក សាមឿន ភេទប្រុស អាយុ៣០ឆ្នាំ មានទីលំនៅព្រែកតាម៉ាក់ ខេត្តកណ្តាល រងរបួសមធ្យម ។
ព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តប្រភេទខាងលើនេះបើកបរតាមបណ្តោយវិថីឯករាជ្យ មកពីចំណុចរង្វង់មូលតោ២ ពីលិចទៅកើត ក្នុងល្បឿនលឿន លុះមកដល់ចំណុចផ្លូវកោងបត់ អ្នកបើកបរទំនងកាច់ចង្កូតមិនទាន់ ក៏ជ្រុលទៅបុកផ្ទប់នឹងដើមគគីរយ៉ាងពេញទំហឹងបង្កឱ្យមាន គ្រោះថ្នាក់ធ្លាក់មនុស្សបោកផ្ទប់ទៅលើគល់គគីរ មួយជាន់ទៀត និងខ្លះទៀតធ្លាក់រាយប៉ាយពេញកន្លែងកើតហេតុ បង្កឱ្យមានការភ្ញាក់ផ្អើលចោមរោមមើល និងជួយសង្គ្រោះណែនណាន់តាន់តាប់ ។ ភ្លាមៗនោះពុំមានជនរងគ្រោះណាម្នាក់ស្លាប់នៅនឹងកន្លែងកើត ហេតុទេ ។
អ្នកទទួលបន្ទុកដេប៉ូចែកចាយស្រាបៀរ ម្នាក់នៅខេត្តព្រះសីហនុ សុំមិនបញ្ចេញឈ្មោះបានឱ្យដឹងថា អ្នករងគ្រោះខាងលើនោះគឺជាក្រុមការងារម៉ៅការរៀបចំតម្លើង ឆាកសម្រាប់ការប្រគំតន្ត្រីផ្សព្វផ្សាយពាណិជ្ជកម្មស្រាបៀរ ដែលរៀបចំធ្វើឡើងរយៈពេល៥ថ្ងៃ ដែលក្រុមការងារខាងលើបានបំពេញភារកិច្ចក្នុងការរៀបចំឱ្យ ក្រុមហ៊ុន ។ ដោយពួកគេគិតថានៅថ្ងៃបញ្ចប់ការងារហើយ នឹងវិលត្រឡប់ទៅរាជធានីភ្នំពេញវិញ ក៏បបួលគ្នាទៅកម្សាន្តលេងនៅឆ្នេរសមុទ្រអូរឈើទាល មិនតែប៉ុណ្ណោះពួកគេបានផឹកស៊ីរួមគ្នាយ៉ាងសប្បាយនៅឯឆ្នេរ សមុទ្រ ។ លុះជិតដល់ម៉ោងធ្វើការក៏នាំគ្នាបើករថយន្តវិលត្រឡប់មក កាន់កន្លែងធ្វើការវិញ ក៏ជួបប្រទះហេតុការណ៍នេះតែម្តង ។
នៅ កន្លែងកើតហេតុ អ្នកខ្លះនាំគ្នានិយាយរិះគន់ថា មកពីអ្នកបើកបរផឹកស្រវឹងជោកជាំទៅ ដោយអំណាចទឹកប្តូរនិស្ស័យ ទើបបានជាភ្លេចជាន់ហ្វ្រាំង ទៅជាន់ប៉ះចំហ្គារបន្ថែមល្បឿន ទើបបណ្តាលឱ្យរថយន្តបោលទៅជល់នឹងដើមគគីរស្ទើរបាក់ដាច់ យ៉ាងដូច្នេះ ។
នៅក្នុងហេតុការណ៍ខាងលើនេះ ក៏បណ្តាលឱ្យម្ចាស់រថយន្តមួយគ្រឿងផ្សេងទៀតម៉ាក CRV ពណ៌ទឹកប្រាក់ ពាក់ស្លាកលេខព្រះសីហនុ ២A-៣៥២៥ ដែលនិយមចូលទៅកាត់សក់ និងកោរពុកមាត់នៅហាងមួយកន្លែងក្បែរកន្លែងកើតហេតុ ក៏ត្រូវរងការខូចខាតមួយចំនួន ដោយសារតែកម្ទេចរថយន្តបង្កហេតុនោះផ្លាតទៅប៉ះធ្វើឱ្យបែក កញ្ចក់មួយផ្ទាំងផ្នែកចំហៀងខាងក្រោយដែលបង្កឱ្យម្ចាស់រថយន្ត ហួសចិត្តស្ទើរនិយាយលែងចេញ ។ ក្រោយពេលកើតហេតុ រថយន្តបង្កត្រូវសមត្ថកិច្ចការិយាល័យចរាចរផ្លូវគោកនៃស្នង ការដ្ឋាននគរបាលខេត្តព្រះសីហនុយកទៅរក្សាទុកដើម្បីដោះស្រាយ ទៅតាមផ្លូវច្បាប់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]