រាជធានីភ្នំពេញ ៖ រថយន្តឡិចស៊ីស៤៧០ពណ៌ខ្មៅមួយគ្រឿង បើកលឿនទៅបុករថយន្តកូរ៉ូឡា ពណ៌ស្លែ ចំទទឹងរថយន្តលាន់ដូចរន្ទះបណ្តាលឱ្យក្រពឹតមួយចំហៀងខាង ស្តាំខ្ទាត ទៅបុកស៊ុមទ្វារផ្ទះសម្អាងការស៊ីវិល័យ ហើយអ្នកបើកបររថយន្តកូរ៉ូឡារងរបួសធ្ងន់ ឯរថយន្តឡិចស៊ីសបើករត់ទៅបាត់ទាំងបែកធុងទឹក ។ គ្រោះថ្នាក់នេះកើតឡើងកាលពីវេលាម៉ោង៩និង៤៥នាទីយប់ថ្ងៃទី ១៤ កក្កដា តាមផ្លូវលេខ១៦៣ កែងផ្លូវលេខ៤៥៦ ក្នុងសង្កាត់ទួលទំពូង១ ខណ្ឌចំការមន ។
ប្រភពព័ត៌មានបានឱ្យដឹងថា មុនពេលកើតហេតុ រថយន្តឡិចស៊ីស៤៧០ ពណ៌ខ្មៅ បើកបរដោយបុរសម្នាក់តាមផ្លូវលេខ៤៥៦ ពីកើតទៅលិច បោះពួយលឿនស្លេវ ចំណែករថយន្តកូរ៉ូឡា ពណ៌ស្លែ បើកបរដោយបុរសម្នាក់តាមផ្លូវលេខ១៦៣ ពីជើងទៅត្បូង ខណៈមកដល់ចំណុចផ្លូវកែងរថយន្តកូរ៉ូឡាបើកឆ្លងផ្លូវ ស្រាប់តែរថយន្តឡិចស៊ីសបោះពួយទៅបុកចំទទឹងរថយន្តកូរ៉ូ ឡាទាំងកំរោលលាន់ដូចគ្រាប់បែកផ្ទុះ បណ្តាលឱ្យរថយន្តកូរ៉ូឡាក្រពឹតមួយចំហៀងខាងស្តាំ រួចខ្ទាតទៅបុកទ្វារផ្ទះសម្អាងការស៊ីវិលល័យធ្វើឱ្យបែក រាយពេញមុខផ្ទះ ឯអ្នកបើកបរបោកផ្ទប់នឹងរថយន្តបែកមុខបែកមាត់រងរបួស ធ្ងន់ ។ ចំណែករថយន្តឡិចស៊ីសបន្ទាប់ពីបុករថយន្តកូរ៉ូឡាខ្ទាត ប្រមាណ១០ម៉ែត្រ ក៏បើករត់គេចទាំងរថយន្តបែកធុងទឹកហូរតាមផ្លូវបាត់ស្រមោល ។
ក្រោយពេលកើតហេតុ អ្នកបើករថយន្តកូរ៉ូឡាដែលរងរបួសបានហៅរ៉ឺម៉កម៉ូតូដឹកទៅ ព្យាបាលនៅមន្ទីរពេទ្យមិត្តភាពខ្មែរ-សូវៀត ។ ចំណែករថយន្តក្រពឹតមួយចំហៀងខាងស្តាំ ត្រូវសមត្ថកិច្ចយកទៅរក្សាទុកនៅការិយាល័យនគរបាលចរាចរ ផ្លូវគោក និងស្រាវជ្រាវតាមរករថយន្តឡិចស៊ីសយកមកដោះស្រាយតាម ច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]