ខេត្តតាកែវ ៖ យប់ថ្ងៃទី១៣ កក្កដា វេលាម៉ោង៣និង៣៥នាទីទៀបភ្លឺ មានករណីគ្រោះថ្នាក់ចរាចរណ៍មួយកើតឡើងតាមបណ្តោយផ្លូវជាតិលេខ១៣២A ចន្លោះបង្គោលគីឡូម៉ែត្រលេខ១២-១៣ ចំណុចភូមិត្រពាំងស្វាយ ឃុំត្រពាំងធំខាងជើង ស្រុកត្រាំកក់ រវាងរ៉ឺម៉កម៉ូតូ និងសេ១២៥ ជិះបញ្ច្រាសទិសគ្នាបណ្តាលឱ្យស្លាប់មនុស្ស៤នាក់នៅនឹងកន្លែង ឯ២នាក់ទៀតរបួសធ្ងន់ធ្ងរដឹកយកមកព្យាបាលនៅមន្ទីរពេទ្យបង្អែកអង្គរកា ។
តាមការឱ្យដឹងពីលោក ឡាយ វ៉ាវ (អតីតនាយកសាលាមង្គលមានលក្ខណ៍ចូលនិវត្តន៍ ដែលមានទីលំនៅក្បែរកន្លែងកើតហេតុបាននិយាយថា ម៉ូូតូឌ្រីម សេ១២៥ ស៊េរី២០០៤ ឡើងស៊េរី២០១២ ដែលជិះគ្នា៤នាក់ធ្វើដំណើរពីលិចទៅកើត ឯរ៉ឺម៉កម៉ូតូមានគ្នា២នាក់ធ្វើដំណើរពីខាងកើតទៅលិច បានបុកគ្នាចំពីមុខលាន់ដូចរន្ទះ និងឮសូរស្រែកអូយមួយមាត់ក៏បាត់មាត់ឈឹងតែម្តង ។ ពេលនោះគាត់ និងបងប្អូននាំគ្នាយកពិលទៅចុចបញ្ចាំងមើលឃើញដេកស្តូកនៅលើថ្នល់ចំនួន៥នាក់ និងម្នាក់ទៀតខ្ទាតទៅក្នុងប្រឡាយទឹកខាងត្បូងផ្លូវ សរុប៦នាក់ ក្នុងនោះស្លាប់នៅនឹងកន្លែងចំនួន៤នាក់ ។ ក្រោយពេលឃើញហេតុការណ៍ដ៏ធ្ងន់ធ្ងរបែបនេះ លោកគ្រូបានទំនាក់ទំនងទៅប៉ូលិសប៉ុស្តិ៍ឃុំត្រពាំងធំខាងជើង និងទូរស័ព្ទទៅប៉ូលិសស្រុកត្រាំកក់ ហើយទាក់ទងហៅរថយន្តសង្គ្រោះមកដឹកអ្នករបួសពីរនាក់ដែលនៅមានដង្ហើមយកទៅកាន់មន្ទីរពេទ្យបង្អែកអង្គរកា ។
តាមសម្តីលោក ឃី វណ្ណា អធិការរងស្រុកត្រាំកក់ទទួលបន្ទុកសណ្តាប់ធ្នាប់ចរាចរណ៍ជើងគោកបានស្រាវជ្រាវរកគ្រួសារ និងជួយធ្វើចរាចរណ៍នៅកន្លែងកើតហេតុ ហើយលោកបាននិយាយថា ម៉ូតូម៉ាកហុងដាឌ្រីមសេ១២៥ពណ៌ខ្មៅ ពាក់ស្លាកលេខកំពត ១A-៨៧៣៣ បើកបរដោយឈ្មោះឡេន សំណាង ភេទប្រុស អាយុ២៥ឆ្នាំស្លាប់នៅកន្លែងកើតហេតុជាប់ជាមួយម៉ូតូ រស់នៅភូមត្រពាំងខ្ចៅ ឃុំអូរសារ៉ាយ ស្រុកត្រាំកក់ ខេត្តតាកែវ ២-ឈ្មោះ ឡេន លួន ភេទប្រុស អាយុ២៦ឆ្នាំ នៅភូមិបឹងសាទង ឃុំអូរសារ៉ាយ ស្រុកត្រាំកក់ ស្លាប់ នៅចំកណ្តាលទ្រូងថ្នល់ ៣-ឈ្មោះឡាច ចាន់ធី ភេទប្រុស អាយុ៣០ឆ្នាំ រស់នៅភូមិត្រពាំងខ្ចៅ ឃុំអូរសារ៉ាយ ស្រុកត្រាំកក់ ស្លាប់ដោយខ្ទាតធ្លាក់ផុតពីថ្នល់ចូលក្នុងប្រឡាយគ្មានទឹកដក់ និង៤-ឈ្មោះ នេន ហ៊ីម ភេទប្រុស អាយុ២៥ឆ្នាំ នៅភូមិត្រពាំងខ្ចៅ រងរបួសធ្ងន់ ។
ចំណែករ៉ឺម៉កម៉ូតូមានគ្នា២នាក់ ជាជាងកាត់កញ្ចក់ ជិះម៉ូតូសង់កូរ៉េ ពណ៌ក្រហម គ្មានពាក់ស្លាកលេខបើកបរដោយឈ្មោះស៊ឹម សារុំ ភេទប្រុស អាយុ២១ឆ្នាំ នៅភូមិពោធិ៍ដុះ ឃុំត្រពាំងធំខាងជើង ស្លាប់នៅកន្លែង អ្នករួមដំណើរឈ្មោះទៀង តុលា ភេទប្រុស អាយុ២២ឆ្នាំ នៅភូមិពោធិ៍ដុះ ឃុំត្រពាំងធំខាងជើង ស្រុងត្រាំកក់ ខេត្តតាកែវ រងរបួសធ្ងន់ ។
លោកឃី វណ្ណា អធិការរងស្រុកត្រាំកក់បានគូសបញ្ជាក់ថា ម៉ូតូសេ១២៥ បើកមកពីទិសខាងលិច ដែលជិះគ្នាបួននាក់ គ្មានពាក់មួកសុវត្ថិភាព ហើយវ៉ារថយន្តមួយគ្រឿងក្នុងល្បឿនលឿនបានមកបុករ៉ឺម៉កម៉ូតូ ដោយគ្មានអំពូលភ្លើងបំភ្លឺផ្លូវមានតែភ្លើងក្បាលពិលបំភ្លឺប៉ុណ្ណោះ ទំនងមើលមិនច្បាស់ ឬពុំចាប់អារម្មណ៍ ទើបបើកបុកបណ្តាលឱ្យស្លាប់ និងរបួសរដូករណែលពេញថ្នល់បែបនេះ ។
លោកអធិការរងទទួលបន្ទុកចរាចរណ៍ស្រុកត្រាំកក់បានសំណូមពរសុំឱ្យប្រជាពលរដ្ឋដែលធ្វើដំណើរតាមដងផ្លូវនានាក្នុងពេលយប់ក្តី ថ្ងៃក្តីសុំឱ្យពាក់មួកសុវត្ថិភាពឱ្យបានគ្រប់ៗគ្នា និងយានយន្តត្រូវមានភ្លើងស្តុប ស៊ីញ៉ូ ឆ្វេងស្តាំ ភ្លើងបំភ្លឺផ្លូវឱ្យបានគ្រប់គ្រាន់ដើម្បីចៀសវាងគ្រោះថ្នាក់ដែលកើតមានឡើងជាយថាហេតុ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]