ខេត្តកំពង់ឆ្នាំង ៖ បុរសវ័យ៨០ឆ្នាំម្នាក់រួមដំណើរជាមួយក្មួយប្រុសម្នាក់ផង កាលពីព្រឹកថ្ងៃទី១២ កក្កដា បានមកកាន់ការិយាល័យសិទ្ធិមនុស្សអាដហុកខេត្ត ដើម្បីឱ្យជួយរកកូនស្រីដែលចេញទៅធ្វើការនៅប្រទេសម៉ាឡេស៊ី រយៈពេលជាង២ឆ្នាំហើយមិនឃើញត្រឡប់មកវិញសោះ សូម្បីតែដំណឹងក៏គ្មាន ឯខាងក្រុមហ៊ុនទូរស័ព្ទប្រាប់ថា នាងបានរត់ចេញពីផ្ទះថៅកែបាត់ខ្លួនយូរណាស់មកហើយ ។
នៅចំពោះមុខមន្រ្តីសិទ្ធិមនុស្សអាដហុក បុរសវ័យចំណាស់ក្នុងទឹកមុខពេញដោយទុក្ខព្រួយ ស្បែកជ្រីវជ្រួញ ថ្ពាល់ខូង ដោយសារគ្មានធ្មេញទប់ បាននិយាយរៀបរាប់ថា រូបគាត់ឈ្មោះឆាយ អូន មានទីលំនៅភូមិអូររូង ឃុំជ្រៃបាក់ ស្រុករលាប្អៀរ ។ កូនស្រីគាត់ដែលទៅធ្វើការនៅប្រទេសមា៉ឡេស៊ី ហើយបាត់ដំណឹងនោះឈ្មោះឆាយ អ៊ីម អាយុ ៣២ឆ្នាំ។ កូនស្រីគាត់បានចេញពីផ្ទះទៅរស់នៅក្នុងក្រុមហ៊ុនថបមែនផៅវ័រ នៅក្នុងខែវិច្ឆិកា ឆ្នាំ២០០៩ ហើយឡើងយន្តហោះទៅធ្វើការនៅប្រទេសម៉ាឡេស៊ី នៅថ្ងៃទី៦ កុម្ភៈ ឆ្នាំ២០១០។ ក្រោយពីទៅរស់នៅប្រទេសមា៉ឡេស៊ី បាន៣ខែនាងទូរស័ព្ទមកប្រាប់ថា នាងសុខសប្បាយទេ ប៉ុន្តែចាប់តាំងពីពេលនោះមកក៏បាត់ដំណឹងឈឹងតែម្តង ។
លោកតាវ័យ៨០ឆ្នាំរូបនេះបន្តថា ក្រោយមកគាត់បានទូរស័ព្ទទៅក្រុមហ៊ុន ហើយត្រូវឈ្មោះហ៊ាង សុខលី តំណាងក្រុមហ៊ុនប្រាប់គាត់ថា កូនស្រីគាត់បានរត់ចេញពីផ្ទះថៅកែតាំងពីនាងទៅរស់នៅជាមួយថៅកែបាន ១០ខែម៉្លេះ ដោយចោទកូនស្រីគាត់ថា មានសង្សារ ហើយរត់ចេញពីផ្ទះថៅកែដែលពេលនេះខាងក្រុមហ៊ុនបានប្តឹងប៉ូលិសម៉ាឡេស៊ី រួចហើយដើម្បីឱ្យជួយរកនាង ។ លោកតាបន្តថា មកដល់ពេលនេះមានរយៈពេល២ឆ្នាំកន្លះហើយដែលកូនស្រីគាត់បាន បាត់ខ្លួននៅប្រទេសម៉ាឡេស៊ី ហើយចាប់តាំងពីពេលចេញទៅនាងមិនដែលបានផ្ញើលុយកាក់មកគាត់សោះ ។ សព្វថ្ងៃនេះគាត់ចាស់ជរារស់នៅ២នាក់ប្រពន្ធ ឈ្មោះសោម យឿន អាយុ៧៨ឆ្នាំ ទទួលបន្ទុកចិញ្ចឹមចៅ៧នាក់ថែមទៀត ដែលចៅធំបង្អស់អាយុ១៣ឆ្នាំ និងចៅតូចបង្អស់អាយុ៣ឆ្នាំ។
លោកតាបន្តទៀតថា ក្នុងចំណោមចៅទាំង៧នាក់ មានចៅ៣នាក់ជាកូនរបស់ឈ្មោះឆាយ អុីម ដែលបាត់ខ្លួននៅប្រទេសម៉ាឡេស៊ី ចំណែកចៅ៤នាក់ទៀតគឺជាកូនរបស់ឈ្មោះឆាយ ញ៉ អាយុ៤៥ឆ្នាំ ជាកូនស្រីគាត់ដែលបានបាត់ខ្លួននៅប្រទេសថៃពេលនាងទៅធ្វើការមិន ស្របច្បាប់ ។
លោកសំ ចាន់គា មន្រ្តីសិទ្ធិមនុស្សអាដហុក និយាយថា បន្ទាប់ពីបានទទួលបណ្តឹងនេះលោកនឹងដាក់ជូនក្រសួងមហាផ្ទៃដើម្បីឱ្យ ជួយរកពលការិនីដែលបាត់ខ្លួននេះ ។ កន្លងមកក្រោយពីទទួលបណ្តឹងពីពលការិនីដែលបាត់ខ្លួន ក្រសួងមហាផ្ទៃបានស្រាវជ្រាវជួយរកឃើញ និងបានត្រឡប់មកស្រុកវិញខ្លះៗហើយដែរ ។ លោកបានបញ្ជាក់ថា មកដល់ពេលនេះការិយាល័យរបស់លោកបានទទួលពាក្យបណ្តឹងជាច្រើនស្តីពី ការបាត់ខ្លួនពលការិនីនេះ ចំណែកឯបណ្តឹងស្តីពីការធ្វើទារុណកម្មរបស់ថោកែម៉ាឡេស៊ីមកលើពលការិនី រហូតមានស្លាកស្នាមក៏មានច្រើនដែរ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]