ខេត្តកំពង់ចាម ៖ ស្រ្តីម្នាក់បានស្លាប់ភ្លាមៗ និងមនុស្ស៣នាក់ទៀតរងរបួសក្នុងគ្រោះថ្នាក់ចរាចរណ៍មួយបង្កដោយរថយន្តម៉ាកហ៊ីយ៉ាន់ដាយ ពណ៌ខៀវ មួយគ្រឿង ចំណុះ១តោនកន្លះ បុករះដោយសារតែជាន់ហ្វ្រាំងមិនស៊ី ។ ឧប្បត្តិហេតុនេះបានកើតឡើង កាលពីវេលាម៉ោង១២ថ្ងៃត្រង់ ថ្ងៃទី១១ កក្កដា នៅលើកំណាត់ផ្លូវជាតិលេខ៧ ក្នុងភូមិអំពិលលើ ឃុំអំពិល ស្រុកកំពង់សៀម ហើយភ្លាមៗនោះ អ្នកបើករថយន្តបម្រុងនឹងរត់គេចខ្លួនក៏ត្រូវបានអ្នកឃើញហេតុការណ៍ចាប់ឃាត់ខ្លួនប្រគល់ឱ្យសមត្ថកិច្ច ។
បើតាមបុរសឈ្មោះ កន ជាង ហៅសីហា អាយុ៣៥ឆ្នាំ ជាអ្នកបើករ៉ឺម៉កម៉ូតូ រស់នៅភូមិមុខទឹក ឃុំអូរស្វាយ ស្រុកកំពង់សៀម ប្រាប់ឱ្យដឹងថា គាត់បានបើករ៉ឺម៉កម៉ូតូចេញពីផ្សារបឹងកុក ដឹកមនុស្សជាង១០នាក់ ឆ្ពោះទៅព្រៃទទឹង ស្រុកព្រៃឈរ ស្របពេលមកដល់ជិតរោងចក្រកាត់ដេរ ស្រុកកំពង់សៀម ស្រាប់តែរ៉ឺម៉កបែកកង់ក៏ឈប់ដើម្បីដោះកង់យកទៅឱ្យជាងប៉ះឱ្យ ។ លុះពេលកំពុងឱនដោះកង់ចេញ ក៏ស្រាប់តែមានរថយន្តដឹកខ្សាច់មួយគ្រឿង បើកពីកើតទៅលិច ហាក់ដូចជាបាត់ម្ចាស់ការបានបុកម៉ូតូមួយគ្រឿង ដែលជិះស្របទិសគ្នាបណ្តាលឱ្យស្រ្តីម្នាក់ស្លាប់ ហើយរថយន្តនោះបានជ្រុលមកបុករ៉ឺម៉កម៉ូតូគាត់ពីក្រោយពេញទំហឹងតែម្តង ។ នេះសំណាងល្អដែលអ្នកជិះបាននាំគ្នាចុះទៅអង្គុយនៅក្រោមដើមឈើ ប៉ុន្តែរថយន្តក៏ជ្រុលទៅបុកអ្នកអង្គុយក្រោមដើមឈើនោះឱ្យរបួស៣នាក់ផងដែរ ។ ក្រោយពេលកើតហេតុអ្នកបើករថយន្តបម្រុងបើកទ្វាររត់គេចខ្លួនតែគាត់បានស្ទុះទៅចាប់ក្របួចកអាវជាប់ ប្រគល់ឱ្យសមត្ថកិច្ចតែម្តង ។
លោកវរសេនីយ៍ត្រី បា៉ក ជាតិ អធិការនគរបាលស្រុកកំពង់សៀម បានឱ្យដឹងថា ស្រ្តីដែលត្រូវរថយន្តដឹកខ្សាច់បុកស្លាប់នោះ ឈ្មោះ ផល សុភាព អាយុ២៨ឆ្នាំ រស់នៅភូមិប្រសំ ឃុំរអាង ស្រុកកំពង់សៀមជាប្រពន្ធរបស់មន្ត្រីនគរបាលស្រុកកំពង់សៀម ហើយរថយន្តបានជ្រុលទៅបុកអ្នកជិះរ៉ឺម៉កម៉ូតូ ដែលកំពុងអង្គុយនៅក្រោម ដើមឈើរងរបួស៣នាក់ទៀត ។ អ្នកស្លាប់ត្រូវបានរថយន្តសាមុយរបស់មន្ទីរពេទ្យ៧D ដឹកយកទៅផ្ទះរៀបចំធ្វើបុណ្យតាមប្រពៃណី ។ អ្នកបើកបររថយន្តឈ្មោះ សេង រុណ ភេទប្រុស អាយុ៤៣ឆ្នាំ រស់នៅភូមិថ្នល់ជាតិ ឃុំបារាយណ៍ ស្រុកបារាយណ៍ ខេត្តកំពង់ធំ ។
ចំពោះមូលហេតុដែលបណ្តាលឱ្យបុកស្ត្រីម្នាក់រហូតដល់ស្លាប់នេះ គឺដោយសារតែបញ្ហាបច្ចេកទេសហ្វ្រាំងរថយន្តមិនស៊ី សូម្បីតែនៅពេលដែលបើករថយន្តបង្កនេះយកទៅទុកនៅអធិការដ្ឋាននគរបាលស្រុកកំពង់សៀមពេលជាន់ហ្វ្រាំងក៏មិនស៊ីដែរ ។ នេះអាចជាការធ្វេសប្រហែសរបស់អ្នកបើកបរដែលមុនពេលចេញដំណើរមិនបានត្រួតពិនិត្យឱ្យបានគ្រប់ដូចជា ហ្វ្រាំង សម្បកកង់ ជាដើម ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
