រាជធានីភ្នំពេញ ៖ សិស្សសាលាអន្តរជាតិអង្គរបូរីម្នាក់ត្រូវបានក្រុមក្មេងស្ទាវមាន គ្នាប្រហែល១០នាក់ជិះម៉ូតូ៥គ្រឿង ព្រួតគ្នាវាយទៅលើម៉ូតូម៉ាកឌ្រីមសេ១២៥ ស៊េរី២០១១ ពណ៌ខ្មៅ របស់គេ ខណៈពេលទៅរៀន រួចយកម៉ូតូទៅផ្ញើ ។ ហេតុការណ៍នេះកើតឡើងកាលពីវេលាម៉ោង៧និង៤នាទីយប់ថ្ងៃទី១០ កក្កដា ២០១២ តាមបណ្តោយផ្លូវលេខ២៧១ ក្នុងសង្កាត់ទឹកល្អក់៣ ខណ្ឌទួលគោក ។
គួរបញ្ជាក់ថា នេះជាលើកទី២ហើយដែលមានក្រុមក្មេងស្ទាវនាំគ្នាមកព្រួតវាយ ម៉ូតូរបស់សិស្សសាលា តែចៃដន្យលើកនេះត្រូវសមត្ថកិច្ចប៉ូលិសក្របួចជាប់ បានម្នាក់ក្នុងចំណោម១០នាក់ គឺឈ្មោះមឿន មុន្នី ភេទប្រុស អាយុ១៩ឆ្នាំ ជាសិស្សសាលាឯកជនមួយ ថ្នាក់ទី១១ ស្នាក់នៅសង្កាត់ស្ទឹងមានជ័យ ខណ្ឌមានជ័យ ។
យុវសិស្សដែលត្រូវក្មេងស្ទាវព្រួតវាយម៉ូតូ នោះប្រាប់ឱ្យដឹងថា ខ្លួនឈ្មោះប៉ាត់ ឧត្តម អាយុ២៣ឆ្នាំ ជាសិស្សសាលាអន្តរជាតិអង្គរបូរី ស្នាក់នៅសង្កាត់បឹងសាឡាង ខណ្ឌ ទួលគោក ។ មុនពេលកើតហេតុខ្លួនបានយកម៉ូតូទៅផ្ញើនៅក្នុងបរិវេណសាលា ហើយក៏ចូលទៅរៀន តែមិនទាន់បានប៉ុន្មានផង ក៏ត្រូវសន្តិសុខយាមម៉ូតូទៅប្រាប់ថា មានក្រុមក្មេងស្ទាវ១០នាក់ជិះម៉ូតូ៥គ្រឿងសុទ្ធតែស៊េរីទំនើប បានចុះមកព្រួតវាយម៉ូតូរបស់ខ្លួន បណ្តាលឱ្យរងការខូចខាតជាដំណំ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
