ខេត្តក្រចេះ ៖ បុរសម្នាក់ដែលក្រុមគ្រួសារអះអាងថា មានសតិមិនប្រក្រតី ត្រូវបានកម្លាំងនគរបាលអធិការស្រុកស្នួល តាមចាប់ខ្លួនបានកាលពីថ្ងៃទី៩ កក្កដា ២០១២ ក្រោយពីជនដៃដល់ម្នាក់នេះប្រដាប់ដោយពូថៅបានកាប់ទៅលើស្ត្រី ជាប្រពន្ធជាច្រើនពូថៅ បណ្តាលឱ្យស្លាប់ក្នុងថ្លុកឈាមនៅនឹងកន្លែង ហើយក៏រត់គេចពី ការតាមប្រមាញ់របស់នគរបាល និងបន្តកាប់មនុស្សម្នាក្នុងភូមិពីរនាក់ផ្សេងទៀត បណ្តាលឱ្យរបួសយ៉ាងដំណំរៀងខ្លួន ។
បុរសជាប់ចោទរូបនេះឈ្មោះត្រៀម ជីវ ហៅជាវ អាយុ៣៤ឆ្នាំ មានទីលំនៅចំណុចអូរលុង ភូមិស្អាត ឃុំស្រែចារ ស្រុកស្នួល។ ចំណែកឯស្ត្រីជាប្រពន្ធឈ្មោះមិន សារិន អាយុ២៥ឆ្នាំ ត្រូវបុរសជាប្តីកាប់ចំនួន៤ពូថៅ ត្រូវចំក្បាលគុម្ពត្រចៀក និងមុខស្លាប់ភ្លាមមួយរំពេចនៅលើផ្ទះ។
មន្ត្រីនគរបាលនៃការិយាល័យព្រហ្មទណ្ឌកម្រិត ធ្ងន់ខេត្តបានឱ្យដឹងថា កាលពីរសៀលថ្ងៃទី៨ កក្កដា ខណៈពេលស្ត្រីជាប្រពន្ធត្រឡប់មកពីផ្ទះឪពុកវិញ បុរសជាប្តីក៏យកកូនតូចពីដៃប្រពន្ធមកពលេង រួចក៏ហុចកូនទៅឱ្យប្រពន្ធវិញ តែស្ត្រីជាប្រពន្ធមិនប្រយ័ត្នក៏របូតដៃធ្លាក់កូនពីរដៃ ។ ភ្លាមនោះបុរសជាប្តីបានស្ទុះទៅទាញពូថៅនៅលើគ្រែ កាប់មកលើស្ត្រីជាប្រពន្ធចំនួន៤ពូថៅ បណ្តាលឱ្យដាច់ខ្យល់ស្លាប់មួយរំពេច ។
ប៉ូលិសបានឱ្យដឹងទៀតថា ក្រោយពីកាប់សម្លាប់ប្រពន្ធរួច ជនដៃដល់បម្រុងស្ទុះទៅកាប់កូនតូចនោះទៀត តែត្រូវបានគេជួយទាន់ ។ ក្រោយពីបង្កហេតុជនដៃដល់ប្រដាប់ដោយពូថៅបានរត់ទៅខាងត្បូងភូមិ ហើយពេលរត់ទៅដល់ភ្លឺស្រែក៏ជួបបុរសម្នាក់ឈ្មោះវិត រេវ ដែលកំពុងលើកភ្លឺស្រែក៏ត្រូវជនដៃដល់កាប់មួយពូថៅចំភ្នែក បណ្តាលឱ្យរងរបួសធ្ងន់ដួលផ្កាប់មុខទៅលើដី ។ បន្ទាប់មកជននេះបានរត់បន្តទៅមុខទៀតក៏ជួបនឹងបុរសម្នាក់ទៀត ឈ្មោះតន ប្រោង ដែលកំពុងតែជម្រះស្មៅដំឡូង ក៏ត្រូវជនដៃដល់ស្ទុះកាប់មួយពូថៅចំស្មា រងរបួសធ្ងន់ដូចគ្នា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]