ខេត្តកំពង់ឆ្នាំង ៖ មានការភ្ញាក់ផ្អើលមួយ កាលពីវេលាម៉ោង៤ និង៣០នាទីទៀបភ្លឺ ថ្ងៃទី៨ កក្កដា ដោយសារតែកូនស្រីរបស់ស្រ្តីម្នាក់ បាន រត់ទាំងត្រហេបត្រហបមកប្រាប់ជីដូនដែលពិការភ្នែកទាំងសងខាងថា មានគេចាប់ម្តាយរបស់ខ្លួនដាក់លើម៉ូតូយកទៅបាត់ខណៈដែលម្តាយ និងកូនស្រីទាំងពីរនាក់កំពុងដើររើសត្នោតទុំនៅចម្ងាយប្រមាណ២០០ម៉ែត្រ ខាងក្រោយផ្ទះ។
លោកជាង សុវណ្ណរិទ្ឋ អធិការនគរបាលស្រុកបរិបូណ៌ថ្លែងថា ហេតុការណ៍ភ្ញាក់ផ្អើលនេះកើតមាននៅភូមិភ្នៀត ឃុំផ្សារ ស្រុកបរិបូណ៌ ប៉ុន្តែលោកមិនទាន់ជឿថាមានគេមកចាប់មនុស្សឆៅៗបានស្រួលបែបនេះទេ ទោះជាយ៉ាងណាលោកទទួលស្គាល់ថាស្ត្រីរូបនោះ ពិតជាបាត់ខ្លួនពីផ្ទះពិតមែន ។ លោកបន្តថា ស្ត្រីរូបនោះឈ្មោះ លី គឹមអេង អាយុ ៣៥ឆ្នាំ ជាស្ត្រីមេម៉ាយមានកូន៣នាក់ និងមានទីលំនៅក្នុងភូមិភ្នៀត ។ លោកបានដកស្រង់សម្តីរបស់កុមារី ផាន សុភី អាយុ១៤ឆ្នាំ ដែលជាកូនស្រីរបស់ស្រ្តីរូបនោះថា មុនពេលកើតហេតុ នាងនិងម្តាយបានទៅដើររើសត្នោតទុំនៅក្រោយផ្ទះដូចសព្វដង ។ ប៉ុន្តែនៅថ្ងៃនោះ ពេលនាងនិងម្តាយកំពុងរើសត្នោតទុំ ស្រាប់តែមានមនុស្សប្រុស២នាក់ ម្នាក់នៅចាំលើម៉ូតូ និងម្នាក់ទៀតស្ទុះមកចាប់ម្តាយនាងដាក់លើម៉ូតូ រួចបើកគេចចេញទៅបាត់តែម្តង ដោយមិនបានធ្វើអ្វីមកលើរូបនាងឡើយ ហើយនាងក៏បានរត់មកប្រាប់ជីដូននៅឯផ្ទះទើបមានការ
ឆោឡោឡើង ។
លោកអធិការ នគរបាលស្រុកបន្តថា ការចាប់មនុស្សម្នាក់ដាក់លើម៉ូតូបែបនេះមិនមែនជាការស្រួលៗទេ ហើយក្រោយពីបានទទួលដំណឹងនេះ លោកក៏បានដឹកនាំកម្លាំងចុះស្រាវជ្រាវដល់កន្លែងកើតហេតុ តែគ្មានបន្សល់ទុកនូវអ្វីដែលគួរសង្ស័យឡើយ ។ លោកបានបញ្ចាក់ពីប្រវត្តិខ្លះៗរបស់ស្ត្រីរូបនោះថា នាងជាស្រ្តីមេម៉ាយ ហើយកាលពីពេលមុនកើតហេតុធ្លាប់បានពង្រត់បុរសម្នាក់ដែល មានប្រពន្ឋកូនលែងគ្នាមិនទាន់ដាច់ស្រេចទៅស្រុកវាលវែង ខេត្តពោធិ៍សាត់ បាត់ជាង៣ខែ ទើបត្រឡប់មកវិញ ។ ប៉ុន្តែពេលមកដល់ស្រុកប្រហែលជាមានបញ្ហាអ្វី ទើបស្រ្តីរូបនោះដាក់ពាក្យប្តឹងបុរសរូបនោះ ដែលសំណុំរឿងនេះនៅមិនចប់នៅឡើយទេ ព្រោះតែបុរសរូបនោះមិនចូលខ្លួនមកដោះស្រាយ ហើយមិនត្រឹមតែប៉ុណ្ណោះបុរសរូបនោះនៅបានបោះពាក្យសម្តីថា គេនឹងយកស្ត្រីរូបនោះមកធ្វើជាប្រពន្ឋឱ្យខាងតែបាន។
លោកអធិការបានបន្តដែរថា មុនពេលកើតហេតុនេះ គេបានឃើញបុរសរូបនោះមានវត្តមាននៅក្នុងស្រុកភូមិ២ថ្ងៃហើយក៏បាត់ខ្លួន ទៅវិញ ស្របពេលជាមួយនឹងមានករណីផ្ទុះរឿងចាប់មនុស្សដាក់លើម៉ូតូនេះ ។ ទោះបីជាបែបនេះក្តី លោកកំពុងស្រាវជ្រាវករណីខាងលើនេះ ព្រោះខ្លាចមានអំពើអ្វីផ្សេងទៀតកើតឡើង។
សូមបញ្ជាក់ថា កូន៣នាក់របស់ស្រ្តីរូបនេះកំពុងរស់នៅជាមួយជីដូនពិការភ្នែកទាំងសងខាង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]