រាជធានីភ្នំពេញ ៖ ដោយសារខឹងប្តីពូកែផឹកស្រារៀងរាល់ថ្ងៃ និងចង់ឱ្យប្តីឈប់ផឹកតទៅទៀត ប្រពន្ធក៏ទៅឱ្យពេទ្យផ្សំថ្នាំលេបឱ្យប្តីឈប់ផឹក ហើយអ្នកផ្សំថ្នាំនិយាយថា បើលេបថ្នាំដែលផ្សំនេះហើយហាមផ្តាច់មិនឱ្យផឹកស្រាទៀតទេ ។ ផ្ទុយទៅវិញ ពេលលេបថ្នាំរួចហើយប្តីក៏ផឹកស្រាអស់មួយកែវ ធ្វើឱ្យក្អួតប្រកាច់បែកប្រមាត់ថ្លាន់ស្ទើរស្លាប់ស្ទើររស់ ដែលហេតុការណ៍នេះកើតឡើងកាលពីវេលាម៉ោង៨និង៤០នាទីយប់ ថ្ងៃទី៨ កក្កដា នៅក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ ។
បើតាមស្ត្រីជាប្រពន្ធប្រាប់ថា ប្តីគាត់ដែលចូលចិត្តផឹកស្រា និងស្រវឹងជារៀងរាល់ថ្ងៃនេះឈ្មោះ ខាន់ ឌី អាយុ៤៧ឆ្នាំ ដែលពេលខ្លះស្រវឹងរហូតដេកដួល និងពេលខ្លះជិះម៉ូតូដួលខ្លួនឯងរងរបួសក៏មាន ធ្វើឱ្យគាត់ពិបាករស់នៅជាមួយពេកទើបទៅប្រាប់ពេទ្យឱ្យផ្សំ ថ្នាំលេបទៅឈប់ផឹកស្រាយកមកឱ្យប្តីលេប ។ ពេលគាត់ទិញថ្នាំហើយបានឱ្យពេទ្យកិនឱ្យម៉ដ្ឋលាយចូលគ្នារួច យកទៅឱ្យប្តីផឹកម្តងកន្លះស្លាបព្រាបាយ លុះពេលផឹកថ្នាំហើយប្តីគាត់ក៏ទៅផឹកស្រាអស់មួយកែវ ស្រាប់តែក្អួតប្រកាច់ប្រកិនបែកប្រមាត់ថ្លាន់ស្ទះណែនទ្រូង ថប់ដង្ហើមសន្លប់ ។ ដោយសារឃើញប្តីប្រកាច់បែបនេះភ័យពេក គាត់ក៏ដឹកប្តីយកទៅមន្ទីរពេទ្យព្រះកុសុមៈ ។
ខណៈមកដល់មន្ទីរពេទ្យ គ្រូពេទ្យបានចាក់ថ្នាំបន្សាប និងព្យួរសេរ៉ូមបណ្តេញជាតិពុលចេញពីក្នុងខ្លួន និងបានគ្រាន់បើឡើងវិញ ។ នេះជាបាតុភាពមួយដែលបុគ្គលជាពេទ្យមិនគប្បីចេះតែផ្សំថ្នាំ ផ្តេសផ្តាសឱ្យមនុស្សលេបនោះទេ ហើយនេះសំណាងហើយដែលជនរងគ្រោះមិនធ្ងន់ធ្ងរ ឬក៏ស្លាប់ ។ សួរថា បើសិនជាអ្នកលេប ឬផឹកថ្នាំនោះហើយមានប្រតិកម្មដល់ស្លាប់ តើនរណាជាអ្នកទទួលខុសត្រូវ ?
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]