ខេត្តរតនគិរី ៖ រថយន្តម៉ាកកាមរីគូទស្វិតមួយគ្រឿង បានត្រូវម្ចាស់ដាក់បញ្ចាំនឹងមន្ត្រីប៉ូលិសចរាចរមួយរូបនៃ អធិការដ្ឋានស្រុកអូរយ៉ាដាវ ក្នុងតម្លៃ២លានរៀលរយៈពេលមួយខែ លុះលើសតែមួយថ្ងៃក៏ត្រូវលោកប៉ូលិសរូបនោះស៊ីដាច់ដោយគ្មាន ការយោគយល់ ។
ម្ចាស់រថយន្តដែលចោទប្រកាន់មន្ត្រីប៉ូលិស ចរាចរថា មានបំណងស៊ីដាច់រថយន្តគាត់នោះឈ្មោះ សំ សុខា ភេទប្រុស អាយុ៥៤ឆ្នាំ ជាអ្នកធ្វើចម្ការ រស់នៅភូមិអ៊ុន ឃុំលំជ័រ ស្រុកអូរយ៉ាដាវ មានស្រុកកំណើតនៅ ឃុំអូរម្លូ ស្រុកស្ទឹងត្រង់ ខេត្តកំពង់ចាម ។ លោក សំ សុខា បានរៀបរាប់ថា ដោយសារខ្វះប្រាក់បើកឱ្យកម្មករដែលស៊ីឈ្នួលធ្វើចម្ការឱ្យ គាត់ រូបគាត់ក៏យករថយន្តម៉ាកកាមរីមួយគ្រឿង ពណ៌ស្ករ ស៊េរីឆ្នាំ១៩៨៨ ទៅដាក់បញ្ចាំឱ្យឈ្មោះ សូម សន អាយុប្រហែល៣៨ឆ្នាំ ជនជាតិចារ៉ាយ ជាប៉ូលិសចរាចរនៅអធិការដ្ឋានស្រុកអូរយ៉ាដាវ នៅថ្ងៃទី១ មិថុនា ចំនួន២លានរៀលរយៈពេលមួយខែ ។
នៅពេលដាក់រថយន្តបញ្ចាំ មន្ត្រីប៉ូលិសនោះបានធ្វើលិខិតជាកិច្ចសន្យាដោយមានមន្ត្រី ប៉ូលិសម្នាក់នៅទីនោះធ្វើជាសាក្សី គឺដាក់បញ្ចាំត្រូវបង់ការប្រាក់ចំនួន២ម៉ឺនរៀលក្នុងមួយថ្ងៃ រហូតដល់រយៈពេលមួយខែ បើមិនយកប្រាក់មកលោះរថយន្តវិញទេ គឺរថយន្តនោះត្រូវដាច់ដោយគិតចាប់ពីថ្ងៃទី១ មិថុនា ដល់ថ្ងៃទី១ កក្កដា នឹងត្រូវដាច់ ។ ម្ចាស់រថយន្តរៀបរាប់ទៀតថា ដោយសារគាត់ខ្លាចរថយន្តនោះដាច់ ក៏ទៅខ្ចីប្រាក់គេបានចំនួន២លានរៀល ហើយយកទៅលោះរថយន្តនោះវិញ នៅថ្ងៃទី១៩ មិថុនា ប៉ុន្តែមិនគិតការប្រាក់ទេ ដោយសុំអង្វរមន្ត្រីប៉ូលិសរូបនោះឱ្យគាត់យកតែថ្លៃដើមសិន ឯរថយន្តទុកនៅទីនោះសិនចាំថ្ងៃបង់ការប្រាក់ជាក្រោយទើបគាត់ យករថយន្តចេញវិញ តែមន្ត្រីប៉ូលិសនោះនៅតែមិនព្រម ។
ពេលវេលាចេះតែរំលងរហូតដល់ថ្ងៃទី២ កក្កដា ទើបគាត់មានប្រាក់គ្រប់យកទៅលោះយករថយន្ត និងបង់ការប្រាក់ ស្រាប់តែមន្ត្រីប៉ូលិសនោះប្រាប់ថាផុតកំណត់ហើយមិនអាចយកទៅវិញ បានទេ គឺដាច់ហើយ ។ ទោះជាគាត់សុំអង្វរយ៉ាងណា និងសុំបង់ការប្រាក់ដែលលើសចំនួនពីរថ្ងៃគឺថ្ងៃទី១ កក្កដា និងទី២ កក្កដា នោះក្នុងតម្លៃ៥ម៉ឺនរៀលក្នុងមួយថ្ងៃក៏មន្ត្រីប៉ូលិសនោះមិន ព្រមដែរ ។
ចំពោះករណីនេះ បើទោះបីជាលោក សំ សុខា ជាម្ចាស់រថយន្តប្តឹងទៅលោក ម៉ៅ វិចិត្រ អធិការប៉ូលិសស្រុកឱ្យជួយដោះស្រាយក៏អត់ប្រយោជន៍ដែរ ដោយលោកអធិការប្រាប់ថានិយាយគ្នាឯងទៅ ។ ប្រភពបានឱ្យដឹងថា រថយន្តរបស់លោក សំ សុខា ដែលដាក់បញ្ចាំនោះមន្ត្រីប៉ូលិសឈ្មោះ សូម សន ធ្លាប់និយាយទិញជាច្រើនលើកច្រើនសាមកហើយ តែម្ចាស់រថយន្តចង់លក់តម្លៃ១.៨០០ដុល្លារ ឯមន្ត្រីប៉ូលិសរូបនោះឱ្យត្រឹមតែ១.៤០០ដុល្លារ មិនត្រូវថ្លៃគ្នា ។
ចំណែកលោក សូម សន មន្ត្រីប៉ូលិសចរាចរស្រុកអូរយ៉ាដាវ បានឱ្យដឹងតាមទូរស័ព្ទនៅល្ងាចថ្ងៃទី៧ កក្កដា ថា រថយន្តដែលដាក់បញ្ចាំនោះបានផុតកំណត់ចំនួនពីរថ្ងៃហើយ មិនអាចលោះយកវិញបានទេ ព្រោះមានកិច្ចសន្យារយៈពេល១ខែ បើមិនយកប្រាក់មកលោះនឹងត្រូវដាច់ ។ មន្ត្រីប៉ូលិសរូបនេះបន្តថា លោកពុំមានលិខិតធ្វើអាជីវកម្មរកស៊ីដាក់បញ្ចាំទេ គឺឈ្មោះសំ សុខា បានសុំអង្វរដាក់បញ្ចាំចំនួនពីរលានរៀលដោយខ្លួនឯង ថែមមានមន្ត្រីប៉ូលិសឈ្មោះជ្រូកធ្វើសាក្សីទៀតផង ។
លោក ម៉ា វិចិត្រ អធិការប៉ូលិសស្រុកអូរយ៉ាដាវ បានថ្លែងថា រូបលោកមិនអាចយកអំណាចទៅគាបសង្កត់កូនចៅឱ្យប្រគល់រថយន្តនោះ ឱ្យម្ចាស់វិញបានទេ ព្រោះមានលិខិតបញ្ជាក់ និងសាក្សីច្បាស់លាស់ ហើយតំបន់នោះជាតំបន់ជនជាតិនិយាយម៉ាត់ណាគឺម៉ាត់ហ្នឹងមិនអាច កែប្រែបានទេ សូមឱ្យពួកគាត់សម្រុះសម្រួលគ្នា និងអង្វរករគេទៅ ។
ទោះបីជាបែបណា អ្នកភូមិគ្រប់គ្នាបានរិះគន់ឥរិយាបថមន្ត្រីប៉ូលិសរូបនេះថា មិនគួរមិនមានការលើកលែងនោះទេ ព្រោះការដែលដាក់រថយន្តបញ្ចាំនោះការប្រាក់ថ្លៃណាស់ ហើយមានរយៈពេលខ្លីមិនខុសពីច្របាច់កគេទេ លើសខ្វះបន្តិចបន្តួចគួរលើកលែង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
