ខេត្តកំពង់ចាម ៖ បុរសម្នាក់ឈ្មោះ ហិន ស៊ាប អាយុ៤០ឆ្នាំ រស់នៅភូមិសន្ទៃទី១ ឃុំកក់ ស្រុកពញាក្រែក ត្រូវបានប្រពន្ធកាប់១កាំបិតផ្គាក់ចំកផ្នែកខាងឆ្វេងរយះ ប្រវែងប្រហែល១២សង្ទីម៉ែត្រ ដាច់សរសៃឈាមដូចគេអារ.កមាន់លិចជម្រៅ១ថ្នាំងដៃ ។
អំពើហិង្សានេះបានកើតឡើងកាលពីល្ងាចថ្ងៃទី ៦ កក្កដា ត្រូវបានក្រុមសាច់ញាតិដឹកយកទៅសង្គ្រោះជាបន្ទាន់នៅមន្ទីរ ពេទ្យខេត្ត ។ នៅក្នុងមន្ទីរពេទ្យបុរសរងគ្រោះឈ្មោះ ស៊ាប បានប្រាប់ឱ្យដឹងថា រូបគាត់និងប្រពន្ធឈ្មោះ មឿន តិ អាយុ៣៩ឆ្នាំ បាននាំគ្នាផឹកស្រានៅផ្ទះតៀមលក់ស្រាមួយកន្លែងក្នុងភូមិ អស់ស្រាថ្នាំជាង១លីត្រ ជាហេតុបណ្តាលឱ្យស្រវឹងទាំង២នាក់ ហើយបាននាំគ្នាដើរត្រឡប់មកផ្ទះវិញ ។
បុរសរងគ្រោះដោយប្រពន្ធកាប់ បានប្រាប់បន្តថា ក្នុងពេលដែលចូលមកដល់ក្រោមផ្ទះ គាត់បាននិយាយដំណាលរឿងប្អូនស្រីជីដូនមួយជាស្ត្រីមេម៉ាយម្នាក់ ឈ្មោះ សំ ត្រូវបុរសម្នាក់ឈ្មោះ អ៊ុក រស់នៅភូមិឃុំជាមួយស្រឡាញ់គ្នា ។ ក្នុងពេលនោះប្រពន្ធរបស់ខ្លួនដែលស្រវឹងស្រាទំនងជាស្តាប់ឮមិន សូវច្បាស់ បែរជាកើតរោគប្រចណ្ឌមកលើគាត់ជាប្តី ក៏កើតទៅជារឿងឈ្លោះប្រកែកគ្នា ទៅវិញទៅមកតឹងសរសៃក ។ បន្ទាប់មកគាត់បានដើរទៅប្រាសខ្លួនដេកនៅលើគ្រែ ដោយយកជើងម្ខាងទៅប៉ះនឹងធុងស្តេត្រូដាក់អង្ករជាហេតុបណ្តាលឱ្យ ដួលកំពប់ ខ្ចាយ អស់ ។ ពេលនោះប្រពន្ធដែលមានជម្លោះមិនទាន់ថយកម្តៅផងរឹតតែឆេះដុំ ខឹងសម្បារយ៉ាងខ្លាំងស្ទុះទៅយកកាំបិតផ្គាក់នៅខាងក្រោមផ្ទះ មកកាប់សំដៅ.កប៉ងសម្លាប់ផ្តាច់ជីវិត តែសំណាងល្អត្រូវបានគាត់គេចផុតបន្តិច បណ្តាលឱ្យត្រូវត្រង់កផ្នែកខាងឆ្វេង១កាំបិតដាច់សាច់រយះជិត មួយចង្អាម ឈាមហូរបាញ់ស្រោចពេញខ្លួនប្រាណបណ្តាលឱ្យរងរបួសធ្ងន់ ។
ចំពោះទង្វើរបស់ប្រពន្ធដែលបានបង្កហិង្សាមកលើ រូបគាត់ជាប្តីមិនទាន់សម្រេចចិត្តប្តឹងប្រពន្ធ ឬយ៉ាងណានោះទេ រង់ចាំពិភាក្សាជាមួយនឹងបងប្អូនសិន ។ ស្ត្រីឈ្មោះ អុិត សាវឿន អាយុ៤២ឆ្នាំ ត្រូវជាបងថ្លៃបុរសរងគ្រោះប្រាប់ឱ្យដឹងថា ហិង្សានេះគឺផ្តើមចេញពីស្រវឹងស្រាដូចគ្នាក្រោយពីប្អូនថ្លៃ ឈ្មោះ ស៊ាប ត្រូវរបួស១កាំបិតត្រង់ក ពេលដែលដឹងរឿងនេះក៏ប្រញាប់មកនាំទៅសង្គ្រោះនៅមន្ទីរពេទ្យ ខេត្តជាបន្ទាន់ផងដែរ។
លោក វរសេនីយ៍ត្រី ប្រាក់ ប៊ុនណុន អធិការនគរបាលស្រុកពញាក្រែកប្រាប់ឱ្យដឹងដែរថា អំពើហិង្សាខាងលើនេះរូបលោកមិនបានដឹងនោះទេ ដោយសារតែផ្ទះពីរនាក់ប្តី-ប្រពន្ធនេះនៅឆ្ងាយដាច់ពីគេ ជាកន្លែងស៊ីឈ្នួលចាំចម្ការឱ្យគេ ហើយក៏មិនមានអ្នកណាប្តឹងមកសមត្ថកិច្ចដែរ លុះហេតុការណ៍កើតឡើងហើយទើបដឹង ។
តាមព័ត៌មានថា ទោះបីខ្លួនជាជនដៃដល់ ក៏ស្ត្រីជាប្រពន្ធមិនបានរត់ទៅណាដែរ ។ ប្តី-ប្រពន្ធនេះមានកូន៥នាក់ក្នុងបន្ទុកដែលទំនងបែបប្តីមិន ប្តឹងផ្តល់ទេ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
