រាជធានីភ្នំពេញ ៖ ក្មេងប្រុសម្នាក់បានស្លាប់បាត់បង់ជីវិតភ្លាមៗ និងម្នាក់ទៀតនៅរស់រានមានជីវិតដោយសារគេជួយសង្គ្រោះទាន់ពេល បន្ទាប់ពីពួកគេលេងទាត់បាល់រួចចុះទៅងូតទឹកលេងនៅក្នុងរណ្តៅ ដីមួយកន្លែង រួចក៏លង់កាលពីវេលាម៉ោង៣ និង៤០នាទីរសៀលថ្ងៃទី៨ កក្កដា ឆ្នាំ២០១២ ។
រណ្តៅដីដ៏ជ្រៅមួយនោះមានទីតាំងស្ថិតនៅមុខ វត្តគោកចំបក់ ស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ជាប់ព្រំព្រទល់ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។ ក្មេងប្រុសរងគ្រោះទាំង២នាក់នោះភ្លាមៗមិនទាន់ត្រូវបានគេ ស្គាល់អត្តសញ្ញាណនៅឡើយទេ ដោយពួកគេមានអាយុប្រហែលជាង១០ឆ្នាំ និងមានទីលំនៅម្តុំភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ ។
តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ ក្មេងប្រុសរងគ្រោះទាំង២នាក់បាននាំគ្នាទៅលេងទាត់បាល់នៅក្បែរ ចំណុចកើតហេតុជាមួយនឹងក្មេងៗជាច្រើនទៀត ផងដែរ ។ ក្រោយពេលទាត់បាល់បែកញើសក្តៅពេក ពួកគេបាននាំគ្នាឈប់សម្រាកបន្តិច បន្ទាប់មកបាននាំគ្នាចុះទៅងូតទឹក និងហែលលេងនៅក្នុងរណ្តៅដីខាងលើដែលមានជម្រៅយ៉ាងជ្រៅ និងទឹកពេញព្រៀបរួចក៏លង់ទាំង២នាក់តែម្តង ។ ប្រភពដដែលបានបន្តទៀតថា ខណៈពេលនោះប្រជាពលរដ្ឋនៅជិតនោះប្រទះឃើញក៏បាននាំគ្នាចុះទៅ ស្រង់បានម្នាក់ភ្លាមៗ រួចនាំយកទៅសង្គ្រោះនៅមន្ទីរពេទ្យទើបមិនស្លាប់ ចំណែកឯម្នាក់ទៀតលិចបាត់ទៅក្នុងទឹកប្រជាពលរដ្ឋនាំគ្នារាវរក រយៈពេលយូរទើបប្រទះឃើញពេលស្រង់ឡើងមកគេស្លាប់បាត់ទៅហើយ ។
ប្រជាពលរដ្ឋបាននិយាយថា រណ្តៅមួយនេះគឺឈ្មួញជីកដីលក់ក្នុងពេលកន្លងមកវាមានជម្រៅជ្រៅ ណាស់ សូម្បីមនុស្សចាស់ៗមិនសូវហ៊ានចុះងូតផង ប៉ុន្តែក្មេងប្រុសទាំង២នាក់មិនដឹងទើបនាំគ្នាចុះងូតហើយហែល លេងមួយសន្ទុះក្រោយមកក៏បានលង់ស្លាប់ម្នាក់ ឯម្នាក់ទៀតត្រូវគេជួយសង្គ្រោះទាន់ពេល ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
