រាជធានីភ្នំពេញ ៖ ស្ត្រីខ្មែររូបស្រស់ម្នាក់ និងបុរសជនជាតិកូរ៉េម្នាក់ត្រូវនគរបាលប៉ុស្តិ៍ទន្លេបាសាក់សហការជាមួយការិយាល័យចរាចរខណ្ឌ និងនគរបាលការិយាល័យចរាចរផ្លូវគោករាជធានីភ្នំពេញចាប់ឃាត់ខ្លួន បន្ទាប់ពីពួកគេជិះរថយន្តម៉ាកតាកូម៉ា ពណ៌ទឹកប្រាក់ ពាក់ស្លាកលេខកំពង់ស្ពឺ ២A-៣០២៧ ដោយស្ត្រីជាអ្នកកាន់ចង្កូតបានបើកបុករៈម៉ូតូកង់បីដែលចតស្ងៀម រួចរថយន្តក៏ជ្រុលទៅបុកបង់អង្គុយលេង និងមនុស្ស៤នាក់ដែលអង្គុយនៅលើសួនច្បារ បណ្តាលឱ្យរងរបួសមនុស្ស២នាក់ កាលពីវេលាម៉ោង៣ទៀបភ្លឺថ្ងៃទី៥ កក្កដា នៅ ចំណុចសួនច្បារសម្តេចហ៊ុន សែន ស្ថិតក្នុងសង្កាត់ទន្លេបាសាក់ ខណ្ឌចំការមន ។
ស្ត្រីខ្មែរស្រស់ស្អាតម្នាក់គួរឱ្យកញ្ឆក់អារម្មណ៍ និងបុរសជនជាតិបរទេសខាងលើនេះមិនទាន់ត្រូវបានសមត្ថកិច្ចបង្ហើបឱ្យស្គាល់អត្តសញ្ញាណនៅឡើយទេ ប៉ុន្តែប្រភពព័ត៌មានក្រៅផ្លូវការថា នារីបើករថយន្តខាងលើនេះជាប្អូនមន្ត្រីប៉ូលិសម្នាក់នៅខេត្តកំពង់ស្ពឺ ។ ចំណែកឯអ្នកអង្គុយលេងនៅលើសួនច្បារ៤នាក់ក្នុងនោះមានក្មេងប្រុស២នាក់រងរបួសដោយសាររថយន្តជ្រុលទៅបុកក៏ត្រូវបញ្ជូនទៅសង្គ្រោះនៅមន្ទីរពេទ្យ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្តខាងលើដែលនារីម្នាក់ជាអ្នកបើកចុះពីលើស្ពានកោះពេជ្រ ក្នុងទិសដៅពីកើតទៅលិច ។ លុះបើកបរមកដល់មុខសួនកម្សាន្តឌ្រីមលែន ក៏បុកម៉ូតូកង់៣ដែលឈប់ចតស្ងៀមនៅក្បែរចិញ្ចើមផ្លូវ បណ្តាលឱ្យម៉ូតូកង់៣ខ្ទាតផ្លោងទៅធ្លាក់នៅលើសួនច្បារណាហ្គាវើល ហើយរថយន្តក៏ជ្រុលទៅបុកបង់អង្គុយេលងនៅលើសួន និងជ្រុលល្បឿនទៅបុកមនុស្សអង្គុយលេង និងអ្នកលក់ដូរនៅលើសួនច្បារបណ្តាលឱ្យរងរបួសក្មេងប្រុស២នាក់ ។
ករណីខាងលើនេះ ប៉ូលិសសន្និដ្ឋានថា បណ្តាលមកពីអ្នកបើកបរស្រវឹង ប្រហែលទើបចេញមកពីផឹកស៊ីនៅហាងណាមួយហើយ បើករថយន្តក្នុងល្បឿនលឿន ទើបបង្កគ្រោះថ្នាក់ធ្ងន់ធ្ងរកើតឡើង រហូតត្រូវប៉ូលិសឃាត់ខ្លួនទាំង២នាក់បញ្ជូនទៅស្នងការដ្ឋាននគរបាលរាជធានីភ្នំពេញទាំងយប់ ។ ក្រោយពេលគ្រោះថ្នាក់កើតឡើង យើងបានសង្កេតឃើញបុរសស្ត្រីទាំង២នាក់ ទំនងភិតភ័យស្ទើរគ្មានព្រលឹង បានស្ទុះឱបគ្នាយំសំដែងនូវភាពស្និទ្ធបំផុត និងរន្ធត់ណាស់នៅក្នុងរថយន្ត បញ្ជាក់ពីការស្តាយមិនគួរកើតមាន ។ គេនៅមិនដឹងថា នារីខ្មែរ និងបុរសជនជាតិកូរ៉េម្នាក់នេះត្រូវជាអ្វីនឹងគ្នានោះទេ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
