ខេត្តតាកែវ ៖ ដើមចេកចម្លែកមួយដើមចេញផ្លែដោយគ្មានត្រយូង និងមានកូនតូចៗជាច្រើនដុះជុំវិញ នៅវត្តបព្វតាសត្ថារាម ហៅវត្តត្រពាំងត្រាវខាងត្បូង ស្ថិតក្នុងឃុំភ្នំជិន ស្រុកគិរីវង់ ។ ភាពចម្លែកនេះធ្វើឱ្យពុទ្ធបរិស័ទចំណុះជើងវត្ត និងអ្នកទៅពីទីឆ្ងាយជឿថា មានប្ញទ្ធិបារមី ក៏ទៅអុជធូបបួងសួងសុំសេចក្តីសុខចម្រើន ។
ព្រះចៅអធិការវត្តត្រពាំងត្រាវ ព្រះនាម កែវ សេងម៉ុស មានសង្ឃដីកាថា នៅក្នុងវត្តមានដាំដើមចេកជាច្រើនដើម ហើយការដាំនោះមាន៣ដំណាក់កាល ។ ពីដំបូងដាំចេក១០០ស្និត បន្ទាប់មកដាំចេកតឿ និងចុងក្រោយដាំចេកដំរី ។ ការដាំចេកក្នុងវត្តនេះរយៈពេល១ឆ្នាំមកហើយ ។
ព្រះចៅអធិការវត្តបន្តថា នៅថ្ងៃទី៤ មិថុនា ឆ្នាំ២០១២ ត្រូវនឹងថ្ងៃ១៥កើតនាពេលយប់ស្រាប់តែឮសំឡេងគ្រាំងនៅ ម្តុំដើមចេកចម្លែកនោះ តែព្រះសង្ឃនៅក្នុងវត្តមិនចាប់អារម្មណ៍ទេ។ ពេលភ្លឺឡើងទៅពិនិត្យមើលដើមចេកដំរីនោះក៏ឃើញមានចេញដូច ជាក្បាលត្រយូង។ បន្ទាប់មកនៅថ្ងៃទី៧ មិថុនា វេលាព្រឹកស្រាប់តែដើមចេកដំរីចេញផ្លែដ៏ចម្លែក ចំនួន៩ផ្លែដោយគ្មានត្រយូងទេ ។ ផ្លែចេកទាំង៩នេះ មានទំហំធំខុសពីផ្លែចេកធម្មតា ។ ភាពចម្លែកនេះធ្វើឱ្យប្រជាពលរដ្ឋដែលមានជំនឿនៅទីជិត ឆ្ងាយនាំគ្នាទៅមើល និងអុជធូបសុំសេចក្តីសុខគ្រាប់ៗគ្នា ។ មិនតែប៉ុណ្ណោះនៅជុំវិញដើមចេកចម្លែកនោះមានដុះកូន តូចៗព័ទ្ធជុំវិញប្រមាណ២៩ដើម ធ្វើឱ្យកាន់តែចម្លែកថែមមួយកម្រិតទៀត ។ រឿងនេះនរណាក៏មានការភ្ញាក់ផ្អើលដែរពេលបានឃើញ ។
ប្រជាពលរដ្ឋរស់នៅក្បែរវត្តបព្វតា សត្ថារាម ហៅត្រពាំងត្រាវ ដែលទៅអុជធូបសុំសេចក្តីសុខពីដើមចេកចម្លែកនោះបាន និយាយថា «យើងទាំងអស់គ្នាកាន់សាសនាព្រះពុទ្ធ មានជំនឿទៅលើដើមចេកចម្លែកមួយនេះ ព្រោះយល់ថាការផុសចេញចេកចម្លែកនេះ គឺនាំឱ្យប្រទេសជាតិ ឬស្រុកយើងមានសេចក្តីសុខ ប្រជាពលរដ្ឋរកស៊ីមានបាន ធ្វើអ្វីៗក៏សមប្រកបតាមសេចក្តីត្រូវការជានិច្ច ទាំងការងាររស់នៅប្រកបរបររកស៊ីទាំងការងារធ្វើស្រែចម្ការ» ។
ផ្ទុយទៅវិញបុរសម្នាក់នៅជិតវត្តនោះដែល មិនមានជំនឿយល់ថានោះគ្រាន់តែជាបាតុភូតនៃធម្មជាតិ ប៉ុណ្ណោះ មិនខុសអីពីមនុស្សកើតបានកូនភ្លោះបីទេ ។ លោកមិនជឿថា ដើមចេកចម្លែកនោះមានប្ញទ្ធិបារមីទេ ។ កន្លងមកបាតុភូត ចម្លែកកើតមានជារឿយៗដូចជាកូនជ្រូកក្បាលដំរី ចេកចេញត្រយូងនៅគល់ជាដើម ។ចំពោះចេកចម្លែកនៅស្រុកគិរីវង់នោះ ខ្លះជឿថាមានប្ញទ្ធិបារមី ខ្លះថាជាបាតុភូតធម្មជាតិ វាជារឿងធម្មតានៃការយល់ឃើញរបស់មនុស្ស៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]