ខេត្តសៀមរាប ៖ ភ្លើងព្រៃបានបើកការវាយប្រហារយ៉ាងសន្ធោសន្ធៅទៅលើតំបន់គ្រប់គ្រងដោយអាជ្ញាធរអប្សរាសាជាថ្មី កាលពីរសៀលថ្ងៃទី៩ កុម្ភៈ ឆ្នាំ ២០១២ នេះដោយបានបណ្ដាលឱ្យព្រៃ និងវាលស្មៅដែលកំពុងតែហួតហែងនារដូវប្រាំងសរុបជិត២០ ហិកតា ត្រូវបានបំផ្លាញ ។ បុ៉ន្ដែមិនបានបង្កឱ្យមានការឆេះរាលដាលដល់លំនៅឋាននិងទ្រព្យសម្បត្ដិរបស់ប្រជាពលរដ្ឋដែលនៅក្បែរៗនោះទេ គ្រាន់តែ ដឹងថាមានចម្ការដំណាំហូបផ្លែតិចតួចត្រូវបានបំផ្លាញ ។
ក្រុមមន្ដ្រីអាជ្ញាធរអប្សរាបានថ្លែងថា នេះជាការឆេះព្រៃមានទ្រង់ទ្រាយធំដោយមានរយៈពេលរហូតជាង៣ម៉ោង ដែលករណីឆេះនេះជាលើកទី២ ក្នុងតំបន់ឧទ្យានអង្គរដែលគ្រប់គ្រងដោយអាជ្ញាធរអប្សរាសម្រាប់ដើមឆ្នាំ២០១២ នេះ ។ ឆេះលើកទីមួយបានកើតឡើងកាលពីរសៀលថ្ងៃទី១៩ មករា កន្លងទៅដោយកាលណោះបានឆក់យកដីព្រៃ និងវាលស្មៅអស់ជាង១០ហិកតា ស្ថិតក្នុងបរិវេណបុរីសណ្ឋាគារវប្បធម៌និងទេសចរណ៍ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។
អគ្គនាយករងអាជ្ញាធរអប្សរា លោកសុខ លក្ខណា ដែលបានចុះទៅពិនិត្យកន្លែងកើតហេតុ បានមានប្រសាសន៍ប្រាប់កាលពីរសៀលថ្ងៃទី៩ កុម្ភៈ ថា ភ្លើងបានចាប់ផ្ដើមវាយប្រហារមកលើវាលស្មៅ និងព្រៃខាងលើអស់រយៈពេលជិត ៣ម៉ោង គឺចាប់ផ្ដើងឆេះតាំងពីវេលាម៉ោង១ រសៀល និងបានរលត់ទៅវិញនៅវេលាម៉ោងប្រមាណជិត៤រសៀល ។ បន្ទាប់ពីមានការចុះអន្ដរាគមន៍ពីសំណាក់អាជ្ញាធរមូលដ្ឋានក៏ដូចជាអង្គភាពការិយាល័យនគរបាលពន្លត់និងបង្ការអគ្គិភ័យនៃស្នងការដ្ឋានខេត្ដនិងអង្គភាពបរិស្ថានការពារតំបន់ទេសភាពសៀមរាប-អង្គរ ដោយយើងបានប្រើប្រាស់រថយន្ដពន្លត់អគ្គិភ័យរហូតដល់៩គ្រឿង ។
លោកបានបញ្ជាក់បន្ថែមថា ការឆេះមានបណ្ដោយប្រហែល១គីឡូម៉ែត្រ និងទទឹងប្រហែលជាងមួយរយម៉ែត្រ គឺជិត២០ហិកតា ចាប់ពីចំណុចលើតំបន់អញ្ចាញទៅជើងក្នុងភូមិអញ្ចាញ សង្កាត់នគរធំ ក្រុងសៀមរាប ក្នុងតំបន់ការពារដោយអាជ្ញាធរអប្សរា ។ ក្នុងតំបន់នោះសុទ្ធសឹងជាព្រៃរេចរឹល និងវាលស្មៅ ប៉ុន្ដែក៏មានចម្ការដំណាំហូបផ្លែ ដូចជាស្វាយ ខ្នុរជាដើម ។
ទោះជាយ៉ាងណារហូតមកទល់ពេលនេះគេមិនទាន់ដឹងមូលហេតុដែលនាំឱ្យកើតមានភ្លើងឆេះព្រៃនោះនៅឡើយទេគ្រាន់តែមានការសន្និដ្ឋានជំហានដំបូងថា ទំនងជាមានការចោលកន្ទុយបារីឬក្រុមក្មេងឃ្វាលគោ-ក្របីនាំគ្នាដុតលេង ។
គួរកត់សម្គាល់ថា នៅក្នុងតំបន់ព្រៃនៃឧទ្យានអង្គរ ដែលគ្រប់គ្រងដោយអាជ្ញាធរជាតិអប្សរា គេបានឃើញអាជ្ញាធររៀបចំប្រព័ន្ធការពារភ្លើងឆេះព្រៃដែរ ដោយមានការឈូសដីព័ទ្ធជុំវិញតំបន់ព្រៃទាំងនោះ ។ ក៏ប៉ុន្ដែគេតែងតែឃើញមានភ្លើងឆេះព្រៃជារៀងរាល់ឆ្នាំកើតឡើងជាពិសេសនៅពេលរដូវប្រាំងក្ដៅហួតហែងតែម្ដង៕
ដោយប្រុសកោះ
ដកស្រង់ពីគេហទំព័រ កោះសន្តិភាព
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebookរបស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
