ខេត្តបន្ទាយមានជ័យ ៖ ស្ត្រីចិត្តខ្លាំងម្នាក់ព្រោះតែខឹងប្តីជនជាតិឥណ្ឌាពូកែ ប្រចណ្ឌពេកក៏ផ្ទុះកំហឹងទាញកាំបិតប៉័ងតោកាប់ទៅលើប្តី បណ្តាលឱ្យរបួសដៃខាងឆ្វេង ត្រូវកម្លាំងនគរបាលក្រុងប៉ោយប៉ែតចាប់ឃាត់ខ្លួន កាលពីវេលាម៉ោង៩យប់ ថ្ងៃទី៣០ មិថុនា នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ត្រី អ៊ុំ សុផល អធិការនគរបាលក្រុងប៉ោយប៉ែតបានឱ្យដឹងថា ស្ត្រីដៃឆើតដែលកាប់ប្តីនោះឈ្មោះ អម វណ្ណា អាយុ២៥ឆ្នាំ កាលពីវេលាម៉ោង៩យប់ថ្ងៃទី៣០ មិថុនា ស្ត្រីរូបនេះបានយកកាំបិតប៉័ងតោមកកាប់ប្តីឈ្មោះ យូ កូល អាយុ៣៧ឆ្នាំ ជនជាតិឥណ្ឌាត្រូវ១កាំបិត បណ្តាលរយះដៃឆ្វេងយ៉ាងដំណំ ក្រោយពេលធ្វើសកម្មភាពត្រូវបានចាប់ខ្លួនយកមកសួរនាំ ។
លោកអធិការនគរបាលក្រុងបានបន្តថា នៅចំពោះមុខសមត្ថកិច្ច ស្ត្រីរូបនោះបានសារភាពថា មូលហេតុដែលរូបនាងឈានដល់ប្រើអំពើហិង្សានេះ ក៏ព្រោះតែខឹងនឹងប្តីជនជាតិឥណ្ឌានេះ ពូកែប្រចណ្ឌពេកពេលឃើញនាងផឹកស៊ីជាមួយបុរសផ្សេងធ្វើឱ្យនាង អត់ទ្រាំមិនបានក៏យកកាំបិតប័ុងតោកាប់តែម្តងទៅ ដើម្បីជាការព្រមាន ។ ស្ត្រីរូបនេះបញ្ជាក់ថា នាងបានប្តីជាបុរសឥណ្ឌានេះរស់នៅជាមួយគ្នារយៈពេល២-៣ឆ្នាំមក ហើយ ។
លោកអធិការបានបញ្ជាក់ថា ទាក់ទិននឹងអំពើហិង្សាប្រពន្ធកាប់ប្តីនេះ បុរសជាប្តីមិនបានប្តឹងប្តល់នោះទេ សូមឱ្យសមត្ថកិច្ចអប់រំ និងធ្វើកិច្ចសន្យាមិនឱ្យកើតមានជាលើកទី២តែប៉ុណ្ណោះ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]