រាជធានីភ្នំពេញ ៖ បុរសម្នាក់ក្រោយពេលជិះម៉ូតូបត់ផ្លូវកែងក៏រអិលដួល ច្រងាប់ច្រងិលម្នាក់ឯងសន្លប់១០នាទីទើបដឹងខ្លួន ហើយនៅពេលអ្នកកាសែតទៅថតយកព័ត៌មាន បានប្រាប់ថាខ្លួនទើបតែផឹកអស់១កេសប៉ុណ្ណោះ មិនទាន់ស្រវឹងទេ ទើបតែស្រឿងៗ តែចង់ឱ្យអ្នកកាសែតថត យកទៅដាក់ទំព័រមុខផងព្រោះចង់ល្បី ។
ហេតុការណ៍នេះបានកើតឡើងកាលពីវេលាម៉ោង១ និង៤០នាទីរំលងអធ្រាត្រឈានចូលថ្ងៃទី២ កក្កដា នៅតាមបណ្តោយមហាវិថីព្រះសីហនុ ក្នុងសង្កាត់ចតុមុខ ខណ្ឌដូនពេញ ។ អ្នករងគ្រោះឈ្មោះ ចិត្រ អាយុ២៥ឆ្នាំ ស្នាក់នៅសង្កាត់ទួលទំពូង ខណ្ឌចំការមន រងរបួសដាច់កូនជើង ។
ប្រភពព័ត៌មានបានឱ្យដឹងថា មុនពេលកើតហេតុបុរសខាងលើបានជិះម៉ូតូម៉ាកវីវ៉ា ពណ៌ខ្មៅ តាមបណ្តោយមហាវិថីព្រះសីហនុ ពីកើតទៅលិចក្នុងល្បឿនលឿនពេលមកដល់ចំណុចផ្លូវកែង បានជាន់ហ្វ្រាំងទាំងប្រថុចញ៉ុច ក៏ដួលបោកទៅលើទ្រូងផ្លូវតែម្នាក់ឯង សន្លប់ប្រមាណ១០នាទីទើបដឹងខ្លួន។
ពេលងើបពីសន្លប់ក៏និយាយជាមួយអ្នកកាសែត ថា ជួយថតឱ្យបានច្រើនប៉ុស្តិ៍ និងឱ្យច្បាស់ៗ ហើយមេត្តាជួយចុះផ្សាយដាក់នៅទំព័រមុខផង ព្រោះខ្លួនចង់ល្បី និងចង់ឱ្យអ្នកផ្ទះបានឃើញ រួចបានលើកម៉ូតូជិះទៅផ្ទះដោយខ្លួនឯង៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
