រាជធានីភ្នំពេញ ៖ ក្រៅពីសម្បូរវោហារកំប្លែង និងភាពក្រមិចក្រមើមក្នុងការសម្តែងនោះ នាងម៉ក់ សុគន្ធស្រីនិច ហៅប្រិមប្រិយត្រូវគេមើលឃើញថា រូបសម្រស់របស់នាងក៏មានភាពទាក់ទាញបុរសៗមួយចំនួនដែរ បើទោះបីជានាងជាប់ឈ្មោះជាស្ត្រីមេម៉ាយកូនមួយក៏ដោយ ។តារាកំប្លែងដែលមានឈាមជ័រជាអ្នកសិល្បៈរូបនេះទទួលស្គាល់ថា សព្វថ្ងៃនាងពិតជាមានអ្នកតាមស្រលាញ់ច្រើន តែនៅមិនទាន់មានបុរសណាមួយត្រូវចិត្តដែលនាងប្រាថ្នាសម្រាប់ ជាគូអនាគតទេ ។
តារាកំប្លែងដែលមានដើមកំណើតនៅខេត្តកំពត រូបនេះបញ្ជាក់ថា បុរសដែលអាចឱ្យនាងយកមកធ្វើជាគូកៀកកើយបាននោះ លុះត្រាតែមានការទទួលខុសត្រូវខ្ពស់ ចេះដឹងខុសត្រូវ និងចេះបែងចែកពេលវេលា ជាពិសេសនោះគឺជាមនុស្សដែលមានហេតុផលច្បាស់លាស់ ហើយមានអាយុចាប់ពីជាង៣០ឆ្នាំឡើងទៅ ។ដោយសារតែនាងធ្លាប់មានឈ្មោះជាស្ត្រីមេម៉ាយនោះ ហេតុដូចនេះរាល់បុរសដែលនាងនឹងជ្រើសរើសយកមកធ្វើជាគូអនាគត នោះគឺដាច់ខាតត្រូវតែមានការពិនិត្យឱ្យបានច្បាស់លាស់ជាមុន សិន មិនមែនចេះតែប្រថុយប្រថានឡើយ ព្រោះខ្លាចជួបរឿងអកុសលដូចមុនទៀត ។
ទោះជាយ៉ាងណាក្តី តារាកំប្លែងរូបនេះអះអាងថា បញ្ហាគូអនាគតនាងនៅមិនទាន់ចង់គិតនៅឡើយទេ ព្រោះចង់ប្រឡូកក្នុងអាជីពសិល្បៈឱ្យបានច្រើនជាងនេះ ។ រឿងគូស្រករនេះនាងចង់ទុកឱ្យពេលវេលាជាអ្នកកំណត់ ។ កន្លងមកនាងប្រិមប្រិយធ្លាប់លេចឮព័ត៌មានថាចងសម្ព័ន្ធស្នេហា ជាមួយនាយហុងដា បន្ទាប់ពីមហាជនមើលឃើញថា នាង និងនាយហុងដាមានភាពស៊ីសង្វាក់គ្នាយ៉ាងខ្លាំងទាំងនៅលើឆាក និងក្រៅឆាក ស្របពេលនាយហុងដា បានបែកបាក់ពីភរិយានាងឃ្មឹបផងនោះ ។ អ្វីៗខុសពីការស្មានព្រោះការពិតនាយហុងដា មានចំណងស្នេហាជាមួយនារីម្នាក់ផ្សេងទៅវិញ ។ ចំណែកនាងប្រិមប្រិយ បានទាក់ទងជាមួយបុរសអាណិកជនម្នាក់ តែក្រោយមកនាងបញ្ជាក់ថា ចំណងស្នេហ៍រវាងនាង និងបុរសនោះមិនអាចទៅមុខបានឡើយ ដោយសារមិនមានពេលវេលាគ្រប់គ្រាន់សម្រាប់គ្នាទៅវិញទៅមក ។
បើទោះបីជាទទួលរងការបរាជ័យស្នេហ៍ជាបន្ត បន្ទាប់ក៏ដោយ តារាកំប្លែងរូបនេះហាក់មិនអស់សង្ឃឹមក្នុងការស្វែងរកដៃគូ ជីវិតឡើយ ព្រោះបើផ្អែកលើរូបសម្រស់របស់នាងប្រាកដជាមានបុរសមិនតិច ឡើយដែលតាមសុំស្នេហ៍នាង ។នាង ម៉ក់ សុគន្ធស្រីនិច ហៅប្រិមប្រិយ ជាតារាកំប្លែងដែលលេចធ្លោម្នាក់ក្នុងក្រុមនាយកុយបន្ទាប់ពីនាង បានចូលរួមសម្តែងក្នុងក្រុមកំប្លែងនេះតាំងពីចុងឆ្នាំ២០១០មក ជំនួសកន្លែងនាងឃ្មឹប ដែលបានចាកចេញ ។
ស្រីនិច មានឪពុកឈ្មោះ នាង ម៉ក់ អាយុ៥៣ឆ្នាំ ជាគ្រូសៀករហស្សកម្ម និងជាតួល្ខោនក្នុងក្រុម «អប្សរាអមតៈ» ប្រចាំក្រសួងមហាផ្ទៃ និងមានម្តាយឈ្មោះ ព្រំ សុខារិទ្ធិ អាយុ៤០ឆ្នាំ ជាមន្ត្រីផ្នែកសិល្បៈក្នុងក្រសួងមហាផ្ទៃដូចគ្នា ។ នាងប្រិមប្រិយពុំទាន់យល់រស្មីក្តីស្នេហានៅឡើយ តែរស្មីជីវិតសិល្បៈកំប្លែងរបស់នាងកំពុងតែភ្លឺចែងចាំង ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]