រាជធានីភ្នំពេញ ៖ ចោរប្លន់ប្រដាប់អាវុធ២នាក់ បានប្រើរូបភាពបិទម៉ាសមុខ រួចធ្វើសកម្មភាពប្លន់យកលុយចំនួន៥.០០០ដុល្លារពីម្ចាស់រោងពុម្ព ក្រោយពីជនរងគ្រោះយកលុយខ្មែរទៅដូរដុល្លារនៅម្តុំកន្លែង ប្តូរប្រាក់មួយជិតរង្វង់មូលនាងគង្ហីងក្នុងខណ្ឌ៧មករា កាលពីវេលាម៉ោង៥និង៣៥នាទីល្ងាចថ្ងៃទី២ កក្កដា ២០១២ នៅក្នុងផ្ទះជួលមួយកន្លែង មុខស្ថានីយទូរទស្សន៍អាស៊ីអាគ្នេយ៍ក្នុងសង្កាត់ទឹកថ្លា ខណ្ឌសែនសុខ ។
ចំពោះសកម្មភាពចោរប្រដាប់អាវុធ គឺចាប់ជនរងគ្រោះចងស្លាបសេកនឹងខ្សែភ្លើង ហើយវាយនឹងស្នាប់កាំភ្លើងថែមទៀត។ មិនតែប៉ុណ្ណោះចោរបានធ្វើសកម្មភាពរើកកាយក្នុងផ្ទះជនរង គ្រោះដើម្បីរកទ្រព្យសម្បត្តិផ្សេងទៀត បន្ទាប់ពីប្លន់យកលុយពីក្នុងកាបូបជនរងគ្រោះរួចហើយនោះ ។ នេះជាករណីប្លន់លើកទី៣ហើយក្នុងរយៈពេលជិត១ខែដែលកើតឡើងនៅ ក្នុងទឹកដីសង្កាត់ទឹកថ្លា ហើយកន្លែងដែលជនល្មើសធ្វើសកម្មភាពក៏ស្ថិតនៅមិនឆ្ងាយពីគ្នា ប៉ុន្មាននោះដែរ ។
ជនរងគ្រោះអ្នកបើកបររថយន្តឈ្មោះមុំ វុទ្ធី ភេទប្រុស អាយុ៣៤ឆ្នាំ ដែលបានបើករថយន្តកូរ៉ូឡា ពណ៌សំបកឪឡឹក ជូនម្ចាស់រោងពុម្ព និងត្រូវជាមេកើយរបស់ខ្លួនផងនោះបានរៀបរាប់ថា មុនពេលកើតហេតុម្ចាស់រោងពុម្ពឈ្មោះអារុន ឌីម ភេទប្រុស អាយុ៦៥ឆ្នាំ បានយកលុយខ្មែរទៅដូរជាលុយដុល្លារបានចំនួន៥.០០០ដុល្លារនៅ កន្លែងប្តូរប្រាក់មួយនៅម្តុំលីហួរ លុះពេលត្រឡប់មកដល់ផ្ទះវិញ ចោរតាមប្លន់តែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]