ខេត្តបន្ទាយមានជ័យ ៖ បុរសម្នាក់ត្រូវបានបញ្ជូនទៅកាន់មន្ទីរពេទ្យបង្អែកដើម្បីសង្គ្រោះ ជីវិត បន្ទាប់ពីត្រូវជនដៃដល់យកកាំបិតចិតបន្លែចូលមកចាក់ដល់ក្នុង ផ្ទះទាំងកំរោលហើយគេចខ្លួនបាត់ដោយសុវត្ថិភាព សមត្ថកិច្ចមិនទាន់ចាប់ខ្លួនបាននៅឡើយ ។ ហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី៣០ មិថុនា នៅក្នុងផ្ទះជួលមួយកន្លែងស្ថិតក្នុងភូមិក្បាលស្ពាន១ សង្កាត់ប៉ោយប៉ែត ។
ជនរងគ្រោះឈ្មោះ គង់ រដ្ឋា ភេទប្រុស អាយុ៣៥ឆ្នាំ ជាអ្នកចាប់ម៉ូយដាក់រថយន្តនៅក្រុងប៉ោយប៉ែត ។ ចំណែកជនដៃដល់ឈ្មោះ នាគ អាយុ៣៥ឆ្នាំ និងប្រពន្ធឈ្មោះយាយអន្ទង់ អាយុ៥៧ឆ្នាំ ជាអ្នកលក់ត្រី ស្នាក់នៅផ្ទះជួលជិតគ្នា ។ បើតាមការឱ្យដឹងពីឈ្មោះ អៀ សុខឡៃ ជាប្រពន្ធជនរងគ្រោះបាននិយាយប្រាប់អ្នកយកព័ត៌មាន នៅក្នុងមន្ទីរពេទ្យថា កន្លងមក គ្រួសារគាត់ និងជនដៃដល់ជាអ្នករាប់អានគ្នា បានអ្វីឆ្ងាញ់តែងតែចែករំលែកគ្នា ។
ដោយសារភាពស្និទ្ធស្នាលនេះ ឈ្មោះ នាគ តែងតែមកលេងផ្ទះនិងចាប់ថើបកូនតូចៗរបស់នាងដោយសារក្តីស្រឡាញ់ និងលេងសើចមកលើរូបនាងរបៀបរពឹសដៃ ដូចជាអង្អែលក្បាល ចាក់ចង្កេះលេងធ្វើឱ្យប្រពន្ធរបស់ឈ្មោះ នាគ ដែលមានវ័យចំណាស់ហៅថា យាយអន្ទង់ មានការប្រចណ្ឌ និងតែងតែជេរប្តីក្មេងនោះជាញឹកញាប់ ។ ស្ត្រីប្រពន្ធជនរងគ្រោះនោះបន្តថា អ្នកស្រុកអ្នកភូមិ បានលួចខ្សឹបប្រាប់ពីការប្រចណ្ឌនេះ ទើបនាងមិនចង់ឱ្យមានរឿងវែងឆ្ងាយ ក៏មិនសូវស្និទ្ធស្នាលដូចមុនដែរ ធ្វើឱ្យឈ្មោះ នាគ មានការអាក់អន់ចិត្ត និងមានគំនុំមកលើគ្រួសារនាងចាប់ពីពេលនោះមក ។
រហូតដល់់ថ្ងៃកើតហេតុ ឈ្មោះ នាគ ផឹកស្រវឹងបានជិះម៉ូតូមកធាក់ជញ្ជាំងផ្ទះនាង រួចជេរប្រមាថ និងបង្ករឿងជាមួយប្តីនាងដែលកំពុងដេកស្តាប់វិទ្យុនៅក្នុងផ្ទះ ។ ពេលនោះ ប្តីនាងមិនតបតឡើយ ព្រោះខ្ជិលឈ្លោះជាមួយមនុស្សស្រវឹង តែមិននឹកស្មានថា ជនដៃដល់មិនអស់ចិត្តក៏បានយកកាំបិតចិតបន្លែមួយដើរចូលមក ចាក់ប្តីនាងជាច្រើនកាំបិតតែប្តីនាងគេចផុតត្រូវ១កាំបិត ប៉ុណ្ណោះ ចំដើមទ្រូងខាងឆ្វេងបណ្តាលឱ្យឈាមហូរជោកខ្លួន បន្ទាប់មកប្តីនាងក៏ប្រវាយប្រតប់កាច់ដៃឱ្យជ្រុះកាំបិតរួចហើយ ក៏ដួលនៅលើដី ។ ឃើញដូច្នេះ ជនដៃដល់និងប្រពន្ធចំណាស់បានរត់គេចខ្លួនបាត់ ។
ស្រ្តីជាប្រពន្ធបន្តថា នាងបានស្រែកហៅឱ្យគេជួយ និងនាំយកប្តីនាងទៅកាន់មន្ទីរពេទ្យបង្អែកក្រុងប៉ោយប៉ែត ដើម្បីសង្គ្រោះ ហើយក៏បានបញ្ជូនបន្តទៅកាន់មន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី ដើម្បីសង្គ្រោះបន្ត ។ បច្ចុប្បន្ន ជនរងគ្រោះរួចផុតពីគ្រោះថា្នក់ដល់ជីវិតហើយ ចំណែកសមត្ថកិច្ចក្រុងប៉ោយប៉ែតកំពុងតែដុតដៃជើងតាមប្រមាញ់ចាប់ ខ្លួនជនសង្ស័យផងដែរ ។ ទាក់ទិននឹងករណីនេះ នគរបាលក្រុងប៉ោយប៉ែតមិនទាន់ប្រាប់ឈ្មោះជនដៃដល់ពិតប្រាកដ និងប្រពន្ធនៅឡើយទេ ព្រោះស្ថិតក្នុងការស្រាវជ្រាវនៅឡើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
