រថយន្តដឹក ស្រាបៀរ អាន់ឆ័រ បុកម៉ូតូកល់ជាប់ ក្រោមរថយន្ត

រតនគិរី ៖ មានករណីគ្រោះថ្នាក់ ចរាចរណ៍មួយកើតឡើង កាលពីវេលាម៉ោង ១០និង៤០នាទី ព្រឹកថ្ងៃទី០១ ខែកក្កដា ឆ្នាំ២០១២ ជិតកន្លែងការ៉ាស់សាំង តៃ សេងចាស់ ស្ថិតក្នុងភូមិ១ សង្កាត់ឡាបានសៀក ក្រុងបានលុង រថយន្តដឹកស្រាបៀរក្រុមហ៊ុន អាន់ឆ័រ ពណ៌ក្រហម ពាក់ស្លាកលេខ ភ្នំពេញ 1T-7146 និងម៉ូតូម៉ាកវ៉េវ អាល់ហ្វា ពណ៌ខ្មៅ ពាក់ស្លាកលេខ កំពង់ចាម 1F-5445 ។

ប្រភពព័ត៌មានពីសមត្ថកិច្ចនៅកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុគេ បានឃើញរថយន្តបើកពីកើតមកលិច ហើយម៉ូតូជិះបញ្ច្រាសទិសគ្នា លុះមកដល់ត្រង់ផ្លូវបំបែកជា៤ ស្រាប់តែអ្នកជិះម៉ូតូបើកវ៉ាខាងស្តាំរថយន្ត បណ្តាលឲ្យបុកចំពីមុខរថយន្ត រួចដួលកល់កង់រថយន្តតែម្តង។

ប្រភពដដែលបានបន្តឲ្យដឹងទៀតថា អ្នកបើករថយន្តក្រុមហ៊ុនដឹកស្រាបៀរ អានឆ័រ ពេលឃើញ អ្នកជិះម៉ូតូដួលចំពីមុខរថយន្ត ឃើញសភាពមិនស្រួលក៏ពន្លត់រថយន្ត រត់គេចខ្លួនបាត់ ។ រីឯអ្នកបើកម៉ូតូមានឈ្មោះ ហ៊ាង ណាត ភេទប្រុស អាយុ៤៨ឆ្នាំ មុខរបរបណ្តុះកូនកៅស៊ូ រងរបួសស្រាល ចំណែកម៉ូតូខាតខាតបន្តិចបន្តួច ផងដែរ។

ក្រោយកើតហេតុ សមត្ថកិច្ចបានយករថយន្ត និងម៉ូតូមករក្សាទុក ដើម្បីរង់ចាំដោះស្រាយតាមផ្លូវច្បាប់៕

ផ្តល់សិទ្ធដោយ ដើមអម្ពិល