ខេត្តសៀមរាប ៖ ស្លាកយីហោមន្ទីរសម្រាកព្យាបាលសុភមង្គល ជាអតីតមន្ទីរពេទ្យចិនប៉េកាំងដែលធ្លាប់មានរឿងអាស្រូវព្យាបាល នាយទាហានម្នាក់ស្លាប់កាលពីប៉ុន្មានឆ្នាំមុន ត្រូវបានសមត្ថកិច្ចចម្រុះទម្លាក់ចុះបិទទ្វារមិនឱ្យដំណើរការជារៀង រហូត បន្ទាប់ពីឆ្មក់ចូលឆែកឆេរកាលពីដើមខែនេះដោយរកឃើញឱសថដែលមន្ដ្រី ជំនាញមិនស្គាល់ឈ្មោះយ៉ាងច្រើនសន្ធឹកសន្ធាប់ជាមួយការបោះចោល ទាំងស្រុង នូវការទទួលខុសត្រូវរបស់វេជ្ជបណ្ឌឹតឈរឈ្មោះ។
ការទម្លាក់ស្លាកយីហោមន្ទីរសម្រាកព្យាបាលយីហោ« សុភមង្គល»នេះធ្វើឡើងកាលពីវេលាម៉ោង៨ និង៣០នាទីព្រឹកថ្ងៃទី២៩ មិថុនា ឆ្នាំ២០១២ ក្រោមការដឹកនាំផ្ទាល់ដោយលោក ហេង ផេង ព្រះរាជអាជ្ញារងអមសាលាដំបូងខេត្ដសៀមរាប និងមានការចូលរួមពីសំណាក់លោកសង់ រីហា អភិបាលរងខេត្ដសៀមរាប ព្រមទាំងកងកម្លាំងសហប្រតិបត្ដិការជាច្រើននាក់ទៀតរួមមាន នគរបាលការិយាល័យប្រឆាំងបទល្មើសសេដ្ឋកិច្ចខេត្ដ-ក្រសួង និងមន្ដ្រីជំនាញនៃមន្ទីរសុខាភិបាលខេត្ដផងដែរ ។
អនុប្រធានមន្ទីរសុខាភិបាលខេត្ដសៀមរាប លោកអៀប ប៊ុនលៀម ទទួលបន្ទុកសេវាឯកជន ដែលបានចុះនៅក្នុងប្រតិបត្ដិការទម្លាក់ស្លាកយីហោមន្ទីរសម្រាក ព្យាបាលរបស់ជនជាតិចិនយីហោ«សុភមង្គល»កាលពីព្រឹកថ្ងៃសុក្រនោះបាន មានប្រសាសន៍ថា ការសម្រេចបិទជាផ្លូវការនូវមន្ទីរសម្រាកព្យាបាលនេះ គឺជាការសម្រេចរបស់ក្រសួងសុខាភិបាល បន្ទាប់ពីលោកវេជ្ជ បណ្ឌិតស្លាត ឆាន ដែលជាអ្នកឈរឈ្មោះឱ្យបានបោះបង់ចោលក្នុងការទទួលខុសត្រូវតទៅទៀត ។
គួររំលឹកថា មន្ទីរសម្រាកព្យាបាលយីហោ «សុភមង្គល»ដែលត្រូវក្រសួងសុខាភិបាលចេញលិខិតបិទជាផូវការនោះ ស្ថិតនៅមុខផ្សារលើធំថ្មីឆៀងខាងកើត ប្របផ្លូវជាតិលេខ៦ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ត្រូវបានកម្លាំងសមត្ថកិច្ចចម្រុះខាងលើ ដឹកនាំផ្ទាល់ដោយលោកស្រ៊ា រតនៈ ព្រះរាជអាជ្ញារងអមសាលាដំបូងខេត្ដសៀមរាប ឆ្មក់ចូលឆែកឆេរកាលពីព្រឹកថ្ងៃទី៧ មិថុនា ឆ្នាំ២០១២ កន្លងទៅ ដោយបានរកឃើញកំហុសឆ្គងដែលមិនអាចលើកលែងបាន គឺរកឃើញឱសថគ្រាប់ និងទឹកមិនស្គាល់ឈ្មោះរហូតដល់១២៥គីឡូក្រាម និងសេរ៉ូមចំនួន៦០០ដបឯណោះ ។ ចាប់ពីពេលនោះមកមន្ទីរសម្រាកព្យាបាលដែលមានអ្នកគ្រប់គ្រងជាជន ជាតិចិននោះត្រូវបានតំណាងអយ្យការចេញដីកាបិទអាជីវកម្មជា បណ្ដោះអាសន្នជារៀងរហូតមក ។
លោកវរសេនីយ៍ទោ សឿន សេន ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាល ខេត្ដ ដែលបានដឹកនាំកម្លាំងចុះទម្លាក់ស្លាកយីហោមន្ទីរសម្រាកព្យាបាល «សុភមង្គល»ដែរនោះ បានមានប្រសាសន៍ថា នេះជាការបិទទ្វារជាស្ថាពរនូវមន្ទីរសម្រាកព្យាបាលជាលើក ដំបូងក្នុងគ្រាមានការបង្ក្រាបយ៉ាងតឹងរឹុងទៅលើទីតាំងបម្រើសេវា ផ្នែកសុខាភិបាលឯកជនរាប់សិបកន្លែងទូទាំងខេត្ដសៀមរាប ចាប់តាំងពីអំឡុងពាក់កណ្ដាលឆ្នាំ២០១១ រហូតមក ។
លោកបានបន្ថែមថា ការដែលក្រសួងសុខាភិបាលសម្រេចបិទទ្វារនេះវាមានសារប្រយោជន៍ សម្បើមណាស់សម្រាប់សុខុមាលភាពប្រជាពលរដ្ឋខ្មែរ ក៏ដូចជាភ្ញៀវទេសចរ ព្រោះយើងដឹងហើយបញ្ហាឱសថប្រៀបបានទៅនឹងអាវុធមុខពីរ កាលណាគេយកវាមកព្យាបាលជំងឺដោយមិនបានត្រួតពិនិត្យពីក្រសួងជំនាញ ត្រឹមត្រូវ វាអាចនាំមកនូវការអន្ដរាយដល់សុខភាពអ្នកប្រើប្រាស់ទៅវិញ ។
លោក បានបញ្ជាក់បន្ថែមថា មន្ទីរសម្រាកព្យាបាលដែលកំពុងតែត្រូវបានបិទទ្វារនេះធ្លាប់ មានរឿងអាស្រូវច្រើនករណីហើយ កន្លងមក ក្រៅពីនាំចូលឱសថខុសច្បាប់ដែលរកឃើញកាលពីដើមខែនេះ ក៏មានការព្យាបាលធ្វើឱ្យមនុស្សស្លាប់ជាដើម ។
យោងទៅតាមលិខិតអនុញ្ញាតលេខ០២០/០៨ អររស មព ចុះថ្ងៃទី១៦ ឧសភា ឆ្នាំ២០០៨ ដែលចុះហត្ថលេខាដោយលោកវេជ្ជបណ្ឌិត អ៊ឹង ភីរុន បានឱ្យដឹងថា វេជ្ជបណ្ឌិតដែលឈរឈ្មោះឱ្យមន្ទីរសម្រាកព្យាបាលយីហោ«សុភមង្គល» នោះមានឈ្មោះវេជ្ជបណ្ឌិត ស្លាត ឆាន។ ចំណែកអ្នកគ្រប់គ្រងសហគ្រាសនោះមានឈ្មោះម៉ាវ មឹងអុី ជាជនជាតិចិន នេះបើយោងទៅតាមប័ណ្ណប៉ាតង់ ដែលគេព្យួរនៅលើជញ្ជាំង ។
ទីតាំងនៃមន្ទីរសម្រាកព្យាបាលយីហោ «សុភមង្គល» ពីដើមជាកន្លែងគ្លីនិកចិនប៉េកាំងដែលគ្រប់គ្រងដោយជនជាតិចិន ប៉ុន្ដែប្រមាណជា៣ឆ្នាំមុន គ្លីនិកនោះបានប្រព្រឹត្តកំហុងឆ្គងមួយ ដោយព្យាបាលនាយទាហានម្នាក់មានតួនាទីជានាយរងហិរញ្ញវត្ថុនៃយោធភូមិ ភាគទី៤ស្លាប់ គឺលោកវរសេនីយ៍ទោ ប៊ុន សួរ ហើយក្រុមគ្រួសារសពជនរងគ្រោះបានដាក់ពាក្យប្ដឹងទៅតុលាការ។ ដោយសារតែមានរឿងអាស្រូវនេះផ្ទុះឡើងទីតាំងគ្លីនិកចិនប៉េកាំង បានទម្លាក់ស្លាកយីហោរបស់ខ្លួនចេញរួចជំនួសមកវិញនូវមន្ទីរសម្រាក ព្យាបាល«សុភមង្គល»រហូតដល់បច្ចុប្បន្ន ។
លោកវរសេនីយ៍ទោ សឿន សេន បានបន្ថែមដោយចាត់ទុកថា ការបិទទ្វារមន្ទីរសម្រាកព្យាបាលជំងឺយីហោ«សុភមង្គល»នាពេលនេះ គឺជាសារមួយធំណាស់ទៅដល់បណា្ដគ្លីនិក និងឱសថស្ថានទាំងអស់ដែលកំពុងបើកដំណើរការអាជីវកម្មឱ្យមានការ ប្រុងប្រយ័ត្នខ្ពស់ ជាពិសេសមុននឹងយកថ្នាំចូល ឬក៏ព្យាបាលមនុស្សសូមឱ្យប្រកាន់ខ្ជាប់នូវក្រមសីលធម៌ទៅតាមលក្ខណៈ បច្ចេកទេសដែលក្រសួងសុខាភិបាលបានកំណត់ កុំចេះតែចង់បានចំណេញច្រើនកោរអ្នកជំងឺមិនដាក់ទឹកនោះ ។
អនុប្រធានមន្ទីរសុខាភិបាលខេត្ដសៀមរាប លោកអៀប ប៊ុនលៀម ទទួលបន្ទុកសេវាឯកជន បានឱ្យដឹងថា បច្ចុប្បន្ននៅក្នុងក្រុងសៀមរាបទាំងមូលមានមន្ទីរសម្រាកព្យាបាល ឬគ្លីនិក ចំនួន១២កន្លែង ដែលមានច្បាប់ពីមន្ទីរជំនាញត្រឹមត្រូវ ។ ទោះជាយ៉ាងនេះក្ដី ចំពោះតម្លៃព្យាបាលរបស់សេវាឯកជនទាំងនោះត្រូវបានគេមើលឃើញថាហាក់ នៅឆ្ងាយពីជីវភាពប្រជាពលរដ្ឋខេត្ដសៀមរាប ដែលស្ថិតនៅក្នុងលំដាប់លេខរៀងទី២ ខាងក្រនៅឡើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]