ខេត្តបាត់ដំបង ៖ កម្លាំងកងអន្តរាគមន៍ពិសេសរបស់ស្នងការដ្ឋាននគរបាលខេត្ត បានឆ្មក់ចូលទៅបង្ក្រាបក្រុមអ្នកញៀនល្បែងអាប៉ោង១កន្លែង កាលពីរសៀលថ្ងៃទី២៥ មិថុនា នៅក្នុងភូមិព្រៃរកា សង្កាត់អូរម៉ាល់ ក្រុងបាត់ដំបង ដោយឃាត់ខ្លួនអ្នកលេងបានចំនួន៥នាក់ និងវត្ថុតាងមួយចំនួនផង រីឯអ្នកលេងជាងពាក់កណ្ដាលទៀតបានរត់ប្រសាចពេញវាលស្រែ ។
លោក កង សុផាណា ប្រធានក្រុមដឹកនាំកម្លាំងកងអន្តរាគមន៍ចុះបង្រ្កាបវង់ល្បែងខុស ច្បាប់នេះនិយាយថា ក្រុមអ្នកលេងអាប៉ោងទាំងនោះខ្លះបានផ្លោះចេញតាមរបង ឯខ្លះទៀតរត់ចេញទៅវាលស្រែខាងក្រោយភូមិ ។ លោកបន្តថា ម្ចាស់ផ្ទះបើកលេងល្បែងស៊ីសងនេះឈ្មោះ ប្រុញ ផាន់ ហៅយាយភា អាយុ៧៤ឆ្នាំ ដែលគេរាយការណ៍ថា បានដំណើរការជិត១ខែមកហើយ ។ អ្នកញៀនល្បែងចំនួន៥នាក់ ដែលត្រូវឃាត់ខ្លួនមាន ១-ឈ្មោះ សឿន ភ័ក្រ្តអាយុ២៤ឆ្នាំ ២-ឈ្មោះ សឿន ដូ អាយុ៣៣ឆ្នាំ ៣-ឈ្មោះ ទិព សឿន អាយុ៨២ឆ្នាំ ទាំង៣នាក់នេះនៅភូមិព្រៃរកា សង្កាត់អូរម៉ាល់ ៤-ឈ្មោះ រឿន រ៉ាត់ អាយុ៥៤ឆ្នាំ និង៥-ឈ្មោះ មាស ធឿន អាយុ៥៣ឆ្នាំ ទាំង២នាក់នៅភូមិអណ្ដូងព្រីង សង្កាត់អូរម៉ាល់ ។ ជាមួយគ្នានេះ សមត្ថកិច្ចរឹបអូសបានចានសម្រាប់បាញ់អាប៉ោង១ និងសម្ភារមួយចំនួនទៀតជាវត្ថុតាង ។
សមត្ថកិច្ចមិនបានឃាត់ខ្លួនម្ចាស់ផ្ទះឈ្មោះ ប្រុញ ផាន់ ហៅយាយភាទេ ដោយឃើញគាត់ចាស់ជរាទៅហើយ ។ យាយភាបានប្រាប់សមត្ថកិច្ចនៅកន្លែងកើតហេតុថា គាត់មិនបានផ្ដល់ទីកន្លែងឲ្យពួកអ្នកញៀនល្បែងនោះលេងទេ ប៉ុន្តែពួកគេចេះតែនាំគ្នាមកលេងហាមមិនស្ដាប់ឡើយ ។ គាត់បញ្ជាក់ថា គាត់រស់នៅម្នាក់ឯងក្នុងផ្ទះនោះ ព្រោះកូនចៅបែកអស់ហើយ។ គាត់បានស្ដីបន្ទោសក្រុមអ្នកញៀនល្បែងទាំងនោះ តែពួកគេចេះតែថា គ្មានបញ្ហាព្រោះគេត្រូវរ៉ូវគ្នាជាមួយសមត្ថកិច្ចមូលដ្ឋានអស់ហើយ លុះពេលនេះត្រូវសមត្ថកិច្ចចាប់ល្មម ។
សូមបញ្ជាក់ថា បច្ចុប្បន្នល្បែងស៊ីសងហាក់ដូចជាស្ងប់ស្ងាត់បន្តិចនៅក្នុងក្រុងបាត់ដំបង ប៉ុន្តែតាមប្រភពព័ត៌មានបានឲ្យដឹងថា ក្រុមអ្នកលេងមួយចំនួនកេណ្ឌគ្នាចេញទៅលេងតាមបណ្ដាស្រុកឆ្ងាយៗ ដូចជានៅក្នុងស្រុកមោងប្ញស្សីជាដើម ។ ចំពោះនៅក្នុងក្រុងបាត់ដំបង មានលេងលួចលាក់ គឺមិនចេញមុខដូចកាលពីប៉ុន្មានខែមុនទេ ។ ទោះជាយ៉ាងណាក្រុមអ្នកញៀនល្បែងប៉ុន្មាននាក់ខាងលើនេះ បើតាមសមត្ថកិច្ចប្រាប់ថា គ្រាន់តែធ្វើការអប់រំ និងធ្វើកិច្ចសន្យាឱ្យបញ្ឈប់សកម្មភាពតែប៉ុណ្ណោះ។ ប៉ុន្តែតាមការកត់សម្គាល់កន្លងមកពេលមានការបង្រ្កាបម្តងៗ គេឃើញក្រុមអ្នកលេងមុខដដែលៗទេ ដែលខ្លះមានកិច្ចសន្យាស្ទើររាប់ភ្លេចទាំងកិច្ចសន្យានៅឯតុលាការផង តែពួកគេមិនដែលរាងចាលឡើយ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
