ខេត្តបន្ទាយមានជ័យ ៖ ក្នុងរយៈពេល២ថ្ងៃមានមនុស្សចំនួន៣នាក់ស្លាប់ និង៥នាក់ទៀតរងរបួសធ្ងន់ដោយសារគ្រោះថ្នាក់ចរាចរណ៍នៅស្រុកមង្គលបុរី ។ លោកវរសេនីយ៍ត្រីយ៉ត សុផល អធិការនគរបាលស្រុកមង្គលបុរី បានឲ្យដឹងថា នៅថ្ងៃ ទី១២ ខែមិថុនា ឆ្នាំ២០១២ គ្រាន់តែជាង១ម៉ោងប៉ុណ្ណោះ មានគ្រោះថ្នាក់ចរាចរណ៍ចំនួន២ករណីដោយឡែកពីគ្នាបណ្តាលឲ្យមនុស្សម្នាក់ ស្លាប់បាត់បង់ជីវិតភ្លាមៗនៅនឹងកន្លែងកើតហេតុ និងម្នាក់រងរបួសស្មងជើងស្តាំ ។
ករណីទី១ នៅវេលាម៉ោង៦និង៣០នាទីល្ងាច មានបុរសម្នាក់ឈ្មោះឌី ចិត្ត អាយុ២៥ឆ្នាំ នៅភូមិគោកព្នៅ ឃុំបន្ទាយនាង បានជិះម៉ូតូម៉ាកវេ៉វ ស៊េរី២០០៨ ពណ៌ក្រហម-ខ្មៅ ទៅបុកគូទរថយន្តម៉ាកកូរ៉ូឡា ពណ៌ឈាមជ្រូក បើកបរដោយឈ្មោះចៅ ហាត់ (ហៅយឿន ហាត់) បណ្តាលឲ្យរបួសបាក់ឆ្អឹងស្មងជើងស្តាំ ត្រូវបានដឹកទៅព្យាបាលនៅមន្ទីរពេទ្យ ។ មុនពេលកើតហេតុ រថយន្តបើកនៅលើផ្លូវជាតិលេខ៥ពីទិសខាងត្បួងទៅជើង លុះដល់ចំណុចយាយជីច្រូតស្រូវ ស្ថិតក្នុងឃុំឫស្សីក្រោក អ្នកជិះម៉ូតូបានបុកគូទរថយន្តពីក្រោយបណ្តាលរងរបួស ។
ករណីមួយទៀតនាវេលាម៉ោង១០និង១៥នាទីយប់ក្មេងប្រុសម្នាក់ឈ្មោះសាក់ និមល អាយុ១៨ឆ្នាំ នៅភូមិជំទាវ ឃុំឫស្សីក្រោក ជិះម៉ូតូម៉ាកហុងដាសេ១២៥ ពណ៌ខ្មៅស៊េរី២០១២ មួយគ្រឿងទៅបុករថយន្តមួយគ្រឿងម៉ាកហ៊ីណូ ពណ៌ស ដឹកអេស្កាវ៉ាទ័រឈប់ចតនៅលើចិញ្ចើមផ្លូវជាតិលេខ៥ មុខវិទ្យាល័យមង្គលបុរីស្ថិត ក្នុងឃុំឫស្សីក្រោក ។ អ្នកជិះម៉ូតូធ្វើដំណើរពីទិសខាងជើងទៅត្បូង លុះដល់ចំណុចខាងលើក៏បានបុករថយន្តឈប់ចតពីក្រោយបណ្តាលឲ្យក្បាលអ្នកជិះម៉ូតូបុកចំផាលអេស្កាវ៉ាទ័រ ស្លាប់ភ្លាមមួយរំពេច ចំណែកអ្នកបើកអេស្កាវ៉ាទ័របានរត់គេចខ្លួនបាត់ ។
លោកអធិការនគរបាលស្រុកមង្គលបុរីបន្តទៀតថា ចំណែកនៅថ្ងៃទី១៤ មិថុនាវេលាម៉ោង១០និង៣០នាទីយប់ត្រង់ចំណុចយាយជីច្រូតស្រូវ ស្ថិតក្នុងឃុំឫស្សីក្រោកនេះដែរ នៅលើផ្លូវជាតិលេខ៥ មានករណីអ្នកបើកបររថយន្តស្រវឹងស្រាបើកបុករូបសំណាកតម្កល់យាយជីច្រូតស្រូវ បណ្តាលឲ្យមនុស្សចំនួន២នាក់ ស្លាប់បាត់បង់ជីវិតភ្លាមៗនៅនឹងកន្លែង ឯចំនួន៤នាក់ទៀតរងរបួសធ្ងន់ដឹកទៅព្យាបាលនៅមន្ទីរពេទ្យ ។
លោកវរសេនីយ៍ត្រីយ៉ត សុផល បញ្ជាក់ថា ជនរងគ្រោះដែលស្លាប់នៅនឹងកន្លែងម្នាក់ឈ្មោះសុខ សុភា ភេទស្រី អាយុ៣៣ឆ្នាំ មានទីលំនៅក្នុងក្រុងបាត់ដំបង ខេត្តបាត់ដំបង ជាអ្នកបម្រើស្រាបៀរនៅភោជនីយដ្ឋាន និងម្នាក់ទៀតឈ្មោះវ៉ាន់នី សារ៉ាត់ ភេទប្រុស អាយុ៣២ឆ្នាំ នៅភូមិផ្លូវសៀម ឃុំគយម៉ែង ស្រុកមង្គលបុរី ។ ចំណែកអ្នករបួសធ្ងន់ចំនួន៤នាក់មាន១-ឈ្មោះអាំង គឹមហូន ភេទប្រុស ជាអ្នកបើបររថយន្ត របួសបាក់ឆ្អឹងភ្លៅស្តាំ សម្រាកព្យាបាលនៅមន្ទីរពេទ្យបង្អែកមង្គលបុរី ២-ឈ្មោះអ៊ុក រ៉ានី ភេទប្រុស អាយុ៤២ឆ្នាំ របួសក្បាល ធ្ងន់ត្រូវបានដឹកយកទៅព្យាបាលនៅរាជធានីភ្នំពេញ ៣-ឈ្មោះយឹម ភឿត ភេទប្រុស អាយុ៣៩ឆ្នាំ របួសធ្ងន់ត្រង់ក្បាល ដឹកទៅព្យាបាលនៅរាជធានីភ្នំពេញ និង៤-ឈ្មោះផាត យាន ភេទប្រុស អាយុ៣៩ឆ្នាំ របួសធ្ងន់បែកប្រអប់ជើងស្តាំ សម្រាកព្យាបាលនៅមន្ទីរពេទ្យខេត្តបាត់ដំបង ។
ចំពោះសពត្រូវបានប្រគល់ឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី។តាមការស្រាវជ្រាវមុនពេលកើតហេតុអ្នកទាំង៦នាក់បានជិះរថយន្តម៉ាកកាមរីស៊េរី៩៣ ពណ៌សំបកឪឡឹក បើកបរដោយឈ្មោះអាំង គឹមហូន ចេញពីកន្លែងផឹកស៊ីនៅភោជនីយដ្ឋានហេងគង់ បើកក្នុងទិសដៅពីត្បូងទៅជើង ក្នុងគោលបំណងមកខេត្តបន្ទាយមានជ័យ ។ ពេលមកដល់ចំណុចខាងលើក៏ជ្រុលចង្កូតទៅចងកំហឹងនឹងរូបសំណាកតម្កល់យាយជីច្រូតស្រូវបណ្តាលឱ្យបែកបាក់ និងរថយន្តខូចខាតធ្ងន់ ត្រូវបានកម្លាំងនគរបាលចរាចរខេត្តស្ទូចយកមករក្សាទុក ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]