ខេត្តឧត្តរមានជ័យ ៖ ក្រោមកណ្តាប់ដៃប្តីទុរយសឈ្មោះមាស សុភ័ណ្ឌ អាយុ៣០ឆ្នាំ ដែលធ្លាប់តែវាយធ្វើបាបប្រពន្ធឥតស្រាកស្រាន្តរហូតសន្លប់ក៏ មាន និងលើកចុងក្រោយបានប្រើអំពើហិង្សាដ៏ឃោរឃៅចាក់សាំងដុតប្រពន្ធ កាលពីថ្ងៃទី២៣ ឧសភា រហូតមកដល់ពេលនេះមានរយៈពេល២១ថ្ងៃ នាងជាប្រពន្ធក៏ត្រូវស្លាប់ ខណៈនាំទៅសង្គ្រោះនៅឯមន្ទីរពេទ្យប្រទេសវៀតណាម។
គួររំលឹកថា ស្ត្រីរងគ្រោះជាប្រពន្ធឈ្មោះម៉ៅ លក្ខិណា អាយុ២៩ឆ្នាំ ត្រូវបានសាច់ញាតិនាំទៅសង្គ្រោះភ្លាមៗនៅមន្ទីរពេទ្យខេត្ត សុរិន្ទ ប្រទេសថៃ បាន១យប់ ក៏បញ្ជូនត្រឡប់មកវិញ ហើយបញ្ជូនបន្តទៅសង្គ្រោះនៅមន្ទីរពេទ្យកងទ័ព«១៧៥»ក្រុងហូជីមិញ ប្រទេសវៀតណាម តែបានរយៈពេល២១ថ្ងៃប៉ុណ្ណោះនៅវេលាម៉ោង៨ និង៣០នាទីយប់ថ្ងៃទី១៤ មិថុនា ស្ត្រីរងគ្រោះក៏ស្លាប់ ហើយត្រូវបានដឹកមកលំនៅឋាននៅស្រុកកំណើតស្ថិតនៅភូមិជ្រោយថ្ម សង្កាត់បឹងកុក ក្រុងកំពង់ចាម ខេត្តកំពង់ចាម ធ្វើបុណ្យតាមប្រពៃណី ។ ចំណែកបុរសជាប្តីដ៏ទុរយសក៏ត្រូវបានចាប់ខ្លួនដាក់ពន្ធនាគារ ខេត្តឧត្តរមានជ័យ ។
លោកម៉ៅ ម៉ារិន អាយុ៥៣ឆ្នាំ ត្រូវជាឪពុករបស់សពខាងលើមានប្រសាសន៍ឱ្យដឹងថា កូនស្រីរបស់គាត់ឈ្មោះលក្ខិណា ជាស្ត្រីមេម៉ាយកូន២ បានរៀបការជាមួយនឹងឈ្មោះមាស សុភ័ណ្ឌ នៅថ្ងៃទី១០ កក្កដា ឆ្នាំ២០១១ នៅឃុំអន្លង់វែង ស្រុកអន្លង់វែង ខេត្តឧត្តរមានជ័យ ទៅតាមប្រពៃណីខ្មែរត្រឹមត្រូវតាមច្បាប់ ដោយមានភ្ញៀវញាតិមិត្តជិតឆ្ងាយមកចូលរួមយ៉ាងច្រើនកុះករ ។ ពួកគេមានមុខរបរលក់ខោអាវបុរស នារី យីហោភារ៉ាឌូវស្តាយ នៅទល់មុខរង្វង់មូលក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។ លោកម៉ារិន ជាឪពុកនៃសពមានប្រសាសន៍បន្តថា ចាប់តាំងពីពេលដែលកូនស្រីរបស់លោកយកគ្នាជាប្តីប្រពន្ធមក ប្តីនោះតែងតែប្រើអំពើហិង្សាញឹកញាប់មកលើប្រពន្ធ ។ មានពេលមួយនោះកាលពីពាក់កណ្តាលខែវិច្ឆិកា ឆ្នាំ២០១១ ក្នុងខេត្តសៀមរាប កូនប្រសាប្រុសបានវាយប្រពន្ធរហូតសន្លប់ ហើយត្រូវបាននាំទៅសង្គ្រោះនៅមន្ទីរពេទ្យ ។ លោកម៉ារិន បានបន្តថា នៅក្នុងហេតុការណ៍ដែលបានកើតឡើងនោះរូបលោកពុំបានដឹងនោះទេ ដោយជាប់បំពេញភារកិច្ចនៅរាជធានីភ្នំពេញ ។ ក្រោយមកទើបប្រពន្ធនិយាយប្រាប់ បើសិនណាដឹងភ្លាមៗនោះប្រហែលជាមិនអាចអត់ឱនឱ្យកូនប្រសាប្រុស រូបនេះបានជាដាច់ខាត ទោះបីលោកត្រូវប្រឈមមុខច្បាប់ក៏ដោយ ។ ក្នុងពេលដែលកូនស្រីរបស់លោកបានជាសះស្បើយវិញ ក៏បានដាក់ពាក្យមកសាលាដំបូងខេត្តឧត្តរមានជ័យ ដើម្បីសុំលែងលះតាមផ្លូវច្បាប់រហូតដល់មានសាលក្រមលេខ០៤ ចុះថ្ងៃទី៣០ មេសា ឆ្នាំ២០១២ ចេញដោយលោកចៅក្រមជំនុំជម្រះ ម៉ែន វណ្ណៈ បង្គាប់ឱ្យបញ្ឈប់ការរស់នៅជាមួយគ្នា និងផ្តាច់សង្វាសរវាងកូនស្រីលោក និងឈ្មោះមាស សុភ័ណ្ឌ ចាប់ពីពេលនោះមក ។
បុរសជាឪពុកនៃសព បានបញ្ជាក់បន្ថែមទៀតថា មុនពេលកើតហេតុ កន្លះខែអតីតកូនប្រសាប្រុសនោះបានមកអង្វរលន់តួរហូតដល់លុត ជង្គង់នៅមុខជីដូនឈ្មោះស៊ន់ ទ្រព្យ អាយុ៧៥ឆ្នាំ ដោយសុំជានាគ្នាឡើងវិញ តែត្រូវបានកូនស្រីលោកបដិសេធមិនព្រមយកជាដាច់ខាត ព្រោះថាកាលណាបើយកបន្តទៅទៀតនោះ អាចនឹងមានថ្ងៃណាមួយនឹងត្រូវអតីតប្តីនេះប្រើ អំពើហិង្សាធ្ងន់ជាមិនខាន ។ លោកម៉ារិន រៀបរាប់បន្តថា នៅក្នុងថ្ងៃទី២២ ឧសភា ឈ្មោះមាស សុភ័ណ្ឌ មិនចេញទៅណាទេ ដោយសារតែជីដូនទន់ចិត្តអាណិតឱ្យនៅរហូតដល់ពេលយប់ អតីតកូនប្រសានេះ បានលួចយកលុយប្រពន្ធចំនួន៦.៥០០ដុល្លារ និងខ្សែ.កមួយខ្សែមានបន្តោងពេជ្រតម្លៃ ២.៥០០ដុល្លារ។ លុះដល់ព្រឹកថ្ងៃទី២៣ ឧសភា កូនស្រីគាត់បានបើកទូមើលឃើញបាត់គ្រឿងអលង្ការមានតម្លៃ ក៏បានឈ្លោះជាមួយនឹងអតីតប្តីដែលកំពុងតែដេកនៅក្នុង អង្រឹង តែមិនបានប្រើហិង្សាលើគ្នានោះទេ ។ បន្ទាប់មកកូនស្រីបានទៅផ្សាររកទិញម្អូបអាហារ ស្របពេលដែលប្រពន្ធទៅផ្សារបាត់នោះ អតីតប្តីដ៏ឃោរឃៅនេះបានទៅទិញប្រេងសាំងចំនួន២ដប យកមកទុកនៅក្បែរអង្រឹងដែលកំពុងដេក ។ ក្នុងពេលដែលកូនស្រីលោកកំពុងតែអង្គុយសកត្រកួនបែរ មុខទៅថ្នល់ អតីតប្តីបានមកពីក្រោយខ្នងក៏ចាប់កូនស្រីលោកក្រៀកជាប់ ពេលនោះភរិយាលោកឈ្មោះយឹម សុខេន ឃើញក៏ស្ទុះមកជួយ ក៏ត្រូវបានអតីតកូនប្រសាធាក់ត្រូវមួយជើងដួលទៅលើដី ។ បន្ទាប់មកក៏យកដបសាំងមកចាក់ស្រោចលើក្បាលកូនស្រីលោក ជោកពេញមុខ ពេញខ្លួន ហើយបានយកដែកកេះមកគូសដុត ជាហេតុបណ្តាលឱ្យឆាបឆេះសន្ធោសន្ធៅរលាកពេញខ្លួនប្រាណ របួសជាទម្ងន់ ទើបត្រូវបាននាំកូនស្រីទៅសង្គ្រោះនៅមន្ទីរពេទ្យខេត្ត សុរិន្ទ ប្រទេសថៃ។ តែដោយសារស្ថានភាពរបួសកាន់តែធ្ងន់ទៅៗ ពេទ្យថៃថាមិនសង្ឃឹម បានតែមួយយប់ក៏បញ្ជូនទៅសង្គ្រោះនៅមន្ទីរពេទ្យយោធា១៧៥ ក្រុងហូជីមិញ ប្រទេសវៀតណាម ដោយសម្រាកព្យាបាលក្រោមការយកចិត្តទុកដាក់ពីសំណាក់ គ្រូពេទ្យ បានធ្វើឱ្យស្នាមរលាកលើរាងកាយបានជាសះ ខ្លះៗ តែគ្រូពេទ្យនិយាយថា ភ្លើងសាំងបានឆេះដល់គ្រឿងក្នុង រលាកសួតធ្ងន់ រហូតដល់យប់ថ្ងៃទី១៤ មិថុនា កូនស្រីរបស់លោកក៏បានទទួលមរណភាព ។ ពិតជាគួរឱ្យសោកស្តាយជីវិតនាងជាទីបំផុត សពកូនស្រីត្រូវបានដឹកមករៀបចំធ្វើបុណ្យតាមប្រពៃណី នៅភូមិជ្រោយថ្ម សង្កាត់បឹងកុក ក្រុងកំពង់ចាម ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]