រាជធានីភ្នំពេញ ៖ ស្រ្តីប្រកបរបរផ្លូវភេទចំនួន៦នាក់ ត្រូវអាជ្ញាធរខណ្ឌទួលគោកឃាត់ខ្លួនកាលពីវេលាម៉ោង១១និង៣០យប់ថ្ងៃទី១២ មិថុនា ខណៈស្រ្តីទាំងនោះឈរបោយដៃហៅម៉ូយនៅតាមដងផ្លូវធ្វើឱ្យបាត់បង់សណ្តាប់ធ្នាប់សាធារណៈរួចហើយក៏បញ្ជូនទៅកាន់មន្ទីរសង្គមកិច្ចរាជធានី ព្រឹកថ្ងៃទី១៣ មិថុនា ។
តាមមន្រ្តីប៉ូលិសឱ្យដឹងថា ស្រ្តីប្រកបរបរផ្លូវភេទទាំងនេះត្រូវបានគណៈបញ្ជាការឯកភាពខណ្ឌទួលគោកដឹកនាំដោយលោកសាំង សុភៈវិចិត្រ អភិបាលរងខណ្ឌ ចុះចាប់ប្រមូលនៅតាមដងផ្លូវនានាពេលដែលស្រ្តីទាំងនោះឈរបោយដៃហៅម៉ូយធ្វើឱ្យបាត់បង់សណ្តាប់ធ្នាប់សាធារណៈ។ ស្រ្តីទាំងនោះមាន៣នាក់ត្រូវបានឃាត់ខ្លួននៅតាមផ្លូវលេខ២៧៣(ទំនប់ទួលគោក) សង្កាត់បឹងកក់ទី១ និង៣នាក់ទៀតឃាត់ខ្លួននៅតាមផ្លូវលេខ៥៩៨ តំបន់ត្រឡោកបែកក្នុងសង្កាត់ទឹកល្អក់ទី១ ខណ្ឌទួលគោក ។
គួររំលឹកថា បញ្ហាស្រ្តីប្រកបរបរផ្លូវភេទជាកង្វល់យ៉ាងខ្លាំងសម្រាប់អាជ្ញាធរខណ្ឌទួលគោក ដែលកន្លងមកស្រ្តីទាំងនោះត្រូវសមត្ថកិច្ចចាប់ប្រមូលបញ្ជួនទៅអប់រំជាច្រើនលើកមកហើយ ប៉ុន្តែស្រ្តីទាំងនោះបានត្រឡប់មកវិញបន្តប្រកបរបរលក់ខ្លួនដដែល ហើយឈរបោយដៃធ្វើឱ្យបាត់បង់សណ្តាប់ធ្នាប់តាមដងផ្លូវនិងប៉ះពាល់ដល់វប្បធម៌និងប្រពៃណីខ្មែរ ។ មន្ត្រីសមត្ថកិច្ចបានឱ្យដឹងថា ការចាប់ប្រមូលស្រ្តីប្រកបរបរផ្លូវភេទដូចវែកចក ។ បើសិនមិនចាប់ឬមិនចុះរៀបចំសណ្តាប់ធ្នាប់ទេ នៅតាមដងផ្លូវខ្លះនាពេលយប់គឺជាទីផ្សារស្រ្តីរកស៊ីផ្លូវភេទឈរបោយដៃប្រសេចប្រសាចយ៉ាងអនាធិបតេយ្យបំផុត ។
នៅក្នុងខណ្ឌទួលគោក មានកំណាត់ផ្លូវចំនួន៤ជាតំបន់ដែលស្ត្រីរកស៊ីផ្លូវភេទឈរបោយដៃគឺវិថីព្រះមុនីរ៉េតក្បែរសណ្ឋាគារឈូកទិព្វ ក្នុងសង្កាត់ផ្សារដើមគ ផ្លូវលេខ២៧១គល់ស្ពានស្ទឹងមានជ័យ សង្កាត់បឹងសាឡាង ផ្លូវលេខ៥៩៨(ត្រឡោកបែក)សង្កាត់បឹងកក់ទី២ និងសង្កាត់ទឹកល្អក់ទី១ និងផ្លូវលេខ២៧៣ ទំនប់ទួលគោកសង្កាត់បឹងកក់ទី១ ខណ្ឌទួលគោក ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
