រាជធានីភ្នំពេញ ៖ ស្របពេលដែលកំពុងកសាងកេរ្តិ៍ឈ្មោះល្បីល្បាញ និងក្តោបក្តាប់ប្រជាប្រិយភាពជាតារាចម្រៀងកំពូលក្នុងផលិតកម្ម សាន់ដេនោះ តារាចម្រៀងល្បីឈ្មោះលោកខេមរៈ សិរីមន្ត នាពេលថ្មីៗនេះបានលេចឮនូវព័ត៌មានពីមាត់មួយទៅមាត់មួយថា តារាចម្រៀងរូបនេះនិងប្អូនស្រី គឺខេមរៈ ស្រីពៅ គ្រោង នឹងចាកចេញពីទ្រនំចាស់ទៅកាន់ផលិតកម្មថ្មីដែលអាចជាផលិតកម្ម ហង្សមាស ។
ប្រភពក្រៅផ្លូវការបានបញ្ជាក់ថា ខណៈពេលដែលប្រជាប្រិយភាពរបស់សិរីមន្ត កាន់តែល្បីខ្លាំងឡើងៗនោះ លោកក៏មានបំណងជួយជំរុញប្អូនស្រីរបស់លោកឱ្យមានកេរ្តិ៍ឈ្មោះ បោះសំឡេងក្នុងវិស័យសិល្បៈចម្រៀងនេះផងដែរ ។ តែអ្វីដែលលោករំពឹងទុកនោះ បែរជាផ្ទុយស្រឡះដោយសារតែផលិតកម្មសាន់ដេ ហាក់មិនសូវជួយជ្រោមជ្រែងលើកស្ទួយកេរ្តិ៍ឈ្មោះរបស់ប្អូនស្រី លោក ដូចតារាចម្រៀងស្រីឯទៀត ដូចជា សុខ ពិសី និងអ៊ីវ៉ា ដែលស្ថិតក្នុងទ្រនំតែមួយ ។
ប្រភពដដែលបានបន្តថា រឿងរ៉ាវនេះជាហេតុធ្វើឱ្យសិរីមន្ត មានការអាក់អន់ស្រពន់ចិត្តយ៉ាងខ្លាំងជាមួយខាងផលិតកម្ម ហើយមានគម្រោងដឹកដៃប្អូនស្រីចាកចេញពីទ្រនំសាន់ដេ ទៅរកផលិតកម្មថ្មីមួយទៀត ត្រូវបានគេផ្តោតថា ជាផលិតកម្មហង្សមាស ដែលលោកសង្ឃឹមថា នឹងអាចជួយស្តារកេរ្តិ៍ឈ្មោះប្អូនស្រីរបស់លោកឱ្យមានកេរ្តិ៍ ឈ្មោះល្បីល្បាញដូចតារាចម្រៀងស្រីដទៃទៀត ។
ប៉ុន្តែជុំវិញបញ្ហាខាងលើនេះ លោកខេមរៈ ភារុណ ដែលជាបងប្រុសបង្កើត និងជាអ្នកនាំពាក្យឱ្យតារាចម្រៀងខេមរៈ សិរីមន្ត នោះ បានបកស្រាយជាមួយកោះសន្តិភាពតាមរយៈទូរស័ព្ទកាលពីថ្ងៃទី១៣ មិថុនា នេះថា ជុំវិញពាក្យចចាមអារ៉ាមដែលបានកើតឡើងលើប្អូនរបស់លោកនេះ គឺលោកមិនបានដឹងទាល់តែសោះ។ លោកបន្តថា ចំពោះរូបលោកផ្ទាល់ លោកក៏ចង់ដឹងថា តើប្រភពដែលលេចឮនេះចេញមកពីណា ហើយគេប្រឌិតឡើងក្នុងបំណងអ្វី ។ លោកបញ្ជាក់ថា ការពិតប្អូនប្រុសរបស់លោកខេមរៈ សិរីមន្ត មិនមានគោលបំណងណាមួយចង់ចាកចេញពីផលិតកម្មសាន់ដេនោះឡើយ ខណៈពេលដែលកេរ្តិ៍ឈ្មោះប្អូនប្រុសរបស់លោកកំពុងតែមានសន្ទុះ កាន់ តែខ្លាំងក្នុងទ្រនំមួយនេះ ។ លោកបន្ថែមថា បើនិយាយថា ខេមរៈ សិរីមន្ត ចាកចេញពីសាន់ដេទៅចូលផលិតកម្មហង្សមាសនោះវារឹតតែមិនអាច ទៅរួចបានឡើយ ព្រោះផលិតកម្មហង្សមាស គេមានតារាចម្រៀងល្បីៗរបស់គេ រួចទៅហើយដូចជាលោកព្រាប សុវត្ថិ និងកញ្ញាឱក សុគន្ធកញ្ញា ។ល។
លោកបញ្ជាក់ថា ប្រសិនបើសិរីមន្ត ទៅជ្រកនៅហង្សមាសនោះ អាចធ្វើឱ្យកេរ្តិ៍ឈ្មោះរបស់សិរីមន្ត ស្ថិតនៅក្រោមតារាចម្រៀងទាំងនោះ ខណៈដែលសិរីមន្ត ស្ថិតនៅក្នុងលំដាប់តារាចម្រៀងកំពូល និងឈានមុខគេក្នុងផលិតកម្មសាន់ដេនោះ ។ ទោះបីជាយ៉ាងណាលោកខេមរៈ ភារុណ នៅតែអះអាងថា សិរីមន្ត មិនអាចចាកចេញពីសាន់ដេឡើយ ហើយពាក្យដែលលេចឮនេះគឺគ្រាន់តែជាពាក្យចរចាអារ៉ាមប៉ុណ្ណោះ ។កន្លងមកលោកក៏ធ្លាប់បានឮខ្លះដែរ តែលោកមិនសូវជាចាប់អារម្មណ៍ឡើយ ហើយលោកក៏មិនមានពេលឆ្លើយតបរឿងរ៉ាវទាំងនោះដែរ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
