រាជធានីភ្នំពេញ ៖ វេលាម៉ោង៩និង១៥នាទីយប់ថ្ងៃទី១២ មិថុនា មានករណីផ្ទុះអាវុធធ្វើឱ្យផ្អើលឆោឡោកកស្ទះចរាចរប្រមាណ២០ ទៅ៣០នាទីដោយសារអ្នកធ្វើដំណើរតាមផ្លូវនាំគ្នាចោមរោមមើល ព្រមទាំងប៉ូលិសចរាចរណ៍ឈរជើងនៅគោលដៅជិតកន្លែងកើតហេតុបាន ទៅសាកសួរប៉ូលិសក្រសួងមហាផ្ទៃស្លៀកពាក់ស៊ីវិលថា បាញ់ច្រើនគ្រាប់រឿងអ្វី? ប៉ូលិសក្រសួងមហាផ្ទៃប្រាប់ថា យើងជាប៉ូលិសព្រហ្មទណ្ឌក្រសួងមហាផ្ទៃ លោកឯងស័ក្តិប៉ុន្មានចេះមកសួរនាំ?
ភ្លាមៗនេះធ្វើឱ្យប៉ូលិសមូលដ្ឋានដែលស្លៀកពាក់ ឯកសណ្ឋានត្រឹមត្រូវខឹងតូចចិត្តយ៉ាងខ្លាំងក៏កើតទៅជារឿងឈ្លោះ ប្រកែកគ្នាបែកផ្សែង។ ហេតុការណ៍នេះបង្កទៅជាទំនាស់ពាក្យសម្តីរវាងសមត្ថកិច្ចទាំងពី ស្ថាប័ន រហូតចង់វាស់ដីបាញ់គ្នាទៀតផង ។ ករណីនេះកើតឡើងនៅមុខធនាគារអេស៊ីដា តាមបណ្តោយវិថីព្រះមុនីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក ។
តាមប្រភពព័ត៌មានបានឱ្យដឹងថា មុនពេលកើតហេតុប៉ូលិសព្រហ្មទណ្ឌក្រសួងមហាផ្ទៃមួយក្រុមស្លៀក ពាក់ស៊ីវិលបានដេញចាប់មុខសញ្ញាចោរឆក់មកដល់កន្លែងកើតហេតុ ខាងលើរួចបានបាញ់គំរាមចំនួន៤ទៅ៥គ្រាប់ដោយប្រើកាំភ្លើងខ្លី ចាប់បានជនសង្ស័យ២នាក់ និងម៉ូតូ១គ្រឿង ។ បន្ទាប់មកប៉ូលិសព្រហ្មទណ្ឌនោះបាននាំគ្នាឡើងជិះម៉ូតូបម្រុង ចេញទៅវិញ តែមានម្នាក់ជ្រុះបាត់កូនសោម៉ូតូចេញទៅមិនកើត ។ រវល់តែដើររកកូនសោម៉ូតូប៉ូលិសចរាចរណ៍ដែលប្រចាំការនៅគោលដៅ ជិតកន្លែងកើតហេតុបានទៅដល់ ហើយសួរថា មានរឿងអី?
ពេលនោះស្រាប់តែប៉ូលិសព្រហ្មទណ្ឌក្រសួង មហាផ្ទៃដែលស្លៀកពាក់ស៊ីវិលនោះសួរបកវិញថា អ្នកឯងស័ក្តិប៉ុន្មានបានជាចេះមកសួរនាំខ្ញុំជាប៉ូលិស ព្រហ្មទណ្ឌក្រសួងមហាផ្ទៃ? ពេលឮថា អ្នកឯងស័ក្តិប៉ុន្មានធ្វើឱ្យប៉ូលិសចរាចរណ៍មូលដ្ឋានដែល ស្លៀកពាក់ឯកសណ្ឋានត្រឹមត្រូវនោះខឹងយ៉ាងខ្លាំងក៏តបវិញថា ចោរ ឬជនសង្គមងងឹតក៏ស្លៀកពាក់ស៊ីវិលមានវិទ្យុទាក់ទង និងកាំភ្លើងដែរ...ដូច្នេះមើលមិនដឹងថា ជាសមត្ថកិច្ច ឬស៊ីវិល ឬចោរនោះទេ ប៉ុន្តែខ្ញុំស្លៀកពាក់ឯកសណ្ឋានត្រឹមត្រូវតំណាងនគរបាលជាតិរបស់ កម្ពុជាបំពេញភារកិច្ចក្នុងដែនសមត្ថកិច្ចរបស់ខ្លួន ហេតុអ្វីក៏លោកស្លៀកពាក់ស៊ីវិលមកប្រមាថខ្ញុំ ?
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
