រាជធានីភ្នំពេញ ៖ យុវជន៣នាក់ដែលជិះម៉ូតូចេញពីផ្លូវលំគេចរោងបុណ្យមួយបាន ជ្រុលទៅបុកចំពីមុខរថយន្តហ៊ីយ៉ាន់ដាយ បណ្តាលឱ្យអ្នកបើកម៉ូតូដួលបែងពងស្វាស ឯអ្នកជិះពីក្រោយម្នាក់បែកក្បាល និងម្នាក់ទៀតរបួសស្រាល ។ គ្រោះថ្នាក់នេះកើតឡើងកាលពីវេលាម៉ោង១១និង៤០នាទីព្រឹក ថ្ងៃទី១០ មិថុនា លើផ្លូវលេខ៣៧១ ស្ថិតក្នុងភូមិក្បាលទំនប់ សង្កាត់បឹងទំពុន ខណ្ឌមានជ័យ ។
ប្រភពព័ត៌មានពីកន្លែងកើតហេតុឱ្យដឹងថា ម៉ូតូសង់កូរ៉េ ជិះឌុបគ្នា៣នាក់ចេញពីផ្លូវលំ ក្នុងស្ថានភាពស្រវឹងឆ្ពោះទៅផ្លូវលេខ៣៧១ បត់ទៅជើង ។ ស្របពេលនោះមានរោងបុណ្យមួយនៅខាងស្តាំដៃ ទើបម៉ូតូនោះគេចជ្រុលទៅបុកចំពីមុខរថយន្តហ៊ីយ៉ាន់ដាយ បើកតាមផ្លូវលេខ៣៧១ ពីជើងទៅត្បូង ព្រោះតែបាំងមើលមិនឃើញ ។
អ្នកបើកម៉ូតូសង់កូរ៉េឈ្មោះ រិទ្ធិ ភេទប្រុស អាយុ៣២ឆ្នាំ ឯអ្នកជិះពីក្រោយឈ្មោះម៉េត ភេទប្រុស អាយុ៣២ឆ្នាំ និងម្នាក់ទៀតឈ្មោះធី ភេទប្រុស អាយុ៣៥ឆ្នាំ ។ អ្នកទាំង៣ជាជាងសំណង់ ស្នាក់នៅក្នុងភូមិបុរីកម្មករ សង្កាត់ដង្កោ ខណ្ឌដង្កោ មានស្រុកកំណើតនៅខេត្តកំពង់ស្ពឺ ។
ជនរងគ្រោះត្រូវមិត្តភក្តិដឹកតាមម៉ូតូយក ទៅព្យាបាលនៅគ្លីនិកឯកជន ។ ចំណែកម៉ូតូរងការខូចខាតផ្នែកខាងមុខ និងរថយន្តត្រូវសមត្ថកិច្ចយកទៅរក្សាទុកនៅខណ្ឌមានជ័យ រង់ចាំដោះស្រាយតាមនីតិវិធី ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
