ខេត្តស្វាយរៀង ៖ សមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ បានចាប់ខ្លួនបុរសម្នាក់ជាប់ពាក់ព័ន្ធក្នុងរឿងឆបោកម៉ូតូ កាលពីវេលាម៉ោង៥និង៣០នាទីល្ងាច ថ្ងៃទី៧ មិថុនា នៅក្នុងក្រុងស្វាយរៀង ។ ជនដែលត្រូវចាប់ខ្លួននោះ ឈ្មោះ ម៉ឹង ធាង អាយុ៥០ឆ្នាំ មានទីលំនៅភូមិអង្គសាលា ឃុំចំបក់ ស្រុកស្វាយជ្រំ ជាកសិករ ។
លោកវរសេនីយ៍ត្រី កុយ សុភាព នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបានឱ្យដឹងថា យោងតាមពាក្យបណ្តឹងរបស់ឈ្មោះ សួន សុភ័ក្រ ភេទប្រុស អាយុ៤០ឆ្នាំ មានទីលំនៅភូមិខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល បានរៀបរាប់ថា កាលពីថ្ងៃទី២ មីនា មានបុរសម្នាក់ឈ្មោះ ពៅ ចិន្តា ហៅ ស្នែ អាយុ៣៩ឆ្នាំ បានមកសួរទិញម៉ូតូរបស់ខ្លួន ម៉ាកសេ១២៥ ពណ៌ក្រហម ស៊េរីឆ្នាំ២០០៨ ហើយក្រោយពេលតថ្លៃត្រូវគ្នាឈ្មោះ ចិន្តា ហៅ ស្នែ ក៏បានសុំ ជិះម៉ូតូយកទៅឱ្យប្រពន្ធមើលនៅឯផ្ទះសិនដោយមិនទាន់បានឱ្យ លុយនោះទេ ។
ដោយទុកចិត្តថា ជាមនុស្សស្គាល់គ្នារូបគាត់ក៏ព្រមឱ្យយកម៉ូតូទៅ ប៉ុន្តែពេលបានម៉ូតូហើយឈ្មោះ ស្នែ នោះក៏យកទៅបាត់តែម្តង ។ ប្រភពដដែលបន្តថា រហូតមកដល់ថ្ងៃទី៥ មិថុនា ក៏មានគេឃើញម៉ូតូដែលបាត់នេះ គេកំពុងជិះនៅក្រុងស្វាយរៀង ហើយពេលសមត្ថកិច្ចឃាត់សាកសួរទើបដឹងថា ឈ្មោះ មុឹង ធាង បានយកមកលក់ឱ្យក្នុងតម្លៃ ៦០០ ដុល្លារ ទើបសមត្ថកិច្ចឈានទៅចាប់ខ្លួនជនសង្ស័យតែម្តង ។
ក្រោយពេលត្រូវចាប់ខ្លួនជនសង្ស័យ ម៉ឹង ធាងបានឆ្លើយនៅចំពោះមុខសមត្ថកិច្ចថា ខ្លួនមិនបានលក់ម៉ូតូនោះទេ គឺឈ្មោះ ពៅ ចិន្តា ហៅស្នែ ជាអ្នកលក់ រីឯរូបគេ គ្រាន់តែមកជាមួយប៉ុណ្ណោះ ហើយពេលលក់ម៉ូតូនោះរូបគេក៏មិនបានចូលរួមលក់ដែរ គឺឈ្មោះស្នែនោះទៅលក់ម៉ូតូជាមួយបុរសម្នាក់ទៀត ឈ្មោះអាខ្មៅ ដោយទុករូបគេ ឱ្យនៅចាំរង្វង់មូលវិមានឯករាជ្យខេត្ត លុះពេលលក់បានលុយហើយទើបឈ្មោះស្នែ និងអាខ្មៅ មកយករូបគេទៅផឹកស៊ីជាមួយ ។
ទោះជាជនសង្ស័យ ម៉ឹង ធាង ខំប្រឹងឆ្លើយដោះសាយ៉ាងណាក៏ដោយរូបគេនៅតែជាជនសង្ស័យដដែល ហើយត្រូវសមត្ថកិច្ចកសាងសំណុំរឿងបញ្ជូនខ្លួនជាមួយវត្ថុតាងប្រគល់ ឱ្យសមត្ថកិច្ចក្រុងតាខ្មៅចាត់ការបន្តនៅវេលាម៉ោង១០ព្រឹក ថ្ងៃទី៨ មិថុនា ។
រីឯជនសង្ស័យ ពៅ ចិន្តា ដែលជាអ្នកបោកយកម៉ូតូពីជនរងគ្រោះពេលនេះសមត្ថកិច្ចក៏កំពុងតែតាមរកចាប់ខ្លួន ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
