រាជធានីភ្នំពេញ ៖ តារាសម្តែងនិងបង្ហាញម៉ូដ កញ្ញាសារាយ សក្ខិណា បាននិយាយប្រាប់កោះសន្តិភាពថា ការជ្រើសរើសគូស្រករ គឺនាងមិនរើសអើងចំពោះបុរសស្អាត ឬមិនស្អាត មានឬក្រទេ បុ៉ន្តែឱ្យតែគេស្មោះចំពោះនាង ដឹងសុខទុក្ខនាង និងគ្រួសារនាង គឺទទួលយកបាន ។
ទោះបីជាយ៉ាងណាក្តី នាងបញ្ជាក់ថា ពេលនេះនាងមិនទាន់គិតគូរ ឬចង់បានគូស្រករនៅ ឡើយទេ ព្រោះនាងកំពុងងប់ងល់នឹងអាជីពសិល្បៈ ខ្លាំងណាស់ ហើយនាងចង់ប្រឡូកក្នុងអាជីពនេះឱ្យបានយូរបន្តិច ។ ម្យ៉ាងទៀត អាស្រ័យដោយជីវិតសិល្បៈរបស់នាងកំពុងតែរីកចម្រើនផងនោះ ដូច្នេះនាងចង់បន្តអាជីពនេះដើម្បីសន្សំលុយឱ្យបានច្រើន បន្តិចមុននឹងគិតគូររឿងជីវិតគូស្រករ ។
ការលើកឡើង បញ្ហាជីវិតផ្ទាល់ខ្លួនរបស់កញ្ញាសារាយ សក្ខិណា គឺក្នុងពេលនាងចូលរួមក្នុងពិធីបង្ហាញផលិតផល ទូរស័ព្ទ Vertu ស៊េរីថ្មីដែលមានតម្លៃជាង១ម៉ឺនដុល្លារ នៅណ្ឋាគារសូហ្វីតែលភ្នំពេញ ភូគីត្រា កាលពីពេលថ្មីៗនេះ ។
ក្នុងវ័យ២២ឆ្នាំ សារាយ សក្ខិណា បានបង្ហាញនូវភាពងប់ងល់នឹងអាជីពសិល្បៈដោយនិយាយថា ទោះជានាងមានស្វាមី ឬវ័យកាន់តែចាស់ក៏ដោយ ក៏នាងមិនបោះបង់ចោលជីវិតសិល្បៈដែរ ឱ្យតែផលិតកម្មត្រូវការហៅនាងទៅថត ទោះជាដើរតួម្តាយ ឬជីដូនក៏នាងព្រមដែរ ។ពាក់ព័ន្ធនឹងបច្ចុប្បន្នភាពនៃជីវិតសិល្បៈ សារាយ សក្ខិណា ឱ្យដឹងថា នាងកំពុងរវល់ខ្លាំងណាស់សម្រាប់ការសម្តែងភាពយន្ត ការសម្តែងតាមបណ្តាស្ថានីយទូរទស្សន៍ និងការថតផ្សាយ បង្ហាញម៉ូដផលិតផលជាដើម ។ និយាយរួមគឺ ការងារសិល្បៈរបស់នាងមមាញឹកណាស់ ហើយស្ទើរតែរកពេលទំនេរគ្មាន ។ អាស្រ័យដោយការងារមមាញឹកនោះហើយ ទើបសារាយ សក្ខិណា និយាយទាំងទឹកមុខញញឹមថា បញ្ហាផលប្រយោជន៍ ឬប្រាក់ចំណូលក៏ច្រើនគួរសមដែរ ។
ជីវិតសិល្បៈរបស់សារាយ សក្ខិណា គឺផ្តើមចេញពីការចូលរួមប្រកួតប្រជែងហ្វ្រេស៊ីប៊យ និងហ្វ្រេស៊ីហ្គើល ឆ្នាំ២០០៦ ហើយជាប់ចំណាត់ថ្នាក់លេខ៤ ខាងរូបស្អាត ។ ក្រោយមកនាងបានប្រកួតកញ្ញាឯកប៉ាឡាហ្ស៊ូ ទទួ លបានចំណាត់ថ្នាក់លេខ១ និងឈ្នះពានតារាសើចស្អាត ។ សក្ខិណា បានចូលរួមសម្តែងភាពយន្តជាលើកដំបូងក្នុងរឿង សមុទ្របេះដូង។
បន្ទាប់មកនាងត្រូវផលិតកម្មជាច្រើន អញ្ជើញទៅថតភាពយន្ត-វីដេអូ ជាច្រើនរឿងដែលធ្វើឱ្យនាងទទួលបានភាពល្បីឈ្មោះ យ៉ាងឆាប់រហ័ស។ សារាយ សក្ខិណា និយាយថា អ្វីទាំងអស់នេះគឺបានមកពីការគាំទ្រ និងផ្តល់តម្លៃដោយទស្សនិកជនទាំងអស់ ហើយនាងសូមសម្តែងនូវការអរគុណ និងដឹងគុណចំពោះការគាំទ្ររបស់ទស្សនិកជនទាំងអស់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
