អ្នកបើកបររថយន្ដទំនើបជាក្មេងស្រីស្រស់ស្អាតម្នាក់មានអាយុប្រមាណ១៨ឆ្នាំ់ និងក្មេងប្រុសម្នាក់រួមដំណើរជាមួយផងបានបើកបុកម៉ូតូ១គ្រឿងពេញទំហឹង បណ្ដាលឱ្យបុរសម្នាក់រងរបួស។ ហេតុការណ៍នេះកើតឡើងកាលពីវេលាម៉ោង១០និង៣០នាទីយប់ថ្ងៃទី២៩ មករា ខាងលិចស្ពានអាកាស៧មករា ក្នុងសង្កាត់ទឹកថ្លា ខណ្ឌសែនសុខ ។
យោងតាម ភ្នំពេញប៉ុស្ដិ៍ ចេញផ្សាយថ្ងៃ ៣១ ខែមករា បានអោយដឹងថា អ្នកចោមរោមមើលនោះបានឲ្យដឹងថា អ្នកបើកបរនោះ គាត់ជាអ្នកចម្រៀង យ៉ុង ចាន់កន្និកា គាត់បានបើករថយន្តបុកអ្នកដំណើរម្នាក់ ហើយក៏បានរត់គេច គេទើបតែស្ទាក់បាននៅទីនេះ។ តែកញ្ញា យ៉ុង ចាន់កន្និកា បានប្រកែកថា នាងមិនមែនជាអ្នកក្នុងឡាននោះទេ គ្រាន់ជាការយល់ច្រលំ។
សូមមើលអត្ថបទដើមរបស់សារព័ត៌មានភ្នំពេញប៉ុស្ដិ៍ នៅខាងក្រោម៖
"ភ្នំពេញៈ អ្នកដំណើរបាននាំគ្នាចោមរោមអ៊ូឈូឆរជុំវិញរថយន្តមួយគ្រឿង ហើយម្នាក់ៗសុទ្ធតែនិយាយអះអាងយ៉ាងច្បាស់ៗថា តារាចម្រៀង យ៉ុង ចាន់កន្និកា បានបើកបររថយន្តបុកម៉ូតូមួយគ្រឿងបណ្តាលឲ្យអ្នកជិះម៉ូតូរងរបួស ធ្ងន់ ហើយបានបើករត់គេចខ្លួន តែត្រូវបងប្អូនជនរងគ្រោះតាមឃាត់រថយន្តនោះបាន ខណៈដែលរថយន្តមិនអាចបន្តដំណើរទៅមុខបានទៀតដោយសារបែកកង់មុខ ខាងស្តាំ។
អ្នកចោមរោមមើលនោះបានឲ្យដឹងថា អ្នកបើកបរនោះ គាត់ជាអ្នកចម្រៀង យ៉ុង ចាន់កន្និកា គាត់បានបើករថយន្តបុកអ្នកដំណើរម្នាក់ ហើយក៏បានរត់គេច គេទើបតែស្ទាក់បាននៅទីនេះ។ តែទោះបីជាយ៉ាងណានៅក្នុងស្ថានភាពភ្លាមៗនោះ ភ្នំពេញ ប៉ុស្តិ៍ មិនអាចសុំការសាកសួរពីអ្នកបើកបរនោះបានទេ ដោយសារនាងស្ថិតនៅក្នុងរថយន្តបិទទ្វារជិត មិនព្រមចុះ និងមានលក្ខណៈងងឹតពេក។
មិត្តភក្តិជនរងគ្រោះជាច្រើននាក់ដែលបានជិះម៉ូតូតាមរថយន្តបើក គេចនោះបាននិយាយថា មិត្តភក្តិរបស់ខ្លួនបានទទួលរងគ្រោះថ្នាក់យ៉ាងដំណំ ហើយប្រហែលជាអាចនឹងបាក់ចង្កេះក៏មិនដឹង ព្រោះពេលលើកគាត់ឲ្យអង្គុយ គាត់ស្រែកឈឺចង្កេះយ៉ាងខ្លាំង។
បងប្អូនអ្នករងគ្រោះបានឲ្យដឹងថា គ្រោះថ្នាក់ចរាចរណ៍នេះ បានបង្កឡើងដោយរថយន្តម៉ាក វីហ្គោ ពណ៌ខ្មៅ ពាក់ស្លាកលេខ ភ្នំពេញ 2I 7858 បានបុកនឹងម៉ូតូម៉ាកស្មាស់ នៅត្រង់ចំណុចខាងលិចស្ពានអាកាស៧មករា ពេទ្យលោកសង្ឃ ស្ថិតក្នុងសង្កាត់ទឹកថ្លាខណ្ឌសែនសុខកាលពីវេលាម៉ោង១០ និង៣០នាទីយប់ថ្ងៃទី២៩ មករា។ ប៉ុន្តែក្រោយហេតុការណ៍បុកនេះ រថយន្តបង្កហេតុមិនបានឈប់នៅមួយកន្លែងទេ ទោះបីជាបែកកង់មុខខាងស្តាំក្តី ពោលគឺរថយន្តបានបើករត់គេចតាមបណ្តោយផ្លូវកម្ពុជាក្រោម តែរថយន្តដែលមាននារីបើកបរ ហើយត្រូវគេអះអាងថា ជាតារាចម្រៀង យ៉ុង ចាន់កន្និកា នោះ ត្រូវបានបងប្អូនជនរងគ្រោះស្ទាក់ចាប់បាននៅម្តុំភ្លើងស្តុប អូតែលស នៅទល់មុខសណ្ឋាគារអេស៊ានប៉ាលេស ស្ថិតនៅក្នុងសង្កាត់អូរឫស្សី៤ ខណ្ឌ៧មករា។
បន្ទាប់ពីស្ទាក់ឲ្យរថយន្តឈប់ អ្នកបើកបរស្រីវ័យក្មេងដែលមានបុរសម្នាក់រួមដំណើរដែរនោះ មិនព្រមចេញពីរថយន្តឡើយ ទោះបីជារថយន្តប៉ូលិសខណ្ឌ៧មករាមកស្ទូចក៏ដោយ។
នៅពេលនោះមន្ត្រីប៉ូលិសឲ្យដឹងថា យករថយន្តទៅរក្សាទុកនៅខណ្ឌដើម្បីរង់ចាំការដោះស្រាយ។
ប៉ុន្តែកាលពីម្សិលមិញលោក យិន សាន អធិការខណ្ឌ៧មករាបានឲ្យដឹងថា សំណុំរឿងនេះលោកបានបញ្ជូនទៅប៉ូលិសក្រុងជាអ្នកដោះស្រាយ មន្ត្រីប៉ូលិសខណ្ឌ៧មករា គ្រាន់តែជាអ្នកជួយចាប់ និងឃាត់រថយន្តទុកតែប៉ុណ្ណោះ។
លោក ហេង ច័ន្ទធារី ប្រធានប៉ូលិសចរាចរណ៍ជើងគោករាជធានីភ្នំពេញមិនអាចទាក់ទងសុំការ បំភ្លឺបានទេ កាលពីម្សិលមិញព្រោះទូរស័ព្ទរបស់លោកគ្មានអ្នកលើក។
រីឯតារាចម្រៀង យ៉ុង ចាន់កន្និកា ក៏មិនអាចសុំការបកស្រាយបានដែរ ព្រោះនាងមិនលើកទូរស័ព្ទ៕"
សូមចុច ភ្នំពេញប៉ុស្ដិ៍ ដើម្បីមើលអត្ថបទដើម។
ប៉ុន្តែកញ្ញា យ៉ុង ចាន់កន្និកា បានចេញមកបកស្រាយថាមិនមែន ជាកញ្ញាទេក្នុង គេហទំព័រដើមអម្ពិល។
កញ្ញា យ៉ុង ចាន់កន្និកា បានថ្លែងប្រាប់មជ្ឈមណ្ឌលព័ត៌មានដើមអម្ពិល កាលពីព្រឹកថ្ងៃ ទី៣១ ខែមករា ឆ្នាំ២០១២ ទាំងអារម្មណ៍ភ្ញាក់ផ្អើលថា " គ្រាន់តែខ្ញុំភ្ញាក់ពីដំណេកភ្លាម មិត្តភ័ក្តបានសួរខ្ញុំពីរឿងគ្រោះថ្នាក់ចរាចរណ៍ ស្រាប់ តែខ្ញុំភ័ន្តភាំង មិនដឹងនិយាយថាយ៉ាងម៉េច ព្រោះខ្ញុំអត់ដឹងខ្លួនទាល់តែសោះ ថាមាន រឿងនេះកើតឡើងចំពោះខ្ញុំ ដល់ពេលអីច្ចឹងខូចឈ្មោះខ្ញុំទៀត "។
យ៉ុង ចាន់កន្និកា បានបញ្ជាក់ប្រាប់ទៀតថា " យប់នោះខ្ញុំទៅច្រៀងនៅហាងកន្លែងធ្វើការរបស់ខ្ញុំ នៅត្រើយម្ខាង ឈ្មោះមេគង្គប៊ីយូថោវើ ជាមួយប្អូនស្រីដោយជិះរថយន្តម៉ាកកាមរីឆ្លាម ពាក់ស្លាកលេខភ្នំពេញ2M-7813 ខ្ញុំឯណាមានរថយន្តម៉ាកវីហ្គោជិះនោះ ។ តាមការពិតទៅព័ត៌មានដែលចុះផ្សាយហ្នឹងគឺនិយាយមិនពិត គេច្រឡំមនុស្សទាំងស្រុងតែម្តង តើមាននរណាជាសាក្សីខ្លះ ថាឃើញខ្ញុំជាអ្នកបើករថយន្ត? ដល់ពេលព័ត៌មានចុះមកបែបនេះខ្ញុំមិនសុខចិត្តទេ ព្រោះខ្ញុំមិនដឹងខ្លួនសូម្បីបន្តិចណាសោះ ប៉ុន្តែប្រសិនបើខ្ញុំជិះឡានបុកគេមែនក៏ខ្ញុំត្រូវទទួលខុសត្រូវដែរ មិនបើករថយន្តគេចបែបនេះទេ "។
តារាចម្រៀងរាងតូចច្រឡឹង យ៉ុង ចាន់កន្និកា បានបន្ថែមទៀតថា " ពេលវេលាហ្នឹងខ្ញុំកំពុងតែច្រៀង ពេលចប់ ប្រហែលជាម៉ោង៩និង៣០នាទីយប់ ខ្ញុំក៏អង្គុយញ៉ាំអីជជែកគ្នាលេងបន្តិចរហូតដល់ម៉ោងជាង ១០យប់ ទើបខ្ញុំត្រឡប់មកផ្ទះវិញដូចធម្មតា។ គ្មានរឿងអ្វីកើតឡើងចំពោះខ្ញុំទេ ស្រាប់ព័ត៌មានចុះផ្សាយ បែបហ្នឹង ខ្ញុំមិនដឹងធ្វើយ៉ាងម៉េចទេ គឺនិយាយលេងចេញតែម្តង។ ខ្ញុំគិតថាគេច្រឡំមនុស្សទាំងស្រុង ព្រោះអីកាលពីមុន គេក៏ចុះផ្សាយច្រឡំមនុស្សដូចគ្នា ដោយឈ្មោះពេជ្រ សូលីកា ទៅជាច្រឡំឈ្មោះខ្ញុំ (យ៉ុង ចាន់កន្និកា) ទៅវិញ តាមពិតអ្នកដែលបុកគេ ហើយចូលប៉ុស្តិ៍ប៉ូលីសគឺ ពេជ្រ សូលីកាទេ ប៉ុន្តែគេ យល់ច្រឡំថាជាខ្ញុំទៅវិញ រហូតដល់ ខ្ញុំទៅកាន់ស្ថាប័នព័ត៌មាននោះផ្ទាល់ទើបគេចុះផ្សាយបកស្រាយ ឲ្យខ្ញុំវិញ។ ចំពោះបញ្ហានេះខ្ញុំមានសាក្សី គឺមិត្តភ័ក្តនៅក្នុងហាង ព្រោះយប់នោះខ្ញុំអង្គុយរហូតដល់ម៉ោង ជាង១០យប់ទើបត្រឡប់មកផ្ទះអត់អាច មានរឿង ហ្នឹងកើតឡើងទេ "។
សូមចុចលើ ដើមអម្ពិល ដើម្បីអានអត្ថបទដើមលំអិត។
Khmerload គ្រាន់តែអ្នកដកស្រង់ព័ត៌មាននេះ តែប៉ុណ្ណោះ បងប្អូនអាចបញ្ចេញយោបល់ ផ្ទាល់ខ្លួនអ្នក។
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]