​រថយន្ត​ដឹកជ្រូកបែក​កង់ក្រឡាប់​សង្កត់​មនុស្ស​ម្នាក់ស្លាប់​យ៉ាងអាណោច​​អាធ័ម​

ខេត្តព្រះសីហនុ ៖ មនុស្សម្នាក់ស្លាប់ ម្នាក់របួស និង៣នាក់ទៀត ព្រលឹងចុងសក់ បន្ទាប់ពីជួបហេតុការណ៍ ក្រឡាប់រថយន្ត ដឹកជ្រូកមួយគ្រឿង ដោយសារបែកកង់ក្រោយ បង្កឱ្យភ្ញាក់ផ្អើល កាលពីវេលាម៉ោង៥ និង២០នាទីល្ងាច ថ្ងៃទី២៨ ឧសភា ២០១៤ ស្ថិតចំណុចផ្លូវជាតិលេខ៤ ក្នុងភមិតានៃ ឃុំជើងគោ ស្រុកព្រៃនប់ ខេត្តព្រះសីហនុ ។

ប្រភពបានឱ្យដឹងថា ជនរងគ្រោះសុទ្ធតែ ជាកម្មករចាប់ជ្រូក ១-ឈ្មោះអ៊ុន ដារ៉ា អាយុ៣២ឆ្នាំ (ស្លាប់ពេលបញ្ជូនដល់គ្លីនិក) មានទីលំនៅភូមិដំណាក់កន្ទួត ឃុំដំណាក់កន្ទួត ស្រុកកំពង់ត្រាច ខេត្តកំពត ,២-ឈ្មោះភី សាវង្ស អាយុ២៧ឆ្នាំ (របួសធ្ងន់) មានទីលំនៅ ក្នុងភូមិ១ សង្កាត់១ ក្រុងព្រះសីហនុ ។ ចំណែក២នាក់ទៀត រួមទាំងអ្នកបើកបរ មិនត្រូវបានរងរបួសឡើយ ។

ប្រភពបានបន្តថា នៅមុនពេលកើតហេតុ គេឃើញរថយន្តម៉ាក ហ៊ីយ៉ាន់ដាយមួយគ្រឿង ធ្វើដំណើរពីជើងទៅត្បូង លុះមកដល់ចំណុចកើតហេតុ រថយន្តបានបែកកង់ក្រោយ ធ្វើឱ្យរេចង្កូតទៅស្តាំដៃ ធ្លាក់ពីថ្នល់ រួចក្រឡាប់ចាក់ជ្រូកចោលតែម្តង ។ រីឯជនរងគ្រោះទាំងអស់ ត្រូវបានរថយន្តសង្កត់ពីលើថែមទៀត ហើយត្រូវគេរត់ទៅជួយ លើករថយន្តចេញ និងដឹកទៅសង្គ្រោះតែម្តង ។