ខេត្តសៀមរាប ៖ ចោរ២នាក់បានជិះកង់តាមស្ទាក់ប្លន់ស្ត្រីអាជីវករលក់មាស-ប្តូរប្រាក់នៅផ្សារលើក្រុងសៀមរាប បន្ទាប់ពីគាត់វេចខ្ចប់គ្រឿងអលង្ការ និងប្រាក់ចាកចេញពីកន្លែងលក់ដូរធ្វើដំណើរដោយជិះម៉ូតូឌុបទៅកាន់លំនៅឋាន ប៉ុន្តែជិតដល់លំនៅឋានទៅហើយ ក៏ជួបចោរ២នាក់វាយប្លន់តែម្តង បង្កឱ្យមានការភ្ញាក់ផ្អើលកាលពីវេលាម៉ោង៥ល្ងាចថ្ងៃទី៤ មិថុនា ២០១២ ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប។
ស្ត្រីអាជីវករលក់មាស-ប្តូរប្រាក់ម្នាក់នេះឈ្មោះប៊ូ ណង អាយុ២៨ឆ្នាំ ស្នាក់នៅម្តុំកន្លែងកើតហេតុខាងលើ ត្រូវចោរវាយបែកក្បាល និងដណ្តើមយកស្បោងប្រាក់-គ្រឿងអលង្ការទៅបាត់ បន្សល់ទុកការភ្ញាក់ផ្អើល ប៉ុន្តែមិនទាន់ដឹងថា បាត់បង់ប៉ុន្មាននោះទេ ។ តាមប្រភពព័ត៌មានបានឱ្យដឹងថា មុនពេលកើតហេតុស្ត្រីអាជីវករបានវេចខ្ចប់ស្បោងប្រាក់-គ្រឿងអលង្ការជិះម៉ូតូឌុបម៉ាកឌ្រីម C125 ពណ៌ខ្មៅ របស់បុរសម្នាក់ដែលជាម៉ូយធ្លាប់ដឹកស្ត្រីអាជីវករនេះញឹកញាប់ទៅកាន់លំនៅឋាន... លុះចូលតាមផ្លូវលំមួយជិតដល់លំនៅឋានទៅហើយ ស្រាប់តែជួបបុរស២នាក់ ជិះកង់២គ្រឿងមកស្ទាក់ប្លន់ ដោយប្រើកាំភ្លើង២ដើម គឺវែង១ ខ្លី១ ។
ពេលកំពុងភ្ជង់ប្លន់ក៏មានការប្រវាយប្រតប់គ្នាផងដែរ ហើយប្រជាពលរដ្ឋដែលកំពុងផឹកស៊ីនៅក្រោមផ្ទះក្បែរនោះបានស្ទុះមកជួយផងដែរ ប៉ុន្តែត្រូវចោរភ្ជង់ឱ្យនៅស្ងៀមទាំងអស់ ហើយចោរបានវាយ និងភ្ជង់យកម៉ូតូឌ្រីមរត់ឌុបពីបុរសនោះជិះរត់គេចខ្លួនបាត់តែម្តង ។ នៅកន្លែងកើតហេតុគេសង្កេតឃើញបង់កាំភ្លើងខ្លី១ ប៉ុន្តែគ្មានគ្រាប់ទេ ហើយសាក្សីអះអាងថា ពួកចោរពិតជាមានកាំភ្លើងខ្លី១ វែង១ប្រាកដមែន ។
មិនយូរប៉ុន្មានប៉ូលិស-ប៉េអឹមបានទៅដល់កន្លែងកើតហេតុដើម្បីអន្តរាគមន៍ ប៉ុន្តែពួកចោរបានគេចខ្លួនបាត់ស្រមោលទៅហើយ បានត្រឹមតែ ពង្រាយកម្លាំងតាមស្វែងរកចាប់ចោរយ៉ាងដុតដៃ ដុតជើងប៉ុណ្ណោះ ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]