រាជធានីភ្នំពេញ ៖ យុវជន២ក្រុមបានប្រទូស្តរ៉ាយគ្នាបង្កការភ្ញាក់ផ្អើលឆោឡោពេញ ក្រោមស្ពានអាកាសក្បាលថ្នល់ ក្នុងនោះក្រុមមកវាយសីមានគ្នា៦នាក់ និងក្រុមមកផឹកស៊ីមានគ្នាជិត១០នាក់ ដែលហេតុការណ៍នេះកើតឡើងនៅវេលាម៉ោង១០ និង៣០នាទីយប់ថ្ងៃទី២ មិថុនា ស្ថិតក្នុងសង្កាត់ទន្លេបាសាក់ ខណ្ឌចំការមន។
ក្រុមអ្នកវាយសីមានគ្នា៦នាក់ ១-ឈ្មោះឡុង សំអុល ភេទប្រុស អាយុ២៥ឆ្នាំ អតីតជាសន្តិសុខនៅណាហ្គាវើល ស្នាក់នៅផ្ទះលេខ125C ក្រុម៦ សង្កាត់ស្ទឹងមានជ័យ ខណ្ឌមានជ័យ របួសបែកក្បាល ២-ឈ្មោះចាន់ លីលី អាយុ២០ឆ្នាំ ជាប្រពន្ធ (ឡុង សំអុល)ទៅជាមួយដែរមិនមានរងរបួសទេ ៣-ឈ្មោះឯម ខ្លី ភេទប្រុស អាយុ៣២ឆ្នាំ ជាកម្មករសំណង់ របួសពកក្បាល ស្នាក់នៅភូមិដើមចាន់ សង្កាត់ច្បារអំពៅទី២ ខណ្ឌមានជ័យ ៤-ឈ្មោះមន ជីវន្ត ភេទប្រុស អាយុ២៤ឆ្នាំ ស្នាក់នៅជិត ឡុង សំអុល ៥-ឈ្មោះរិទិ្ធ និង៦-ឈ្មោះស ម៉ាប់ ស្នាក់នៅសង្កាត់ច្បារអំពៅ ខណ្ឌមានជ័យ ។ ក្រោយពេលកើតហេតុ អ្នកដែលរងរបួសតិចតួចបាននាំគ្នារត់ខ្ចាត់ខ្ចាយអស់ ។
បើតាមសម្តីឈ្មោះចាន់ លីលី ភេទស្រី អាយុ២០ឆ្នាំ បានឲ្យដឹងថា នៅវេលាម៉ោងខាងលើមិត្តភក្តិដែលនៅសង្កាត់ច្បារអំពៅបានទូរស័ព្ទហៅទៅលេងផ្ទះ រួចហើយបាននាំគ្នាទាំង៦នាក់ទៅអង្គុយលេងនៅក្រោមស្ពានអាកាសក្បាលថ្នល់ ដោយអ្នកខ្លះវាយសី និងខ្លះអង្គុយនិយាយគ្នាលេង ។ ពេលនោះប្តីរបស់នាងឈ្មោះ ឡុង សំអុល ដែលជាអតីតសន្តិសុខយាមនៅណាហ្គាវើល បានពាក់អាវធំខាងក្រៅពណ៌ខ្មៅដែលមានស្លាកណាហ្គាវើលនោះពីលើ លុះពេលវាយសីគាត់បានដោះអាវនោះទុកនៅលើស្មៅ ។ ស្របពេលនោះឈ្មោះស ម៉ាប់ ដែលជាមិត្តភក្តិបានយកអាវនោះទៅពាក់ពីលើហើយដើរទៅនិយាយឌឺដងផ្លែផ្កា ឲ្យមួយក្រុមទៀតដែលមានគ្នាជិត១០នាក់កំពុងអង្គុយផឹកស៊ីនៅក្បែរនោះដែរ ។ ពេលនិយាយផ្លែផ្ការួចហើយ ឈ្មោះ ស ម៉ាប់ បានដើរត្រឡប់មកវិញដោះអាវនោះទុក ចំណែកប្តីនាង ពេលវាយសីហត់ក៏ឈប់សម្រាកម្តង ហើយយកអាវនោះទៅពាក់វិញ ស្រាប់តែក្រុមផឹកស៊ីដើរមកដល់និយាយថា វាយអាអាវខ្មៅនេះឲ្យងាប់ ។
ប្រភពដដែលបន្តទៀតថា ពេលក្រុមផឹកស៊ីដើរមកព្រួតវាយនោះ មិត្តភក្តិដែលនៅលេងវាយសីបានចូលទៅជួយតែមិនឈ្នះដោយសារពួកគេមាន គ្នាច្រើនជាង ទើបនាំគ្នារត់ចែកផ្លូវរៀងខ្លួន នៅសល់តែប្តីនាង ត្រូវជនដៃដល់នាំគ្នាព្រួតវាយរហូតបែកក្បាលទាល់តែនាង ជាប្រពន្ធសំពះអង្វរទើបឈប់វាយ ។ មិនតែប៉ុណ្ណោះពួកគេប្រុងចាប់យកទៅជាមួយទៀត តែមានម្នាក់ក្នុងចំណោមនោះបានឃាត់មិនឲ្យចាប់នាងទេ ។ ក្រោយពេលកើតហេតុជនដៃដល់បាននាំគ្នាចេញទៅបាត់អស់នៅសល់តែអ្នករងរបួស ត្រូវដឹកតាមរ៉ឺម៉កម៉ូតូយកទៅព្យាបាលនៅមន្ទីរពេទ្យព្រះកុសុមៈ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
