រាជធានីភ្នំពេញ ៖ ជនសង្ស័យមួយ ក្រុមត្រូវប៉ូលិសប៉ុស្តិ៍ផ្សារដើមគ ព័ទ្ធចាប់ហើយបានរត់ចូលតាមច្រកឌឿងហែមឡើងកាំជណ្តើរទៅសំងំលើដំបូលផ្ទះជាន់ទីមួយ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន កាលពីវេលាម៉ោង៩យប់ថ្ងៃទី២ មិថុនា ។ រហូតដល់ម៉ោង២រំលងអធ្រាត្រថ្ងៃទី៣ មិថុនា ទើបប្រជាពលរដ្ឋចាប់បានចោរម្នាក់ប្រគល់ឲ្យប៉ូលិសយកទៅដាក់នៅសង្កាត់ទួលស្វាយព្រៃទី២ ដើម្បីសាកសួរ ។
ជាការកត់សម្គាល់នៅពេលរាត្រីរហូតដល់វេលារំលងអធ្រាត្រទិដ្ឋភាពតាមមហាវិថីព្រះមុនីរ៉េតក្នុងសង្កាត់ផ្សារដើមគ ខណ្ឌទួលគោក ជាប់ព្រំប្រទល់សង្កាត់ទួលស្វាយព្រៃទី២ ខណ្ឌចំការមន មានសភាពរញ៉េរញ៉ៃ និងអនាធិបតេយ្យបាត់បង់សន្តិសុខសុវត្ថិភាពដោយសារតែមានស្ត្រីប្រកបរបរផ្លូវភេទឈរចាំបោយដៃហៅម៉ូយ ព្រមជាមួយនោះក៏មានក្រុមចោរមួយក្រុមមានគ្នា៣នាក់ នៅបន្លំខ្លួនលាយឡំជាមួយហ្វូងនារីទាំងនោះចាំធ្វើសកម្មភាពគប់នឹងដុំថ្ម វាយយកកាបូបប្រាក់ទូរស័ព្ទដៃ និងប្លន់យកម៉ូតូជាដើម ។
ជាក់ស្តែងកាលពីចុងខែឧសភា ក្រុមចោរបានប្លន់យកម៉ូតូស្គូពីមួយគ្រឿងដែលជិះទៅឈប់តថ្លៃជាមួយនារីៗទាំងនោះ ហើយត្រូវពួកចោរបានគប់នឹងដុំថ្មបណ្តាលឲ្យដួលម៉ូតូហើយចោរលើកយកម៉ូតូជិះទៅបាត់ ។ ដោយសារតែមានករណីប្លន់យកកាបូបលុយ និងទូរស័ព្ទដៃតែងកើតឡើងជាញឹកញាប់ ប៉ូលិសប៉ុស្តិ៍ផ្សារដើមគចេញប្រតិបត្តិការដេញចាប់ក្រុមចោរប្លន់ទាំងនោះហើយក្រុមចោរបានរត់ទៅពួននៅសង្កាត់ទួលស្វាយព្រៃទី២ ។ លុះពេលប៉ូលិសប៉ុស្តិ៍ទួលស្វាយព្រៃទី២ ដេញទៀតរត់ទៅពួននៅសង្កាត់វាលវង់ ខណ្ឌ៧មករាវិញម្តង ។ តំបន់នេះជាព្រំប្រទល់៣ខណ្ឌ គឺខណ្ឌទួលគោក ខណ្ឌចំការមន និងខណ្ឌ៧មករា ។
បន្ទាប់ពីមានករណីប្លន់យកម៉ូតូអស់ជាច្រើនគ្រឿងកន្លងមក ទើបប៉ូលិសប៉ុស្តិ៍ផ្សារដើមគបានដាក់កម្លាំងតាមឃ្លាំមើលក្រុមចោរដែលនៅលាយឡំជាមួយនារីបោយដៃទាំងនោះ ដោយកំណត់មុខសញ្ញាដឹងថា ក្រុមចោរមានគ្នា៣នាក់ ។ នៅវេលាម៉ោង៩យប់ដោយឃើញមុខសញ្ញាច្បាស់លាស់ហើយ លោកហែម វណ្ណរិទិ្ធ នាយប៉ុស្តិ៍ផ្សារដើមគបានដឹកនាំកម្លាំងចុះទៅបង្ក្រាប ធ្វើឲ្យពួកចោររត់គេចទៅចូលតាមឌឿងហែមហើយឡើងតាមទៅពួនលើដំបូលផ្ទះប្រជាពលរដ្ឋក្នុងសង្កាត់ទួលស្វាយព្រៃទី២ ខណ្ឌចំការមន ទើបប៉ូលិសប៉ុស្តិ៍ផ្សារដើមគបានសហការជាមួយប៉ូលិសប៉ុស្តិ៍ទួលស្វាយព្រៃទី២ ដោយមានការចូលរួមពីលោកយ៉ុន ចាន់ ចៅសង្កាត់ទួលស្វាយព្រៃទី២ និងលោកនាយប៉ុស្តិ៍ទួលស្វាយព្រៃទី២ ដឹកនាំកម្លាំងរុករកនិងគោះទ្វារផ្ទះប្រជាពលរដ្ឋដើម្បីឡើងទៅលើដំបូលសុំឆែកឆេររយៈពេលមួយម៉ោងតែរកមិនឃើញប៉ូលិសបាននាំគ្នាត្រឡប់ទៅអស់ ។
រហូតដល់ម៉ោង២រំលងអធ្រាត្រថ្ងៃទី៣ មិថុនា ទើបក្រុមចោរលបចុះពីលើដំបូលផ្ទះរត់តាមបណ្តោយមហាវិថីព្រះសីហនុទៅដល់របងពហុកីឡដ្ឋានជាតិអូឡាំពិកម្តុំលក់ផ្លែឈើ ទើបប្រជាពលរដ្ឋនាំគ្នាដេញចាប់បាន ហើយទូរស័ព្ទហៅប៉ូលិសប៉ុស្តិ៍ទួលស្វាយព្រៃទី២ នាំយកទៅសាកសួរនៅប៉ុស្តិ៍ ។ ស្របពេលប្រជាពលរដ្ឋចាប់បាននោះ ស្រាប់តែមានបុរសម្នាក់ដែលអះអាងថាជាម្ចាស់ផ្ទះដែលចោររត់ទៅពួនលើដំបូលនោះបានហូតខែ្សក្រវាត់វាយចោរបែកក្បាលផងដែរ ទោះបីជាប៉ូលិសឃាត់ក៏មិនស្តាប់ដែរ ។
តាមការសាកសួររបស់ប៉ូលិសប៉ុស្តិ៍ទួលស្វាយព្រៃទី២ បានឲ្យដឹងថា ចោររូបនោះមានឈ្មោះឈាង យ៉ាន ហៅអាឈិត ភេទប្រុស អាយុ១៧ឆ្នាំ ស្នាក់នៅផ្ទះ លេខ៤៧E3 ផ្លូវលេខ ៣១០ សង្កាត់អូឡាំពិក ខណ្ឌចំការមន របួស បែកក្បាលដោយសារម្ចាស់ផ្ទះវាយនឹងខែ្ស ក្រវាត់ និង២នាក់ទៀតរត់គេចខ្លួនបាត់ ក្នុងនោះម្នាក់ឈ្មោះខ្លា និងម្នាក់ទៀតមិនស្គាល់ឈ្មោះ ។
ភាពអនាធិបតេយ្យរបស់ស្ត្រីបោយដៃនៅតាមមហាវិថីព្រះមុនីរ៉េតនោះ ប៉ូលិសបានឲ្យដឹងថា កន្លងមកធ្លាប់ ប្រមូលនារីៗទាំងនោះយកទៅដាក់នៅសង្គមកិច្ចបានតែ៣ថ្ងៃក្រោយឃើញត្រឡប់មកវិញដដែលធ្វើឱ្យសមត្ថកិច្ចឈឺក្បាល ។លើសពីនេះទៀតមិនត្រឹមតែមានស្រីបោយដៃប៉ុណ្ណោះទេ ថែមទាំងមានក្រុមចោរនៅលាយឡំជាមួយចាំប្លន់អ្នកដែលមករកសេវាពីនារីទាំងនោះទៀត ។ ទោះជាយ៉ាងណា ដើម្បីទប់ស្កាត់ភាពអនាធិបតេយ្យទាំងអស់នោះទាល់តែប៉ូលិសដែលនៅជាប់ព្រំប្រទល់ទាំងបីខាងលើសហការគ្នាលុបបំបាត់ទើបអស់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
