ខេត្តកំពង់ស្ពឺ ៖ ទីបំផុតល្បែងស្នេហ៍ត្រីកោណបានឈានដល់ផ្លូវបំបែកមួយក្នុងគ្រួសារលោកអធិការប៉ូលិសក្រុងច្បារមន ដែលភរិយារបស់លោកបានចេញមុខចោទប្រកាន់ថា លោកបានលួចលាក់ស្នេហាជាមួយស្រ្តីម្នាក់ ហើយស្ត្រីរូបនោះក៏មានប្តីរួចទៅហើយដែរ ។ តាមការទំលាយរឿងរ៉ាវពីសំណាក់ភរិយាលោកអធិការត្រូវបានអះអាងថា ដោយសារតែឆ្អែតចិត្តចំពោះទង្វើរបស់លោកប្តីដែលជាអ្នកអនុវត្តច្បាប់ បែរជាប្រព្រឹត្តផ្ទុយពីច្បាប់ទៅវិញ ។
កោះសន្តិភាពមិនមានបំណងណាមួយធ្វើឱ្យអាម៉ាស់ដល់ភាគីណាមួយទេ តែរឿងវ៉ាវទាំងអស់ត្រូវបានលាតត្រដាងអស់ទៅហើយដែលភរិយារបស់លោកអធិការ ព្រោះតែវិបត្តិនេះ បានរុញច្រានអ្នកស្រីជាភរិយាដល់កៀនជញ្ជាំងទៅហើយនោះ ។ ភាពប្រេះស្រាំព្រាត់ប្រាសដោយសារតែស្នេហាត្រីភាគីឬស្នេហាត្រីកោណដូចជាប្តីក្បត់ប្រពន្ធ លួចលាក់ស្រឡាញ់ស្រីថ្មី ឬស្ត្រីបែរចិត្តទៅផិតក្បត់ពីប្តីលួចមានសហាយកំបាំងពីប្តី គឺជាស្នេហាពុំមានសុភមង្គលទេ ហើយអ្វីៗវាមានតែអពមង្គលប៉ុណ្ណោះ ។ យ៉ាងណាមិញ រឿងរ៉ាវលោកអធិការ និងភរិយា ដែលត្រូវបំផ្លាញដោយស្នេហាត្រីកោណនេះ បានក្លាយទៅជាភ្នំភ្លើងដែលផ្ទុះចេញក្តៅគគុក ពុំអាចផ្សះផ្សាបាន ។
អ្នកស្រីឧសភា ដែលជាភរិយាលោកអ៊ូច គីមហៀង ជាអធិការប៉ូលិសក្រុងច្បារមន បានរៀបរាប់ថា ចាស់ទុំដែលឱ្យពរជ័យជាង១៥ឆ្នាំមុននេះ ពួកគាត់រួមសុខរួមទុក្ខជាមួយគ្នារហូតមានបុត្រចំនួន៣នាក់ ហើយក្តីក្តៅក្រហាយដែលកើតឡើងនេះ ដោយសារតែមនុស្សទី៣ បានចូលមកជ្រៀតជ្រែក ទើបបំបែកសុភមង្គល រហូតបង្កឱ្យផ្តាច់ទំនាក់ទំនងប្តី-ប្រពន្ធទៀតផង ។ អ្នកស្រីសោម ឧសភា អាយុ៣៥ឆ្នាំ បានអះអាងថា អ្នកស្រីជាប្រពន្ធពេញច្បាប់របស់ឈ្មោះអ៊ូច គីមហៀង អាយុ៤២ឆ្នាំ ដែលបច្ចុប្បន្ន លោកប្តីមានបុណ្យស័ក្តិជាអធិការនគរបាលក្រុងច្បារមន ខេត្តកំពង់ស្ពឺ ។
ស្ត្រីជាភរិយាបានរៀបរាប់ប្រាប់កោះសនិ្តភាពថា ពួកយើងបានរៀបការពេញច្បាប់១៥ឆ្នាំមុននេះ រហូតបានកូនជាចំណងដៃចំនួន៣ នាក់សុទ្ធតែកូនប្រុសទាំងអស់ ។ ពេលនេះប្តីខ្ញុំបានឃ្លាតចាកពីសុភមង្គលគ្រួសារភ្លេចកូនប្រុសទាំង៣នាក់ ដែលរស់ជាមួយគ្នាពុំមានផលរមាស់អ្វីក្នុងគ្រួសារសោះ ។ ស្ត្រីជាភរិយានេះបានបន្តដោយទឹកភ្នែកចំពោះមុខជីដូនឈ្មោះផាត់ យិន អាយុ៧៣ឆ្នាំ រស់នៅភូមិខោប សង្កាត់រកាធំ ក្រុងច្បារមន ថា រឿងត្រូវបែកធ្លាយនៅភូមិល្ពៅ ឃុំក្សេមក្សាន្ត ស្រុកឧដុង្គ នាយប់ថ្ងៃទី១៩ តុលា ឆ្នាំ២០១២ វេលាម៉ោង១០ និង៣០នាទីក្នុងអាហារដ្ឋានមួយដែលមានបន្ទប់ខារ៉ាអូខេផងពេលលោកប្តីអ៊ូច គីមហៀង នាំស្ត្រីជាប្រពន្ធប៉ូលិសស្រុកម្នាក់ដែលមានអាជីវកម្មលក់ឈើនៅក្នុងភូមិល្ពៅ ឃុំក្សេមក្សាន្ត ចូលទីនោះ ។ នាយប់នោះ ប្តីរបស់ស្ត្រីរូបនោះបានទៅទាន់សភាពការណ៍ឃើញលោកអ៊ូច គីមហៀង នាំប្រពន្ធខ្លួនចូលច្រៀងខារ៉ាអូខេ និងមានការហូបចុកផង ។ ពេលប្តីស្ត្រីរូបនោះចូលទៅ ស្រាប់តែផ្អើលដោយសារឃើញប្រពន្ធរបស់ខ្លួនរត់តាមទ្វារក្រោយគេចខ្លួន ។ ឯភ្ញៀវដែលកំពុងសប្បាយនោះក៏មានលោកអ៊ូច គីមហៀង ជាប្តីរបស់អ្នកស្រីដែរ គឺពេលនោះក៏មានការប៉ះសម្តីគ្នាយ៉ាងអសុរោះបំផុត ដោយពុំគិតខ្លួនថា បាននាំប្រពន្ធគេមកស៊ីផឹកច្រៀងបែបនេះ គឺជាការខុសឆ្គងទេ ។
ស្ត្រីជាប្រពន្ធលោកគីមហៀង បន្តថា ពេលនោះប្តីអ្នកស្រីមិនអស់ចិត្ត ក៏ហៅប្តីស្រ្តីថៅកែឈើនោះមកវ៉ៃគ្នា ប៉ុន្តែពុំមានការតបតទេ និងមានសុជីវធម៌ខ្ពស់ ព្រោះគេចង់នាំតែប្រពន្ធឱ្យវិលទៅផ្ទះវិញប៉ុណ្ណោះ ។ ដោយសារមិនអស់ចិត្ត លោកអ៊ូច គីមហៀង ដែលអាងអំណាចខ្លាំងបានទាញកាំភ្លើង AK បាញ់ពីរគ្រាប់មុខហាងខារ៉ាអូខេផ្អើលអ្នកផ្សាររត់ប្រសាច ។ ប្តីដែលក្តៅក្រហាយនេះ ក៏បានតាមទៅដល់មុខផ្ទះប្តីស្ត្រីថៅកែឈើទាមទារឱ្យចេញ ហើយបាញ់គំរាមអស់២គ្រាប់ទៀត ទើបអាជ្ញាធរដែនដីជួយឃាត់ ។
ស្ត្រីជាភរិយារំលឹកទៀតថា នៅយប់ថ្ងៃទី១៨ ធ្នូ ២០១១ លោកប្តីអ៊ូច គីមហៀង បាននាំស្ត្រីជាប្រពន្ធគេនោះមកដេកជាមួយបន្តទៀតនៅផ្ទះក្នុងភូមិខោប សង្កាត់រកាធំ ក្រុងច្បារមន ពេលនោះដោយរូបគាត់ទៅទាន់ ក៏បណ្តេញគាត់ជាប្រពន្ធចេញពីរថយន្ត ហើយដឹកដៃស្ត្រីថៅកែឈើនោះឱ្យឡើងរថយន្ត CRV ចេញទៅទាំងយប់បាត់ ។ នេះជារឿងអាស្រូវបំផុតដែលប្តីគាត់បានសាងមកលើគាត់ជាភរិយាពេញច្បាប់រហូតបំភ្លេចទាំងកូន៣នាក់ផង ។
អ្នកស្រីសោម ឧសភា បន្តថា នៅថ្ងៃទី២៨ មករា ឆ្នាំ២០១២ នាងខ្ញុំដែលរវល់ជាប់លក់ដូរនៅផ្សារឧដុង្គនោះ ក៏បានមកផ្ទះជាមួយកូនទី៣ ដែលមានអាយុ១១ឆ្នាំ ជាមួយជីដូនឈ្មោះផាត់យិន ។ លុះចូលទៅក្នុងផ្ទះ នាល្ងាចម៉ោង៥ និង៣០នាទី ស្រាប់តែលោកប្តីទាញទ្វារបិទ ហើយវាយកញ្ចក់ និងវាយតុ ទូ និងទាញសោធុន Solex គប់តម្រង់ក្បាលអ្នកស្រីទៀត ក្នុងគោលបំណងគប់ក្បាល តែនាងខ្ញុំបានគេចផុត ។
អ្នកស្រីជាភរិយាបានចោទថា លោកប្តីពិតជាលួចស្រឡាញ់ថៅកែឈើជាប្រពន្ធរបស់មន្ត្រីប៉ូលិសម្នាក់នៅអធិការដ្ឋាននគរបាលស្រុកឧដុង្គមែន ។ ស្ត្រីថៅកែឈើដែលជាភរិយាមន្ត្រីប៉ូលិសស្រុកឧដុង្គនោះ បានលបលួចឆក់យកប្តីគាត់ជិត២ឆ្នាំ មកហើយ ដែលកាលណោះអ្នកស្រីយល់មុខមាត់ថា ជាប្តីអាចវង្វេងនឹងតណ្ហាម្តងម្កាល តែពេលនេះទ្រាំលែងបានហើយ ។ ចំណែកប្តីស្ត្រីថៅកែឈើមុខស្រស់ប្រិមប្រិយនោះក៏បានធ្វើពាក្យប្តឹងលោកប្តីអ៊ូច គីមហៀង ពីបទតាមបាញ់បោះដល់មុខផ្ទះខ្លួនក្នុងគោលបំណងសម្លាប់ផងដែរ រួមទាំងស្រឡាញ់ប្រពន្ធគេឥតខ្មាសអៀនទៀត ។
តាមការរៀបរាប់ពីស្ត្រីជាប្រពន្ធ គឺអ្នកស្រី សោម ឧសភា ថា លោកអ៊ូច គីមហៀង ទាមទារដាច់ខាតឱ្យលែងលះគ្នា ហើយត្រូវប្រគល់ដី និងផ្ទះដែលជាកេររបស់គាត់ឱ្យខ្លួនទៀត តែអ្នកស្រីបានតបវិញថា បើលោកប្តីអ៊ូច គីមហៀង សុំលែងលះអ្នកស្រីក៏អស់ចិត្តដែរ ព្រោះមិនអាចទ្រាំរស់ក្នុងភពកម្មជាង២ឆ្នាំមកហើយ ដោយវេទនាបំផុត តែប្តីត្រូវចុះតែខ្លួនចេញពីដី និងផ្ទះជាកេរម៉ែឪអ្នកស្រី ។ ពិសេសត្រូវបន្តចិញ្ចឹមកូនប្រុសទាំង៣នាក់ ដែលស្ថិតក្នុវវ័យសិក្សាក្នុង១ខែពីរលានរៀល ។
លោកយាយផាត់ យិន ជាជីដូនបង្កើតអ្នកស្រី សោម ឧសភា និយាយទាំងរអាក់រអួលថា សុំលោកអ្នកច្បាប់ជួយរកយុត្តិធម៌ផង លោកអ៊ូច គីមហៀង មើលងាយមើលថោកប្រពន្ធខ្លួន ជេរដៀលយ៉ាងឃោរឃៅពុំអាចទ្រាំបាន ហើយគាត់ចំណាស់នេះហើយពុំគួរតិះដៀលពាក្យអាសអាគ្រាមយ៉ាងជូរចត់ដែលគាត់ពុំអាចទទួលយកបាន ។
ក្នុងករណីប្តីក្បត់ចិត្តនេះ អ្នកស្រីជាភរិយាអះអាងថា អ្នកស្រីព្យាយាមសុំឱ្យលោកស្នងការជួយណែនាំប្តីផង តែបែរជាស្ងាត់រហូតមក ដូច្នេះមានតែអង្គការសិទ្ធិមនុស្ស អ្នកច្បាប់តុលាការទេ ដែលអាចរកយុត្តិធម៌ដល់រូបគាត់ជាប្រពន្ធ ជាជីដូន ជាកូនប្រុស៣នាក់ ក្នុងបន្ទុកដែលកំពុងតែសិក្សា ហើយបែរជាឪពុកមានអំណាចប្រព្រឹត្តផ្ទុយច្បាប់បែបនេះ ៕
ដកស្រង់ពី កោះសន្តិភាព
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]