ខេត្តប៉ៃលិន ៖ កុមារី សៀ បូរី ហៅណងហ្វា អាយុ១៣ឆ្នាំ រៀនថ្នាក់ទី៣ សាលាបឋមសិក្សាអូរច្រា រស់នៅភូមិចម្ការកាហ្វេ សង្កាត់ប៉ៃលិន ក្រុងប៉ៃលិន ត្រូវជនពាក់ម៉ាស់មុខ២នាក់ លបចាប់ខ្ទប់មាត់ ខណៈពេលនាងត្រឡប់ពីដាក់បាយឱ្យឆ្កែនៅផ្ទះមួយទៀត ឆ្ងាយពីផ្ទះនាងនៅ១០០ម៉ែត្រ ។ កុមារីតូចនេះត្រូវជនទាំង២នាក់ច្រកទុកចោលក្នុងការុងអស់រយៈ ពេល១យប់ ។ ដោយសារបាត់ក្មេងស្រីមិនឃើញចូលដេក ក្រុមគ្រួសារនាំគ្នាដើររកសព្វទិសទី តែមិនឃើញតម្រុយអ្វីបន្តិចសោះ ។ លុះព្រឹកឡើងទើបឃើញនាងត្រូវគេយកទៅប្លុងចោលក្នុងការុងនៅ ក្រោមដើមស្វាយមុខផ្ទះ ។ សំណាងល្អក្មេងស្រីរូបនេះមិនមានគ្រោះថ្នាក់អ្វីទេ គឺគ្រាន់តែមានសភាពភ្លេចភ្លាំងបន្តិចបន្តួចប៉ុណ្ណោះ ។ ហេតុការណ៍នេះកើតឡើងកាលពីវេលាម៉ោង៧និង៣០នាទីព្រឹកថ្ងៃទី២៩ ឧសភា ។
លោកអនុសេនីយ៍ទោ ងិន ឆ្លើម នាយប៉ុស្តិ៍រដ្ឋបាលសង្កាត់ទួលល្វាឱ្យដឹងថា ក្មេងស្រីនេះជាកូនចិញ្ចឹមរបស់លោក សៀ ផាន អាយុ៥១ឆ្នាំ ជាអនុប្រធានមន្ទីរសាធារណការ និងដឹកជញ្ជូនខេត្ត ។ លោកពុំទាន់សាកសួរព័ត៌មានពិស្តារនៅឡើយទេ ព្រោះក្មេងស្រីរងគ្រោះមានសភាពភ្លេចភ្លាំង ដូចជាត្រូវគេដាក់ថ្នាំសណ្តំ និយាយមិនរួច តែសំណាងល្អជនល្មើសមិនបានបង្ករបួសស្នាមអ្វីដល់នាងទេ ។
លោកសៀ ផាន ប្រាប់កោះសន្តិភាពថា រូបលោកបានយកកុមារីរងគ្រោះមកចិញ្ចឹមតាំងពីតូចម៉្លេះ ព្រោះឪពុកម្តាយនាងក្រីក្រណាស់ ។ នៅយប់កើតហេតុវេលាម៉ោង៧និង១៥នាទីលោកចេញពីផ្ទះទៅចូលរួម ពិធីមង្គលការមួយ នៅក្បែរផ្សារសាមគ្គីហៅផ្សារប៉ាហ៊ី ។ ចំណែកហើយកូនស្រីចិញ្ចឹមរបស់លោកឈ្មោះ បូរី ហៅណងហ្វា បានទៅដាក់បាយឱ្យឆ្កែជាមួយប្អូនស្រីរបស់លោក ឈ្មោះ ភឹម សាវុន អាយុ២៨ឆ្នាំ នៅផ្ទះនាងដែលមានចម្ងាយប្រហែល១០០ម៉ែត្រ ពីផ្ទះរបស់លោក នៅទល់មុខភោជនីយដ្ឋានប៊ែមប៊ូរ ។
ពេលទៅដល់កន្លែងជប់លៀងមង្គលការ លោកបានទូរស័ព្ទប្រាប់ប្អូនស្រីថា លោកបានទិញផ្លែទុរេនទុកនៅក្នុងទ្រុងរថយន្តនៅក្រោមផ្ទះហើយឱ្យ ពួកគេយកហូប ។ ពេលប្អូនស្រីរបស់លោកត្រឡប់មកពីដាក់បាយឱ្យឆ្កែវិញក៏យក ផ្លែទុរេនឡើងទៅលើផ្ទះហូបទាំងអស់គ្នា តែមិនឃើញកូនស្រីចិញ្ចឹមរបស់លោកឡើងទៅលើផ្ទះ ទេ ។ ពេលសួរគ្នាទៅវិញទៅមក ទើបដឹងថាពេលទៅដាក់បាយឆ្កែរួចមិនឃើញនាងត្រឡប់មកវិញទេ ។ ពេលនោះនាំគ្នាផ្អើលឆោឡោដើររកសព្វទីកន្លែងនៅក្បែរៗផ្ទះ ក្រែងនាងខឹងនឹងនរណាម្នាក់មិនឡើងលើផ្ទះ ។
បុរសជាឪពុកបន្តទៀតថា ពួកគាត់តាមរករហូតដល់ម៉ោង១២អធ្រាត្រនៅតែមិនឃើញក៏ឈប់សម្រា ក ។ លុះព្រឹកឡើងនៅវេលាម៉ោង៧ និង៣៥នាទីព្រឹកថ្ងៃទី២៩ ឧសភា ស្រាប់តែប្រទះឃើញកូនចិញ្ចឹមរបស់គាត់ត្រូវគេច្រកក្នុងការុងទុក នៅក្រោមដើមស្វាយក្នុងរបងក្បែរមុខផ្ទះ ។ ពេលលោកស្រាយការុងមើលទៅ ក៏ឃើញកូនស្រីដកដង្ហើមផ្តឹកៗ នៅក្នុងការុងនោះដោយគេមិនបានចងដៃ ឬជើងទេ។ រូបលោកឃើញកូនមានសភាពដូច្នេះ ក៏នាំយកទៅមន្ទីរពេទ្យខេត្តយ៉ាងប្រញាប់ ។
លោកសៀក ផាន បញ្ជាក់ថា ក្រោយពេលកូនស្រីដឹងខ្លួនវិញលោកសាកសួរ ហើយនាងប្រាប់ថាពេលនាងត្រឡប់មកពីដាក់បាយឱ្យឆ្កែវិញ ក៏យកឆ្នាំងបាយឆ្កែដាក់នៅមុខផ្ទះ ។ បន្ទាប់មកនាងដើរទៅបិទទ្វាររបង ។ នៅពេលនាងដើរសំដៅទៅផ្ទះវិញ ស្រាប់តែត្រូវបុរស២នាក់ហៅឈ្មោះនាង ។ ដោយស្មានថាជាអ្នកនៅជាមួយគ្នានាងក៏ដើរទៅមើល ហើយឃើញមនុស្សប្រុស២នាក់រាងស្តើង ពាក់អាវខ្មៅ ខោខ្មៅ និងពាក់ម៉ាស់បិទមុខជិតនៅសល់តែប្រឡង់ភ្នែក ។ ពួកគេស្ទុះយកក្រណាត់មកខ្ទប់មាត់នាងជាប់ និងយកការុងមកច្រកនាង រួចលីយកទៅទម្លាក់នៅក្នុងគុម្ពោតព្រៃក្រៅរបងផ្ទះ ។
ក្មេងស្រីរងគ្រោះប្រាប់ឪពុកទៀតថា ពេលអ្នកផ្ទះដើររក និងស្រែកហៅនោះរូបនាងឮសំឡេងដែរ តែនិយាយតបវិញមិនរួច ។ ក្រោយមកទៀតនាងបានសន្លប់បាត់ស្មារតីដោយសារការុងច្រកនាងរុំ មាត់ជិត ដោយមិនដឹងថា គេលីដាក់នៅក្រោមដើមស្វាយមុខផ្ទះតាំងពីពេលណាទេ ។សមត្ថកិច្ចពុំអាចសន្និដ្ឋានថាករណីនេះមកពីមូលហេតុអ្វីនៅឡើយ ទេ ព្រោះក្មេងស្រីរងគ្រោះមិនទាន់មានសភាពធម្មតាវិញនៅឡើយ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
