រាជធានីភ្នំពេញ ៖ ចោរប្លន់ប្រដាប់អាវុធមួយក្រុមបានធ្វើសកម្មភាពបាញ់ប្រហារទៅលើអាជីវករលក់មាសប្តូរប្រាក់មួយគ្រួសារបណ្តាលឱ្យបុរសពីរនាក់ឪពុកនិងកូនរបួសយ៉ាងធ្ងន់ធ្ងរ ហើយក្រុមចោរប្លន់នោះបានដណ្តើមយកកាបូបដាក់គ្រឿងអលង្ការមាន មាស ប្លាទីន ប្រាក់ដុល្លារ និងប្រាក់រៀល សរុបជាង១៥ម៉ឺនដុល្លារ គឺប្លន់យកអស់ហើយគេចខ្លួនទៅបាត់ដោយសុវត្ថិភាព ។
ហេតុការណ៍នោះបានកើតឡើងកាលពីវេលាម៉ោង៦ និង៣០នាទីព្រលប់ថ្ងៃទី២៩ ឧសភា នៅចំណុចផ្ទះលេខ១ ក្នុងបូរីមួយនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
គ្រួសាររងគ្រោះនិយាយថា ក្រុមចោរប្លន់មានគ្នាពីរនាក់ស្លៀកពាក់ស៊ីវិល មានពាក់មួកការពារសុវត្ថិភាពទាំង២នាក់ ប្រដាប់ដោយកាំភ្លើងខ្លីពីរដើម ដែលតាមការសន្និដ្ឋានថា ម៉ាកឡុក បានជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ មួយគ្រឿង ។ ពួកចោរបានបាញ់ទៅលើឪពុកនិងកូនចំនួនពីរគ្រាប់បណ្តាលឱ្យរងរបួស ។ ជនរងគ្រោះដែលត្រូវចោរបាញ់ ឪពុកឈ្មោះលឹម ឆេង អាយុ៤៨ឆ្នាំ ជាអាជីវករលក់មាស ប្តូរប្រាក់ នៅផ្សារកាណាឌីយ៉ា រងរបួសភ្លៅខាងស្តាំ១គ្រាប់ ។ ឯកូនប្រុសឈ្មោះលឹម ដាណាល់ អាយុ២០ឆ្នាំ ជានិស្សិតនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច រងរបួស១គ្រាប់ចំស្នងជើងខាងឆ្វេង ។
ចំពោះទ្រព្យសម្បត្តិដែលក្រុមចោរប្លន់យកទៅតាមការអះអាងពីម្ចាស់និយាយថា មានគ្រឿងអលង្ការប្លាទីនចំនួន៥០តម្លឹង គ្រឿងអលង្ការមាស ចំនួន៤តម្លឹង ប្រាក់អាមេរិកចំនួន២ពាន់ដុល្លារ និងប្រាក់ខ្មែរចំនួនជាង២លានរៀល ព្រមទាំងគ្រឿងអលង្ការមាស និងប្លាទីន ដែលគេផ្ញើមួយចំនួនទៀត សរុបជាទឹកប្រាក់ជាង១៥ម៉ឺនដុល្លារ រួមទាំងទូរស័ព្ទដៃផងដែរ ។
ជនរងគ្រោះបានរៀបរាប់ថា នៅមុនពេលកើតហេតុរូបគាត់ និងប្រពន្ធបានប្រមូលគ្រឿងអលង្ការ និងប្រាក់ដាក់ក្នុងកាបូបមួយ រួចបិទតូបឈប់លក់ដូរដូចធម្មតា ត្រូវវិលមកផ្ទះវិញ ដោយជិះរថយន្តមួយគ្រឿងម៉ាកហុងដា CR-V ពណ៌ទឹកប្រាក់ ពាក់ស្លាកលេខភ្នំពេញ 2I 1594 ចាកចេញពីកន្លែងលក់ដូរ ។ ខណៈនោះរូបគាត់ គឺជាអ្នកបើករថយន្ត ចំណែកប្រពន្ធជិះជាមួយដោយកាន់កាបូបធំមួយដាក់សុទ្ធតែប្រាក់និងគ្រឿងអលង្ការ ។ ឯកូនប្រុសឈ្មោះលឹម ដាណាល់ នៅចាំផ្ទះ ។ ទាក់ទិននឹងក្រុមចោរប្លន់ បើតាមការអះអាងថា ពួកចោរបានទៅសម្ងំចាំនៅមុខផ្ទះរបស់គាត់រួចជាស្រេចទៅហើយ។
បុរសរងគ្រោះបានបន្តទៀតថា នៅពេលដែលគាត់ និងប្រពន្ធបើករថយន្តទៅដល់ផ្ទះ កូនប្រុសជាអ្នកបើកទ្វារផ្ទះឱ្យ ។ គ្រាន់តែប្រពន្ធគាត់ចុះពីលើរថយន្តភ្លាម បម្រុងដើរចូលទៅក្នុងផ្ទះ ស្រាប់តែក្រុមចោរប្រដាប់អាវុធដោយកាំភ្លើងខ្លី២ដើម និងពាក់មួកសុវត្ថិភាពទាំងពីរនាក់ផងនោះ បានស្ទុះចូលទៅដណ្តើមយកកាបូបដែលប្រពន្ធរបស់គាត់ជាអ្នកកាន់បម្រុងយកទៅទុកក្នុងផ្ទះ ។ ពេលចោរដណ្តើមយកនោះប្រពន្ធរបស់គាត់មិនព្រមឱ្យទេ បានឱបកាបូបនោះរត់ចូលទៅក្នុងបន្ទប់ក្នុងផ្ទះ ហើយក្រុមចោរបានរត់ដេញតាមចូលទៅភ្ជង់ដណ្តើមយកដល់ក្នុងបន្ទប់បានសម្រេច រួចនាំគ្នារត់ចេញក្រៅវិញ ។ លោកលឹម ឆេង រៀបរាប់ទៀតថា ពេលឃើញបែបនេះ គាត់និងកូនប្រុសក៏រត់ទៅដណ្តើមយកកាបូបនោះពីចោរវិញ ទើបត្រូវក្រុមចោរបាញ់ម្នាក់១គ្រាប់បណ្តាលឱ្យរងរបួសទាំងពីរនាក់ ។ បន្ទាប់មកក្រុមចោរបានយកកាបូបប្រាក់ និងគ្រឿងអលង្ការនោះ ជិះម៉ូតូគេចខ្លួនទៅបាត់ស្រមោលតែម្តង ។
ប្រភពព័ត៌មានពីកន្លែងកើតហេតុ បានឱ្យដឹងថា តាមការសន្និដ្ឋានក្រុមចោរប្លន់នេះមុននឹងធ្វើសកម្មភាពប្លន់ ពិតជាបានធ្វើការតាមដានសកម្មភាពរបស់ជនរងគ្រោះយូរថ្ងៃមកហើយ ចេញពីផ្ទះនៅម៉ោងប៉ុន្មាន និងចូលផ្ទះវិញម៉ោងប៉ុន្មានក៏ពួកគេដឹងដែរ ។ លុះពេលមានឱកាសល្អពួកគេបានធ្វើសកម្មភាពប្លន់តែម្តង ទើបបានសម្រេចផុយស្រួយបែបនេះ ៕
ផ្តល់សិទ្ធដោយ កោះសន្តិភាព
បញ្ចូលអត្ថបទ ៖ បុប្ផា កោះ
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
