ជនសង្ស័យម្នាក់ ត្រូវប៉ូលិសនៅភាគនិរតីនៃប្រទេសចិនចាប់ខ្លួន ដោយជាប់ចោទពីបទសម្លាប់មនុស្សជាង១០នាក់ ក្នុងនោះមានទាំងក្មេងប្រុស និងយុវជនផងដែរ និងបានកាប់ចញ្ច្រាំសាច់របស់ពួកគេលក់ទៅឱ្យអតិថិជន ។ នេះបើយោងតាមប្រភពពីគេហទំព័ររបស់ Guangxi News ចេញផ្សាយថ្ងៃទី២៦ ឧសភាឆ្នាំ២០១២ ។
លោក Zhang Yongming អាយុ៥៦ឆ្នាំ ត្រូវបានចាប់ខ្លួនកាលពី២សប្តាហ៍មុននៅភូមិ ណានមិន (Nanmen) ស្ថិតនៅខេត្ត យូណាន ប្រទេសចិន ខណៈដែលប៉ូលិសកំពុងស៊ើបអង្កេតលើករណីឃាតកម្មយុវជនម្នាក់អាយុ១៩ឆ្នាំ កាលពីចុងខែមេសាកន្លងមក ។
ប្រភពបន្តថា ក្នុងប្រតិបត្តិការស៊ើបអង្កេតនោះ ប៉ូលិសបានចូលទៅក្នុងផ្ទះលោក Zhang Yongming ហើយរកឃើញទូរស័ព្ទដៃ និងកាតធនាគាររបស់យុវជនដែលបាត់ខ្លួននោះ និងបានរកឃើញភស្តុតាងជាច្រើនទៀត ។
យោងតាមរបាយការណ៍ដែលបានដកស្រង់សម្តីពីអ្នកភូមិបាននិយាយថា លោក Zhang Yongming គឺជាបិសាចស៊ីសាច់មនុស្ស ។ ពួកគេតែងតែឃើញថង់ប្លាស្ទិកពណ៌បៃតងជាច្រើនព្យួរនៅខាងក្រៅផ្ទះរបស់គាត់ ហើយលេចចេញឆ្អឹងពណ៌សតាមមាត់ថង់ទៀតផង ។ ទន្ទឹមនឹងនេះពួកគេថែមទាំងបាននិយាយថា ក្នុងភូមិនេះតែងតែមានក្មេងជំទង់ជាង១០នាក់បានបាត់ខ្លួនជារៀងរាល់ឆ្នាំ ។
ពាក់ព័ន្ធនឹងករណីឃាតកម្មនេះ ប៉ូលិសក្នុងតំបន់បានបដិសេធមិនផ្តល់អត្ថាធិប្បាយណាមួយទេ នៅពេលដែលជួបជាមួយអ្នកយកព័ត៌មានឱ្យទីភ្នាក់ងារ AFP កាលពីថ្ងៃសុក្រ ដោយគ្រាន់តែនិយាយថា ព័ត៌មាននេះប្រហែលជាអាចកើតមានពិតមែន តែក្នុងមួយរយៈពេលប៉ុណ្ណោះ។ ដោយឡែក របាយការណ៍មួយផ្សេងទៀតដែលបង្ហាញពីករណីដ៏គួរឱ្យខ្ពើមរអើមនេះដែរត្រូវបានគេលុបចេញពីគេហទំព័រនៅទូទាំងប្រទេសចិនអស់ហើយ ។
ប៉ុន្តែបើយោងតាមប្រភពពីកាសែតហុងកុង The Standard បានឱ្យដឹងកាលពីថ្ងៃសុក្រសប្តាហ៍មុនថា ប៉ូលិសបានចូលឆែកឆេរក្នុងផ្ទះរបស់លោក Zhang Yongming និងបានប្រទះឃើញគ្រាប់ភ្នែកមនុស្សជាច្រើនរក្សាទុកក្នុងដបស្រា ហើយដុំសាច់មនុស្សជាច្រើនដុំបានចងព្យួរក្នុងផ្ទះដើម្បីហាលឱ្យស្ងួត ។
ប្រភពពីកាសែត The Standard បានបន្តថា ប៉ូលិសសង្ស័យថា លោក Zhang Yongming បានយកសាច់មនុស្សមួយចំណែកទៅឱ្យឆ្កែរបស់គាត់ចំនួន៣ក្បាលស៊ីជាអាហារ ហើយមួយចំណែកលក់នៅលើទីផ្សារដោយហៅសាច់នេះថា «សាច់សត្វអូទ្រីស» ។
ដោយឡែកប្រភពផ្លូវការពីទីភ្នាក់ងារស៊ីនហួបានឱ្យដឹងថា អាជ្ញាធរទីក្រុងប៉េកាំងបានបញ្ជូនក្រុមអ្នកអង្កេតការណ៍មួយក្រុមទៅខេត្តយូណានដើម្បីគ្រប់គ្រងការស៊ើបអង្កេតលើករណីបាត់ខ្លួនក្មេងប្រុសជំទង់ទាំងអស់នោះ ហើយក្នុងនោះដែរប្រធានប៉ូលិសក្នុងតំបន់២រូបត្រូវបានគេបណ្តេញចេញពីតំណែងផងដែរ ។
ប្រភពបន្តថា ក្រុមគ្រួសារអ្នកបាត់ខ្លួនសង្ស័យថា កូនៗរបស់ពួកគាត់ទាំងនោះអាចត្រូវគេចាប់ខ្លួន និងបង្ខំឱ្យធ្វើការខុសច្បាប់នៅកន្លែងណាមួយ ។
ទីភ្នាក់ងារស៊ីនហួបានបន្ថែមថា បច្ចុប្បន្ន រដ្ឋាភិបាលកំពុងជំរុញឱ្យអាជ្ញាធរសមត្ថិកច្ច ក៏ដូចជាក្រុមអ្នកស៊ើបអង្កេតធ្វើយ៉ាងណាដោះស្រាយករណីនេះឱ្យបានឆាប់ជាទីបំផុត ៕
ផ្តល់សិទ្ធដោយ កោះសន្តិភាព
ដោយ ៖ សាម៉ន
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]